Nitesh Rane : मालेगाव 'मिनी पाकिस्तान' विधानावर नितेश राणे ठाम; म्हणाले, "माफी मागणार..."

वीज चोरीचा थेट अतिरेकी कारवायांशी संबंध जोडून नाशिकमधील मालेगावला भाजप आमदार नितेश राणे ( Nitesh Rane ) यांनी 'मिनी पाकिस्तान' म्हणून संबोधलं होतं. या वक्तव्यानंतर नितेश राणेंवर टीकेची झोड उठली आहे. तर, राष्ट्रवादी काँग्रेसचे माजी आमदार असिफ शेख रशीद यांनी वकीलामार्फत नोटीस पाठवून नितेश राणेंनी माफी मागावी, अशी मागणी केली होती. पण, आपल्या वक्तव्यावर ठाम असल्याचं नितेश राणेंनी म्हटलं आहे.

"मी मालेगावचा ( Malegaon ) उल्लेख पाकिस्तान केल्यानं अनेकांना मिरच्या झोंबल्या. मालेगावमध्ये राहून पाकिस्तानचे नारे देण्यात येतात. त्यामुळे मालेगावला आम्ही पाकिस्तान बोलत होतो, आजही बोलतो आणि पुढेही बोलत राहू," असं नितेश राणेंनी प्रसारमाध्यमांशी संवाद साधताना म्हटलं.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

"मालेगावला पाकिस्तान होण्यापासून वाचवण्याचा प्रयत्न करतोय"

"मालेगावला 'मिनी पाकिस्तान' म्हणण्याची वेळ का आली? याचा पुरावा मी दिला आहे. माजी आमदार असिफ शेख हे पाकिस्तानचे एजंट आहेत. आम्ही मालेगावला पाकिस्तान होण्यापासून वाचवण्याचा प्रयत्न करतो आहे. मी काही चुकीचं बोललो नसल्यानं माफी मागणार नाही. कायदेशीर उत्तर देईन," असं नितेश राणे म्हणाले.

नितेश राणेंचं विधान काय?

आमदार नितेश राणे यांनी काही दिवसांपूर्वी एका जाहीर सभेत मिनी पाकिस्तानमध्ये ( मालेगाव ) 319 कोटी रूपयांची वीज चोरी झाल्याचा आरोप केला. हा पैसा अतिरेकी कारवायांसाठी वापरला जातो, असा आरोपही राणेंनी केला होता.

माजी आमदार शेख काय म्हणाले?

'मिनी पाकिस्तान' उल्लेख केल्यानं माजी आमदार असिफ शेख रशी यांनी वकीलामार्फत नितेश राणेंना नोटीस पाठवली आहे. "याप्रकरणी माफी मागा, अन्यथा तुमच्याविरोधात फौजदारी स्वरूपाचा गुन्हा दाखल करू. मालेगाव फक्त मुस्लिमांचे नाही. येथे सर्व जाती धर्माचे लोक राहतात. वीज चोरीचा प्रकार संपूर्ण मालेगावमध्ये झाला. त्याची चौकशी सुरू आहे. मात्र, याचे कनेक्शन जोडून मालेगावला थेट मिनी पाकिस्तान कसे संबोधले गेले?" असा सवालही असिफ शेख यांनी उपस्थित केला.