Mahadev Munde Murder Case : महादेव मुंडेंच्या हत्या प्रकरणातील मुख्य आरोपी देश सोडण्याच्या तयारीत; शरद पवारांच्या शिलेदाराच्या दाव्याने खळबळ

Mahadev Munde Case : परळीतील व्यापारी महादेव मुंडे यांच्या हत्या प्रकरणील तपासासाठी राज्य सरकारने एसआयटीची स्थापना केली आहे. स्थानिक गुन्हे शाखेच्या दोन पथकाकडून आरोपींचा शोध घेण्यात येत आहे. महादेव मुंडे यांच्या पत्नीने मुख्यमंत्री देवेंद्र फडणवीस यांची भेट घेत न्याय देण्याची मागणी केली होती. आता या प्रकरणात राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी महादेव मुंडे खून प्रकरणातील संशयीत मुख्य आरोपी देश सोडून पळून जाण्याच्या तयारीत असल्याचा दावा केला आहे.

रोहित पवार यांनी म्हटले आहे की, "महादेव मुंडे हत्या प्रकरणात मुंडे कुटुंबियांना ज्या आरोपीवर मुख्य संशय आहे, तो आरोपी देश सोडून जाण्याच्या प्रयत्नात असल्याची माहिती कळत असून पोलिसयंत्रणांनी यासंबंधित खातरजमा करून त्वरित कारवाई करणे गरजेचे आहे."

'आज उद्या पोलिसांनी या आरोपीच्या मुसक्या आवळल्या नाही तर आरोपी पसार होण्याची शक्यता आहे. मुंडे कुटुंबाला मुख्यमंत्री साहेबांनी दिलेल्या आश्वासनानुसार एसआयटीमध्ये पोलीस अधिकारी संतोष साबळे यांचा अद्यापही समावेश झालेला नाही, तपासाला गती देण्यासाठी त्यांचा एसआयटीमध्ये त्वरित समावेश करावा', अशी विनंती देखील रोहित पवार यांनी केली आहे.

गोट्या गित्तेचा पोलिसांकडून शोध

महादेव मुंडे हत्या प्रकरणात रोहित पवारांनी संशयीत मुख्य आरोपी म्हटले असले तरी आरोपीचे नाव घेतलेले नाही. मात्र, मुंडे हत्या प्रकरणात गोट्या गित्ते हा आरोपी असल्याचा तसेच वाल्मिक कराड यांच्या दोन मुलांचा देखील या हत्येत सहभाग असल्याचा आरोप होत आहे. गोट्या गित्तेच्या शोधासाठी पोलिसांनी पथके रवाना केली आहेत. त्यातच गोट्य गित्तेने व्हिडिओ प्रसारित करून आपल्यावर खोटे आरोप करण्यात येत असल्याचे म्हणत आत्महत्यची धमकी दिली आहे.

एसआयटीचे प्रमुख पंकज कुमावत

महादेव मुंडे यांच्या पत्नी ज्ञानेश्वरी मुंडे यांनी मुख्यमंत्री देवेंद्र फडणवीस यांची भेट घेत पोलिस अधिकारी पंकज कुमावत आणि संतोष साबळे यांचा समावेश असलेल्या एसआयटीची स्थापना करण्याची विनंती केली होती. त्यानुसार एसआयटीची स्थापना केली असून पंकज कुमावत हे या एसआयटीचे अध्यक्ष असतील. दरम्यान, संतोष साबळे यांचा या एसआयटीमध्ये समावेश करण्यात आलेला नाही.