nominated councillor Politics : उपनगराध्यक्षासह स्वीकृत नगरसेवकपदासाठी राजकीय हालचालींना वेग, चढाओढ अन् पक्षांची नावांबाबत गुप्तता

Chiplun News : चिपळूणच्या उपनगराध्यक्षपदासह तीन स्वीकृत नगरसेवकांच्या निवडीची प्रक्रिया सोमवारी (ता. १२) दुपारी २.३० वाजता इंदिरा गांधी सांस्कृतिक केंद्रात होणार आहे. शिवसेना (शिंदे), भाजप आणि ठाकरे शिवसेना यांना नियमानुसार प्रत्येकी एक स्वीकृत नगरसेवक देता येणार असल्याने या पदांसाठी इच्छुकांची भाऊगर्दी झाली आहे. नाराजी टाळण्यासाठी संबंधित पक्षांनी नावांबाबत गुप्तता पाळली आहे. मात्र सद्यःस्थितीत उपनगराध्यक्ष पदापेक्षा स्वीकृत नगरसेवकपदासाठी चढाओढ सुरू असल्याचे चित्र पाहायला मिळत आहे.

शिंदेंच्या शिवसेनेकडे नगराध्यक्ष पद असल्याने साहजिकच उपनगराध्यक्षपद भाजपकडे जाण्याची शक्यता आहे. भाजपच्या गटनेतेपदी शशिकांत मोदी यांची निवड झाल्याने महिला नगरसेविकांना या पदाची संधी मिळण्याची शक्यता आहे. यामध्ये रसिका देवळेकर यांचे नाव आघाडीवर आहे.

तसेच २८ नगरसेवकांच्या संख्येनुसार तीन स्वीकृत नगरसेवक निवडले जाणार आहेत. ९ जागा मिळवलेल्या शिवसेना (शिंदे गट), ७ जागा मिळवलेल्या भाजप आणि ५ जागा मिळवलेल्या ठाकरे शिवसेनेला प्रत्येकी एक स्वीकृत नगरसेवक देण्याचा मान मिळणार आहे. या पदांसाठी ९ जानेवारीला दुपारी २.३० वाजेपर्यंत जिल्हाधिकाऱ्यांकडे अर्ज सादर करावे लागणार आहेत.

१२ जानेवारीला नगराध्यक्ष उमेश सकपाळ यांच्या अध्यक्षतेखाली उपनगराध्यक्ष व स्वीकृत नगरसेवकांची निवड प्रक्रिया होणार आहे. उपनगराध्यक्षसाठी सकाळी ११ ते दुपारी १ या वेळेत इच्छुकांनी मुख्याधिकारी विशाल भोसले यांच्याकडे अर्ज सादर करायचे आहेत.

त्यानंतर नगराध्यक्ष सकपाळ अर्जांची छाननी करून वैध उमेदवारांची नावे जाहीर करतील. दुपारी १.४५ वाजेपर्यंत अर्ज मागे घेता येणार असून, २ वा. निवडणूक लढवणाऱ्या उमेदवारांची अंतिम नावे घोषित केली जातील.

ही नावे आहेत चर्चेत

शिंदे शिवसेनेकडून विकी लवेकर व पराभूत उमेदवार सुयोग चव्हाण यांची नावे आघाडीवर आहेत. भाजपकडून महेश दीक्षित, विनायक वरवडेकर, मंगेश ऊर्फ बाबू तांबे, आशीष खातू, उदय चितळे तसेच अल्प मतांनी पराभूत झालेल्या रूही खेडेकर, तर शिवसेना ठाकरे गटाकडून माजी नगरसेवक बाळा कदम व फैसल कास्कर यांची नावे चर्चेत आहेत.

FAQs :

1. चिपळूणमधील निवड प्रक्रिया कधी व कुठे होणार आहे?
→ सोमवारी (ता. १२) दुपारी २.३० वाजता इंदिरा गांधी सांस्कृतिक केंद्रात होणार आहे.

2. एकूण किती स्वीकृत नगरसेवकांची निवड होणार आहे?
→ एकूण तीन स्वीकृत नगरसेवकांची निवड होणार आहे.

3. कोणत्या पक्षांना स्वीकृत नगरसेवक देण्याची संधी आहे?
→ शिवसेना (शिंदे), भाजप आणि ठाकरे शिवसेना.

4. सध्या कोणत्या पदासाठी अधिक चढाओढ आहे?
→ उपनगराध्यक्षपदापेक्षा स्वीकृत नगरसेवकपदासाठी अधिक चढाओढ सुरू आहे.

5. पक्षांनी नावांबाबत गुप्तता का पाळली आहे?
→ पक्षांतर्गत नाराजी टाळण्यासाठी गुप्तता पाळण्यात येत आहे.