Maharashtra Politics : 'काँग्रेसच्या माजी मुख्यमंत्र्यांनाही संपवलं', शिवसेना नेत्याचे गंभीर आरोप, तटकरेंचाही पलटवार; म्हणाले, 'उत्तर देऊ'

Ratnagiri News : कोकणातील रायगड जिल्ह्यानंतर आता रत्नागिरी जिल्ह्यातही शिवसेना आणि राष्ट्रवादी काँग्रेसमधील संघर्ष तीव्र होऊ लागला आहे. माजी मंत्री आणि उपमुख्यमंत्री एकनाथ शिंदे यांच्या शिवसेनेचे नेते रामदास कदम यांनी राष्ट्रवादी काँग्रेसचे प्रदेशाध्यक्ष खासदार सुनील तटकरे यांच्यावर पुन्हा एकदा गंभीर आरोप केले आहेत. विशेष म्हणजे, कदम यांनी थेट दिवंगत उपमुख्यमंत्री अजित पवार यांच्या अपघाती मृत्यूचा उल्लेख करत या प्रकरणात सुनील तटकरे यांची चौकशी करण्याची मागणी केली आहे. त्यांच्या या वक्तव्यामुळे राज्याच्या राजकीय वर्तुळात मोठी खळबळ उडाली आहे.

यापूर्वीही रामदास कदम यांनी एका कार्यक्रमात सुनील तटकरे यांच्यावर टीका केली होती. त्यानंतर दोन्ही पक्षांमधील वादाची ठिणगी पडली होती. आता अजित पवारांच्या मृत्यूचा संदर्भ देत कदम यांनी पुन्हा एकदा तटकरेंना लक्ष्य केल्याने महायुतीमधील अंतर्गत मतभेद चव्हाट्यावर आले आहेत. अशातच कदम यांनी काँग्रेस नेते तथा माजी मुख्यमंत्री बॅरिस्टर अब्दुल रहमान अंतुले यांचाही उल्लेख केला आहे. ज्यानंतर अनेकांच्या भुवया उंचावल्या आहेत.

तटकरेंची चौकशी करा; रामदास कदमांची मागणी

रामदास कदम यांनी सुनील तटकरे यांच्या राजकीय महत्त्वाकांक्षेवर प्रश्न उपस्थित केले आहेत. तटकरे यांना उपमुख्यमंत्री व्हायचे होते, असे आपण ऐकले असल्याचा दावा करत त्यांच्या महत्त्वाकांक्षा राक्षसी असल्याची टीका कदम यांनी केली. तसेच, 'तटकरे हे कोणाचेही होऊ शकत नाहीत. ते बेईमान माणूस आहेत,' अशा शब्दांत त्यांनी तटकरेंवर निशाणा साधला. याशिवाय, अजित पवार यांच्या अपघाती मृत्यूमागे काही घातपात होता का आणि त्यामध्ये सुनील तटकरे यांचा काही संबंध आहे का, या दिशेनेही तपास व्हावा, अशी मागणी त्यांनी केली. मात्र, कदम यांनी केलेल्या या आरोपांना पुष्टी देणारे कोणतेही पुरावे सार्वजनिक झालेले नाहीत.

अंतुलेंची राजकीय कारकीर्द संपवल्याचाही आरोप

रामदास कदम यांनी सुनील तटकरे यांच्यावर टीका करताना काँग्रेसचे ज्येष्ठ नेते आणि माजी मुख्यमंत्री बॅरिस्टर अब्दुल रहमान अंतुले यांचाही उल्लेख केला. तटकरे हे एकेकाळी अंतुले यांचे पीए होते आणि त्यांनीच अंतुले यांची राजकीय कारकीर्द संपवली, असा आरोप कदम यांनी केला. 'तटकरे हे अंतुले साहेबांचे पीए होते. अंतुले साहेबांना यानेच संपवलं. जो जो माणूस तटकरेंना जवळ करतो, त्यालाच संपवण्याचं काम ते करतात. त्यांना स्वतःला उपमुख्यमंत्री व्हायचं होतं, असं मी ऐकतोय. मग अजितदादांच्या घातपातामागे यांचाही हात होता का? या दिशेने तपास करावा. त्यांची राक्षसी महत्त्वाकांक्षा असून ती पूर्ण करण्यासाठी ते काहीही करू शकतात,' असे वक्तव्य रामदास कदम यांनी केले.

तटकरेंचा पलटवार; पत्रकार परिषद घेऊन उत्तर देणार

दरम्यान, रामदास कदम यांनी केलेले सर्व आरोप सुनील तटकरे यांनी फेटाळून लावले आहेत. आपल्यावरील आरोप खोटे आणि निराधार असल्याचे त्यांनी स्पष्ट केले आहे. तसेच, याबाबत आपण पत्रकार परिषद घेऊन सविस्तर उत्तर देणार असल्याचा इशाराही तटकरे यांनी दिला आहे.

राष्ट्रवादीकडून रामदास कदमांना प्रत्युत्तर

रामदास कदम यांच्या आरोपांनंतर राष्ट्रवादी काँग्रेसकडूनही जोरदार पलटवार करण्यात आला आहे. राष्ट्रवादीचे प्रवक्ते उमेश पाटील यांनी या वादावर प्रतिक्रिया देताना, रामदास कदम यांनी यापूर्वीही तटकरे यांच्यावर आरोप केले असल्याचे सांगितले. सुनील तटकरे गेल्या 40 वर्षांपासून कोकणात राजकीय आणि सामाजिक क्षेत्रात काम करत आहेत. शिवसेनेच्या विरोधात राष्ट्रवादी काँग्रेस पक्ष रुजवण्याचे काम त्यांनी केले आहे. त्यामुळे या वादाकडे स्थानिक पातळीवरील राजकीय संघर्ष म्हणून पाहिले पाहिजे, असे उमेश पाटील यांनी म्हटले.

विजय वडेट्टीवारांचीही वादात उडी

महायुतीमधील दोन नेत्यांमध्ये आरोप-प्रत्यारोप सुरू असतानाच काँग्रेस नेते विजय वडेट्टीवार यांनीही या वादात उडी घेतली आहे. रामदास कदम यांनी सुनील तटकरे यांच्यावर गंभीर आरोप केले असतील, तर त्या आरोपांच्या पार्श्वभूमीवर रामदास कदम यांचीही चौकशी झाली पाहिजे, अशी मागणी वडेट्टीवार यांनी केली आहे.

तटकरेंच्या मेव्हण्याचाही रामदास कदमांना इशारा

दरम्यान, रामदास कदम यांनी केलेल्या टीकेचे पडसाद आता तटकरे कुटुंबीयांमध्येही उमटू लागले आहेत. सुनील तटकरे यांचे मेव्हणे आणि जिल्हा परिषद सदस्य अजय बिरवटकर यांनी सोशल मीडियावर पोस्ट करत रामदास कदम यांना अप्रत्यक्षपणे प्रत्युत्तर दिले आहे. खेड तालुक्यातील पोयनार धरणाच्या भूमिपूजन कार्यक्रमात खुर्चीवरून वादाचे नाट्य रंगले होते. त्यानंतर अजय बिरवटकर यांनी सोशल मीडियावर पोस्ट करत, 'उतरती कळा लागली की माणसाची अशीच आगपाखड सुरू होते,' अशी टीका केली. तसेच, 'आभाळ गाठण्याची जिद्द असली तरी पाय जमिनीवर राहतील. पण स्वाभिमानाला ठेच लागली तर बाजार उठवला जाईल,' अशा शब्दांत त्यांनी इशाराही दिला.

एकूणच, रायगडनंतर रत्नागिरीतही शिवसेना आणि राष्ट्रवादी काँग्रेसमधील संघर्ष चिघळताना दिसत आहे. रामदास कदम यांचे गंभीर आरोप, सुनील तटकरे यांचा पलटवार, राष्ट्रवादीची भूमिका आणि आता तटकरे यांच्या नातेवाइकांकडून देण्यात आलेला इशारा, यामुळे कोकणातील राजकीय वातावरण चांगलेच तापले आहे. आगामी काळात हा वाद आणखी कोणते वळण घेतो, याकडे राजकीय वर्तुळाचे लक्ष लागले आहे.