Mumbai University : मुंबई विद्यापीठाचा नवा नियम; आता लेट कमर्सना 'नो एन्ट्री'; परीक्षेपूर्वी 30 मिनिटे आधी हजर राहणे बंधनकारक

Mumbai News : मुंबई विद्यापीठात शिक्षण घेणाऱ्या विद्यार्थ्यांसाठी महत्वाची बातमी असून विद्यापीठाने नवा नियम केला आहे. या नियमाप्रमाणे आता सर्व परीक्षांसाठी विद्यार्थ्यांनी निर्धारित परीक्षा वेळेच्या किमान ३० मिनिटे अगोदर परीक्षा हॉलमध्ये उपस्थित राहणे अनिवार्य करण्यात आले आहे. हा निर्णय परीक्षा व मूल्यमापन मंडळ, व्यवस्थापन परिषद तसेच विद्वत परिषदेच्या बैठकीत घेण्यात आला आहे. तर हा नियम शैक्षणिक वर्ष २०२६-२७ पासून आणि त्यानंतर आयोजित करण्यात येणाऱ्या सर्व परीक्षांसाठी लागू करण्यात आला आहे.

परीक्षा कक्षात प्रवेश करण्यापूर्वी परीक्षार्थीची ओळखपत्र तपासणी, आसनव्यवस्था, आवश्यक पडताळणी आणि इतर परीक्षा प्रक्रियांसाठी वेळ आवश्यक असतो. त्यामुळे परीक्षा सुरू होण्याच्या अगदी शेवटच्या क्षणी परीक्षा कक्षात येणाऱ्या परीक्षार्थीना होणारी संभाव्य गैरसोय टाळण्यासाठी हा महत्त्वपूर्ण निर्णय घेण्यात आला आहे. उदाहरणार्थ, परीक्षेची निर्धारित वेळ सकाळी १०.३० वाजता असल्यास, परीक्षार्थीनी सकाळी १० वाजेपर्यंत परीक्षा कक्षात उपस्थित राहणे आवश्यक आहे, असे आवाहन विद्यापीठाने केले आहे.

नियमांची अंमलबजावणी करावी

विद्यापीठाच्या विविध शैक्षणिक विभागांचे संचालक व प्रमुख, संलग्न, संचलित व स्वायत्त महाविद्यालयांचे प्राचार्य, मान्यताप्राप्त संस्थांचे संचालक तसेच विद्यापीठाच्या विविध उपपरिसरांचे समन्वयक व संचालक यांनी ही सूचना सर्व परीक्षार्थी, शिक्षक आणि परीक्षा कर्मचाऱ्यांच्या निदर्शनास आणून देऊन तिची काटेकोर अंमलबजावणी करावी, असे आवाहन डॉ. पूजा रौंदळे यांनी केले आहे.

परीक्षा पारदर्शक पद्धतीने होणार

मुंबई विद्यापीठाने केंद्रीय स्तरावरील विविध परीक्षांच्या पार्श्वभूमीवर हा निर्णय घेतला असून, या निर्णयामुळे येत्या काळात पेपरफुटी आणि परीक्षेला उशिरा येणाऱ्या विद्यार्थ्यांना चाप लागणार आहे, तर दुसरीकडे या निर्णयामुळे विद्यापीठाला आपल्या सर्व परीक्षा पारदर्शक पद्धतीने घेण्याचा मार्गही उपलब्ध होणार आहे.