Drought Survey : दुष्काळाच्या पंचनाम्यासाठी तीन सदस्यीय समितीची स्थापना; कशी असणार कार्यपद्धती? वाचा सविस्तर

Amravati News, 27 Sep : महाराष्ट्रातील 265 तालुक्यांमध्ये दुष्काळ जाहीर झाल्यानंतर जिल्हा प्रशासनाकडून आता प्रत्यक्ष पीक नुकसानीच्या पंचनाम्यांना सुरुवात होणार आहे. अमरावती जिल्ह्यातील आठही तालुक्यांमध्ये दुष्काळ जाहीर झाला असून इथले पंचनामे करण्याचे आदेश जिल्हाधिकारी कार्यालयाकडून देण्यात आले आहेत. त्यासाठी गावपातळीवर तीन सदस्यीय समितीची स्थापना करण्यात आली आहे. या समितीकडून शेतातील पिकांची पाहणी करून नुकसानीचे प्रमाण निश्चित केले जाणार आहे.

पंचनाम्यासाठी तीन सदस्यांची समिती

दुष्काळग्रस्त भागातील पिकांच्या नुकसानीचे पंचनामे करण्यासाठी तलाठी, कृषी सहायक आणि ग्रामसेवक यांचा समावेश असलेली तीन सदस्यीय समिती नियुक्त करण्यात आली आहे. ही समिती गावपातळीवर जाऊन प्रत्यक्ष शेतांची पाहणी करणार आहे.

पिकांची सद्यस्थिती, झालेली हानी आणि नुकसानीचे प्रमाण याची नोंद समितीकडून करण्यात येणार आहे. त्यामुळे दुष्काळाच्या पार्श्वभूमीवर शेतकऱ्यांच्या पिकांचे प्रत्यक्ष नुकसान किती झाले आहे, याचा प्रशासनाला अंदाज येणार आहे.

प्रत्येक गावातील पाच प्लॉटची पाहणी

पंचनाम्याच्या प्रक्रियेत प्रत्येक गावातील पाच प्लॉटमधील पिकांच्या नुकसानीची पाहणी करण्यात येणार आहे. या पाच प्लॉटमधील नुकसानीचे प्रमाण नोंदवून त्याची सरासरी काढली जाईल. या सरासरीच्या आधारे संबंधित भागातील पिकांच्या नुकसानीचे प्रमाण निश्चित करण्यात येणार आहे. त्यामुळे केवळ अंदाजाच्या आधारे नव्हे, तर प्रत्यक्ष पाहणी आणि नोंदीनुसार नुकसानीची स्थिती निश्चित करण्याचा प्रयत्न प्रशासनाकडून केला जाणार आहे.

50 टक्के नुकसान झाल्यास ‘तीव्र’ श्रेणी

पिकांचे 50 टक्के नुकसान झाल्यास ते तीव्र नुकसानीच्या श्रेणीत मोजले जाणार असल्याचे प्रशासनाकडून सांगण्यात आले आहे. अमरावती जिल्ह्यातील सध्याची पीक परिस्थिती पाहता अनेक भागांत 50 टक्के किंवा त्यापेक्षा अधिक नुकसान होण्याची शक्यता व्यक्त केली जात आहे. मात्र, अंतिम नुकसान किती आहे, हे पंचनाम्याची प्रक्रिया पूर्ण झाल्यानंतरच स्पष्ट होणार आहे. त्यामुळे पंचनाम्याच्या अहवालाकडे आता शेतकरी आणि प्रशासनाचे लक्ष लागले आहे.