Legislative Council Election : देवेंद्र फडणवीसांचे धक्कातंत्र, मोहिते पाटील, केचेंचा पत्ता कट? विधान परिषदसाठी 'या' नेत्यांची नावे चर्चेत!

Devendra Fadnavis News : विधान परिषदेसाठी भाजपकडून उमेदवारांची चाचपणी सुरु करण्यात आली आहे. नव्या चेहऱ्यांना संधी देण्याची रणनीती मुख्यमंत्री देवेंद्र फडणवीस यांची असून रणजितसिंह मोहिते पाटील यांना पुन्हा संधी मिळणार नसल्याची भाजपच्या अंतर्गत वर्तुळात चर्चा आहे. त्यामुळे उमेदवारीतून मोहित पाटील यांचा पत्ता कट झाल्याचे बोलले जात आहे.

विधान परिषद निवडणुकीत भाजपचे पाच उमेदवार सहज विजयी होऊ शकतात. त्यामुळे विधान परिषदेतून नुकतेच निवृत्त झालेले भाजपचे सदस्य रणजितसिंह मोहिते पाटील, दादाराव केचे यांना पुन्हा उमेदवारी मिळणार नसल्याचे संकेत पक्षातून दिले जात आहेत. तर, निवृत्त झालेल्या सदस्यांपैकी संदीप जोशी यांनी आपण निवडणूक लढणार नसल्याची घोषणा यापूर्वीच केली आहे.

नवीन चेहऱ्यांना संधी असे धोरण पक्षाकडून ठरवले जात असताना मात्र संभाजीनगरचे संजय केनेकर यांच्यावर मात्र पुन्हा विश्वास व्यक्त केला जाण्याची शक्यता आहे. त्यांना पक्षाकडून पुन्हा उमेदवारी मिळेल, असे चित्र आहे. दरम्यान, एका महिला नेत्याला देखील विधान परिषदेवर पक्षाकडून संधी मिळणार आहे.

'या' नेत्यांची नावे चर्चेत

भाजपअंतर्गत उमेदवारी मिळण्यासाठी नेत्यांकडून मोर्चे बांधणी सुरु करण्यात आली आहे. भाजपच्या रणनीतीकारांपुढे जातीय आणि प्रादेशिक समतोल राखत उमेदवारी निश्चित करण्याचे आवाहन असणार आहे. दरम्यान, माजी आमदार राम सातपुते, रणजीत सिंह निंबाळकर, केशव उपाध्ये, माधवी नाईक यांची नावे उमेदवारीसाठी चर्चेत आहेत. भाजप यांना संधी देणार की राज्यसभेप्रमाणे धक्कातंत्र अवलंबणार यावर देखील राजकीय वर्तुळात चर्चा आहे.