Mahadev Munde Murder Case : महादेव मुंडे प्रकरणात वाल्मिक कराडची दोन्ही मुलं अडचणीत? पोलिसांनी तब्बल 17 तास...

Mahadev Munde Murder : परळीतीली व्यापारी महादेव मुंडे हत्या प्रकरणात मोठी अपडेट समोर येत आहे. मुंडे यांच्या हत्या प्रकरणात वाल्मिक कराड हा मुख्यसुत्रधार असल्याचा आरोप बाळा बांगर याने केला होता. तसेच त्याची दोन मुलं देखील या हत्येत सहभागी असल्याचे आमदार सुरेश धस यांनी म्हटले होते. मुख्यमंत्री देवेंद्र फडणवीस यांनी मुंडेंच्या हत्या प्रकरणात एसआयटीची स्थापना केल्याच्या अवघ्या काही तासांतच परळीतून पाच जणांना ताब्यात घेण्यात आले होते.

ज्या पाच जणांना ताब्यात घेत चौकशी करण्यात आली होती. त्यामध्ये वाल्मिक कराडची दोन्ही मुंल श्रीगणेश आणि सुशील या दोघांचा समावेश होता. पोलिसांनी या दोघांची तब्बल 17 तास कसून चौकशी केल्याची माहिती आहे. महादेव मुंडे हत्या प्रकरणात फरार आरोपी गोट्या गित्ते याच्यासह या दोघांचा सहभाग असल्याचा आरोप करण्यात येत आहे.

महादेव मुंडे यांच्या नावावर असलेला प्लाॅट आपल्या नावावर करण्यासाठी त्यांची हत्या करण्यात आली होती. या प्रकरणी पोलिस तपास करत असताना धनंजय मुंडे यांच्या बंगल्यावरून पोलिसांनी तपास थांबवावा म्हणून फोन करण्यात आला होता. हा फोन वाल्मिक कराड याने केला होता, असा दावा बाळा बांगर याने केला होता. त्यामुळे महादेव मुंडे हत्या प्रकरणात वाल्मिक कराड हा मुख्यसुत्रधार असल्याचा संशय देखील व्यक्त करण्यात येत होता.

एसआयटीच्या प्रमुखपदी पंकज कुमावत

महादेव मुंडे हत्या प्रकरणात चौकशी करण्यासाठी मुख्यमंत्री देवेंद्र फडणवीस यांनी महादेव मुंडे यांच्या पत्नी ज्ञानेश्वरी यांच्या मागणीनुसार एसआयटीची स्थापना केली आहे. या एसआयटीच्या प्रमुखपदी आयपीएस पंकज कुमावत यांची नियुक्ती करण्यात आली आहे. लवकरच एसआयटीची समिती चौकशीसाठी परळीमध्ये दाखल होणार असल्याची माहिती आहे. दरम्यान, या हत्या प्रकरणातील संशयीत आरोपी गोट्या गित्ते याचा शोध स्थानिक गुन्हे शाखेकडून घेण्यात येत आहे.