Mahapalika Nivadnuk: सतेज पाटलांनी सांगितला महापौरांचा कालावधी; कोल्हापुरात काँग्रेसकडून जाहीरनामा प्रसिद्ध

Kolhapur News: कोल्हापूर महानगरपालिकेची निवडणुकीत आज काँग्रेसकडून जाहीरनामा प्रसिद्ध करण्यात आला. ऐतिहासिक भवानी मंडप येथे खासदार श्रीमंत शाहू महाराज छत्रपती यांच्या हस्ते महापालिका निवडणुकीच्या पार्श्वभूमीवर काँग्रेसने या जाहीरनाम्यातून आपले व्हिजन स्पष्ट केले. या जाहीरनाम्यातून महिला वर्गाला अधिक महत्व दिले आहे. शहराच्या पायाभूत संविधान बाबत आश्वासनांची खैरात केली आहे.

गेल्या अनेक वर्षांपासून राज्यभरातून कोल्हापूर महानगरपालिकामध्ये महापौरपदाची खांडोळी केली जात असल्याचा आरोप केला जात होता. मात्र त्याला आता काँग्रेसकडून कोणतेही स्थान दिले जाणार नाही. कोल्हापूर महानगरपालिकेत आमच्यामध्ये दोन ते तीन महिन्याचा महापौर असणार नाही, असे सांगत संपूर्ण कालावधीचा महापौर असण्याचे संकेत काँग्रेस नेते आमदार सतेज पाटील यांनी दिले.

काँग्रेसने जाहीर केलेल्या जाहीरनाम्यात, महिलांना आणि विद्यार्थ्यांना संपूर्ण मोफत प्रवास, पिंक बस, शहरातील महिलांना सर्व समावेशक आरोग्य तपासणी, सुरक्षित पाळणाघरे, स्वच्छ आणि सुरक्षित स्वच्छतागृहे, शहरवासीयांना तातडीची वैद्यकीय आर्थिक मदत, यासह आरोग्य विषयक बाबी जाहीरनाम्यात प्रसिद्ध केले आहेत.

शैक्षणिक संदर्भात छत्रपती शिवाजी महाराज नॉलेज सेंटर, महापौर गुणवत्ता शिष्यवृत्ती, फिरते वाचनालय, शिवाय शहरातील पार्किंग व्यवस्था, पूररेषेसंदर्भात काटेकोर पालन, शहरांतर्गत उड्डाणपूल यासह अन्य कामांबरोबर वचननामा देण्यात आला.

कोल्हापूर शहराच्या हदवाडीबाबत स्पष्ट भूमिका काँग्रेस नेते आमदार सतेज पाटील यांनी व्यक्त केली नाही. मात्र जाहीरनाम्यातून कोल्हापूरच्या सुनियोजित विकासासाठी शहराची हद्दवाढ करणे आवश्यक आहे. त्यामुळे ग्रामीण भागातील लोकांना विश्वासात घेऊन प्रश्न मार्गी लावणार असल्याचा आश्वासन देण्यात आला आहे. मात्र ठोस अशी भूमिका जाहीरनाम्यातून घेतलेली दिसत नाही.