Raigad News: रायगडच्या राजकारणात राष्ट्रवादी काँग्रेस आणि शिवसेना यांच्यातील संघर्षाला नवे वळण मिळाले आहे. मंत्री अदिती तटकरे यांचा बालेकिल्ला मानल्या जाणाऱ्या श्रीवर्धनमध्ये राष्ट्रवादी काँग्रेसला मोठा राजकीय धक्का बसला आहे.
पक्षाचे माजी तालुकाध्यक्ष आणि उद्योजक दर्शन विचारे यांनी राष्ट्रवादीला सोडचिठ्ठी देण्याचा निर्णय घेतला आहे. ते आता मुख्यमंत्री एकनाथ शिंदे यांच्या शिवसेनेत प्रवेश करणार आहेत. या घडामोडीमुळे श्रीवर्धनमधील राजकीय समीकरणांची चर्चा सुरू झाली आहे.
दर्शन विचारे यांच्या पक्षप्रवेशासाठी शिवसेनेकडून जोरदार तयारी करण्यात आली आहे. मंत्री भरत गोगावले यांच्या प्रमुख उपस्थितीत हा प्रवेश सोहळा होणार आहे. यावेळी आमदार महेंद्र थोरवे आणि आमदार महेंद्र दळवी हेदेखील उपस्थित राहणार आहेत. या कार्यक्रमाच्या माध्यमातून शक्तिप्रदर्शन करत श्रीवर्धनमध्ये राष्ट्रवादी काँग्रेसला राजकीय आव्हान देण्याची रणनीती शिवसेनेने आखली आहे.
राष्ट्रवादी काँग्रेसमधून बाहेर पडताना दर्शन विचारे यांनी सुनील तटकरे यांच्यावर थेट निशाणा साधला आहे. रायगड जिल्ह्यात आता राष्ट्रवादी काँग्रेस नावाचा पक्ष उरलेला नाही, तर त्याचे रूपांतर 'तटकरे प्रायव्हेट लिमिटेड कंपनी'मध्ये झाले आहे, अशी बोचरी टीका त्यांनी केली. त्यांच्या या विधानामुळे जिल्ह्यातील राजकीय वर्तुळात नव्या चर्चेला सुरुवात झाली आहे.
वास्तविक, रायगड जिल्ह्यात महायुतीतील दोन प्रमुख घटक पक्ष असलेल्या राष्ट्रवादी काँग्रेस आणि शिंदे यांच्या शिवसेनेमध्ये स्थानिक पातळीवर सातत्याने संघर्ष पाहायला मिळत आहे. राष्ट्रवादीचे प्रदेशाध्यक्ष सुनील तटकरे आणि मंत्री भरत गोगावले यांच्यातील राजकीय मतभेद अनेकदा समोर आले आहेत. दोन्ही बाजूंचे नेते एकमेकांवर आरोप-प्रत्यारोप करण्याची संधी सोडत नसल्याचे चित्र आहे.
राज्यात सत्तेत दोन्ही पक्ष एकत्र असले, तरी रायगडमधील स्थानिक राजकारणात मात्र त्यांच्यातील समन्वयाचा अभाव वारंवार दिसून येतो. आता श्रीवर्धनमधील दर्शन विचारे यांच्या निर्णयामुळे या संघर्षाला आणखी धार मिळण्याची शक्यता आहे.
विचारे हे राष्ट्रवादीचे माजी तालुकाध्यक्ष असल्याने त्यांच्या पक्षांतराला विशेष राजकीय महत्त्व प्राप्त झाले आहे. त्यांच्या प्रवेशामुळे श्रीवर्धनमध्ये शिंदे गटाच्या शिवसेनेला संघटनात्मक बळ मिळू शकते. दुसरीकडे, तटकरे कुटुंबाचा प्रभाव असलेल्या मतदारसंघात राष्ट्रवादीसाठी ही घडामोड आव्हानात्मक मानली जात आहे. आगामी विधानसभा निवडणुकीच्या पार्श्वभूमीवर या पक्षांतराचे राजकीय परिणाम काय होणार, याकडे आता लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.