Beed Politics : मुंडे बहीण-भावाच्या निवृत्तीच्या संकेतावर करुणा मुंडेंचे मोठे विधान; म्हणाल्या,'बीडमध्ये सभा घेऊन.....'

राज्यातील राजकारण गेल्या काही दिवसापासून फोडाफोडीने व सीजेपी पक्षाने केलेल्या आंदोलनामुळे चांगलेच तापले आहे. त्यातच आता भाजप नेत्या आणि मंत्री पंकजा मुंडे यांनी एका कार्यक्रमावेळी बोलताना निवृत्तीबाबत मोठे वक्तव्य केले. यावेळी बोलताना आता राजकारणातून निवृत्त व्हावे असे वाटतंय असे पंकजा मुंडे म्हणाल्या होत्या. तर दुसरीकडे राष्ट्रवादीचे नेते आणि आमदार धनंजय मुंडे यांनी देखील गलिच्छ राजकारणात राहु शकत नाही असे मोठे विधान केले आहे. दरम्यान, या विधानावरून आता मुंडे बहीण-भाऊ निवृत्तीचे संकेत दिले आहेत का? अशी चर्चा रंगली असतानाच करुणा मुंडे यांची प्रतिक्रिया समोर आली आहे. त्यांनी या निमित्ताने संधी मिळताच पुन्हा एकदा धनंजय मुंडे, पंकजा मुंडे यांच्यावर जोरदार हल्लाबोल केला आहे.

मुंडे बहीण-भाऊ यांनी राजकारणातून निवृत्ती घेण्याचे संकेत दिले आहेत. यावर बोलताना करुणा मुंडे म्हणाल्या की, 'पंकजा मुंडे यांनी सांगितले की मला राजकारणातून एक्झिट पाहिजे आणि धनंजय मुंडे यांनी आज सकाळी सांगितले की या गलिच्छ राजकारणामध्ये मी राहू की नाही. जर हा प्रश्न येतो आहे तर खरोखर या दोघा बहीण-भावांनी राजकारणातून एक्झिट घ्यायला पाहिजे, आणि परळी बीडमध्ये मला संधी द्यायला पाहिजे, मी त्यांच्या एक्झिटसाठी बीडमध्ये सभा घेते, त्यांना पाठिंबा देते.'

या दोघांनी मतदारसंघात गलिच्छ राजकारण केले आहे. त्याचा फटका त्यांना बसण्याची भीती आहे. वंजारी समाजाचा मर्डर झाला की, तुम्ही तिकडे जाता. त्यांच्या कुटुंबाला पाच लाख रुपये देता, परंतु त्यांना देखील पूर्ण न्याय देऊ शकत नाही, असा घणाघात यावेळी करुणा मुंडे यांनी केला. या मंडळीने गलिच्छ राजकारण केले आहे, मुंडे साहेबांचे राजकारण या दोन्ही बहीण-भावांना जमले नाही, असेही करुणा मुंडे म्हणाल्या.

मुंडे साहेबांचे राजकारण या दोन्ही बहीण-भावांना जमले नाही. येत्या काळात मी गोपीनाथ मुंडे साहेबांच्या पावलावर पाऊल ठेवून काम करणार आहे. मला आता राजकारणात यायला लोकांनी पाठिंबा द्यायला पाहिजे, असेही प्रसार माध्यमाशी बोलताना करुणा मुंडे म्हणाल्या.