Maharashtra Live Update : वाढत्या महागाईमुळे मुंबईसह राज्यभरात अन्नधान्य, कडधाने, डाळी, साखर, खाद्यतेलांमध्ये मोठी दरवाढ

धाराशिव जिल्ह्यातील दावलमलिकवाडी (ता. उमरगा) येथे शस्त्राने वार करून भारत गजेंद्र कवठे (वय 47) यांचा खून केल्याची घटना मंगळवारी (ता. 20) रात्री घडली. शेतीच्या वादातून ही घटना घडल्याचा संशय व्यक्त होत आहे. मिळालेल्या माहितीनुसार भारत गजेंद्र कवठे यांचा त्यांच्या घरामागे मृतदेह आढळला. भारत कवठे यांच्या पत्नी सखुबाई यांनी येथील पोलिसांत दिलेल्या तक्रारीनुसार संशयिताविरुद्ध गुन्हा दाखल झाला आहे.

वैद्यकीय तपासणीसाठी पोलिसांनी प्राथमिक आरोग्य केंद्रात आणलेल्या एका व्यक्तीने महिला डॉक्टर डॉ. श्रद्धा भुमरे यांच्या कानशिलात लगावल्याची घटना वर्धा जिल्ह्यातील आष्टी तालुक्यात घडली. या घटनेच्या निषेधार्थ सरकारी डॉक्टरांनी आंदोलन केले. तळेगाव शामजीपंत येथील प्राथमिक आरोग्य केंद्रात बुधवारी (ता. 21 ऑक्टोबर) ही घटना घडली. कादीर अली रज्जाक अली याला एका घटनेत दुखापत झाली होती. तपासणीसाठी पाच पोलिस कर्मचारी त्याला आरोग्य केंद्रात घेऊन आले होते. तपासणी सुरू असताना अलीने हा हल्ला केला. त्यावेळी पोलिस पथक उपस्थित असल्याची माहिती तळेगाव पोलिस ठाण्याचे प्रभारी मंगेश भोयर यांनी दिली.

सोलापूर जिल्ह्यातील चिखलठाण उजनी धरण परिसरात प्रस्तावित एआय डेटा सेंटर, सौर ऊर्जा, ग्रीन हायड्रोजन, न्यूक्लियर पॉवर आणि बॅटरी प्रकल्पांना विरोध करण्यासाठी करमाळा तालुक्यातील शेतकरी आक्रमक झाले आहेत. या प्रकल्पांविरोधात 31 ऑक्टोबरला हिंगणगाव येथील पुलावर तीव्र आंदोलन करण्याचा निर्धार शेतकऱ्यांनी केला आहे. या आंदोलनाच्या नियोजनासाठी गुरुवारी (ता. 22) कुंभेज फाटा येथे शेतकऱ्यांची विशेष बैठक पार पडली.