शिवसेनाप्रमुख बाळासाहेब ठाकरे यांचं जन्मशताब्दी वर्ष सुरू आहे. याच धर्तीवर माजी मुख्यमंत्री उद्धव ठाकरे यांच्या शिवसेनेकडून तज्ज्ञ लोकांमार्फत गरजू आणि कुशल युवकांना नोकरीची संधी उपलब्ध करून देण्याचा उपक्रम राबवला जात आहे. तसेच इच्छुक युवकांना कौशल्य प्रशिक्षण देण्याचं काम शिवसेना भवनातून सुरू असल्याचं नमूद केलं आहे. 30 जणांचा प्रशिक्षण वर्ग घेतला जात आहे. प्रशिक्षणार्थी विद्यार्थ्यांना या उपक्रमाद्वारे सर्टिफिकेट मिळाल्यावर नोकरी मिळणार आहे.
शिवसेना उद्धव ठाकरे पक्षाचे खासदार संजय राऊत यांचं तुरुंगातील अनुभवावर आधारित 'नरकातला स्वर्ग' हे पुस्तक राजकीय वर्तुळात मोठा चर्चेचा विषय ठरले होते. याच पुस्तकात त्यांनी राज्यसभा खासदार आणि विशेष सरकारी वकील उज्ज्वल निकम यांच्याबाबत धक्कादायक विधान केलं आहे. या पुस्तकात राऊत यांनी विशेष सरकारी वकील उज्ज्वल निकम यांनी मुंबई हल्ल्यातील दहशतवादी अजमल कसाबच्या बिर्याणीमुळेच खासदारकी मिळाल्याचा उल्लेख केला आहे. यामुळे पुन्हा एकदा राजकारण तापण्याची शक्यता आहे.
धाराशिव येथील एका खासगी कार्यक्रमात कालीचरण महाराज यांनी नाशिकमधील भोंदूबाबा अशोक खरात प्रकरणावर तीव्र शब्दांत प्रतिक्रिया दिली आहे. यात आता कालीचरण महाराजांनी अशोक खरातसारख्या भोंदूबाबांना भर चौकात गोळ्या घातल्या पाहिजेत असं वादग्रस्त वक्तव्य केलं आहे.
मुंबई काँग्रेस अध्यक्ष खासदार वर्षा गायकवाड यांनी बलात्कारी भोंदूबाबा अशोक खरात प्रकरणी राज्य महिला आयोगाच्या अध्यक्ष रुपाली चाकणकर यांचा राजीनामा घेऊन हे प्रकरण संपणार नसल्याचं म्हटलं आहे. तसेच त्यांनी खरात प्रकरणात ज्या काही मंत्री व अधिकाऱ्यांची नावे समोर आली, त्या विकृताला वाचवण्यासाठी ज्या कोणी प्रयत्न केले, त्या सर्वांची सखोल चौकशी करून कठोर कारवाई झाली पाहिजे, अशी मागणीही गायकवाड यांनी मुख्यमंत्र्यांकडे केली आहे.
करुणा शर्मा यांना कोर्टानं नोटीस पाठवली आहे. मेंटेनेंसचे 17 लाख रुपये थकवल्याबद्दल नोटीस मिळाल्याची माहिती मिळत आहे. तसेच राहत असलेल्या घराचा हफ्ता थकवला म्हणून बँकेने देखील नोटीस बजावली आहे. करुणा मुंडे सध्या 64 ग्रीन्स नावाच्या इमारतीत सांताक्रुझ येथे वास्तव्यास आहेत. प्रसार माध्यमाशी बोलताना त्यांनी ही नोटीस आल्याची माहिती दिली आहे. मी आज मंत्र्यांची बायको आहे, तरी आम्हाला कोर्टाने नोटीस दिली आहे.
भोंदू अशोक खरात याच्यासोबतचे उच्च व तंत्र शिक्षणमंत्री चंद्रकांत पाटील यांचे दोन फोटो व्हायरल झाले आहेत. त्यांच्या पाच-दहा वर्षांच्या काळात पुण्याला काळिमा फासण्याचे काम झालेले आहे. अशोक खरातसोबतचे संबंध चंद्रकांत पाटील यांनी जाहीर करावेत, अशी मागणी माजी आमदार रवींद्र धंगेकर यांनी केली आहे.
अशोक खरात याला अटक करण्याच्या तीन दिवस अगोदर त्याच्यासोबत तीन आयएएस अधिकाऱ्यांची बैठक झाल्याची माहिती पुढे येत आहे. शिर्डीतील एका हॉटेलमध्ये खरात आणि अधिकाऱ्यांची ही बैठक झाल्याचे सांगण्यात येते. विनोद नावाच्या व्यक्तीने ही बैठक घडवून आणल्याचे सांगितले जात आहे. आता ते आएएस अधिकारी कोण आहेत आणि त्यांची चौकशी होणार का, असा सवाल उपस्थित होत आहे.
पंतप्रधान नरेंद्र मोदी यांनी इराणचे राष्ट्रपती पेझेश्कियान यांच्याशी फोनद्वारे संवाद साधला आहे. पंतप्रधान मोदी यांनी इराणच्या राष्ट्रपतींना रमजान ईदच्या शुभेच्छा दिल्या आहेत. इराणमधील पायाभूत सुविधांवर होत असलेल्या हल्ल्याचा पंतप्रधान मोदींनी तीव्र शब्दांत निषेध केला आहे.
अशोक खरात अत्याचारप्रकरणी माजी मंत्री दीपक केसरकर यांचे निकटवर्तीय दीपक लोंढे यांची एसआयटीच्या माध्यमातून चौकशी करण्यात येत आहे. खरात आणि लोंढे यांचे व्यावसायिक संबंध असल्याचे स्पष्ट होत आहे. लोंढे हे सिन्नरमध्ये जमीन खरेदी विक्रीचा व्यवसाय करतात. खरात याच्या दृष्कृत्याचा निषेध मी करतो. त्यासंदर्भात चौकशीचा निर्णय न्यायालय घेईल, असे माजी मंत्री केसरकर यांनी सांगितले.
कामेश कांबळे या सदस्याला कोणीही जबरदस्ती केली नाही, तिथले व्हिडिओ रेकॉर्डिंग तपासून पहा...कामेश कांबळे हा शिवेंद्रराजांचा प्रेमातला कार्यकर्ता आहे, शिवेंद्रराजांनी केवळ त्याच्याशी चर्चा केली...शशिकांत शिंदे यांच्या सदस्यांना कैदी आणतात त्या पद्धतीने धरून आणत होते त्यांना त्यांच्या सदस्यांवर विश्वास नव्हता. मी कोणतीही पक्षविरोधी कारवाई केली नाही. उद्धव ठाकरे यांचं जे सरकार आणि पाडलं त्यासाठीच पडलं होतं की आमचं प्रीपोल अलायन्स भाजपबरोबर होता. याच पद्धतीने कोरेगाव मध्ये सुद्धा आमचा प्रीपोल अलायन्स भाजप बरोबर होता मग आम्ही महाविकास आघाडी बरोबर कसं जाणार, असा सवाल महेश शिंदे यांनी केला.
गॅस सिलेंडरच्या तुटवड्यामुळे पुणे-नाशिक महामार्गावर नागरिकांचा संयम सुटलाय. चाकण परिसरात नागरिकांनी महामार्ग रोखून प्रशासनाविरोधात जोरदार घोषणाबाजी केली. रास्तारोको आंदोलनामुळे महामार्गावर वाहनांच्या लांबच लांब रांगा लागल्या आहेत.
रुपाली चाकणकरांच्या राजीनाम्यानंतर उपमुख्यमंत्री सुनेत्रा पवारांनी पहिली प्रतिक्रिया दिलीय. त्यांनी ट्विट करून सांगितलं की, महाराष्ट्र राज्य महिला आयोगाच्या अध्यक्षा श्रीमती रुपाली चाकणकर यांचा राजीनामा मला प्राप्त झाला आहे. सद्य परिस्थिती आणि सुरू असलेल्या चौकशीच्या पार्श्वभूमीवर त्यांनी पदाचा त्याग करण्याचा निर्णय घेतला आहे. ही चौकशी निष्पक्ष आणि पारदर्शक होण्याच्या दृष्टीकोनातून मी त्यांचा राजीनामा पुढील कार्यवाहीसाठी माननीय मुख्यमंत्री यांच्याकडे पाठवत आहे.
अशोक खरात प्रकरणावरून ठाकरेसेनेचे खासदार संजय राऊत यांनी शिक्षणमंत्री असताना दीपक केसरकरांच्या खात्यात भोंदूबाबा हस्तक्षेप करत होता, असा जोरदार आरोप केला आहे. राऊत म्हणतात की या प्रकरणामुळे संबंधित अधिकाऱ्यांवर कारवाई होणे आवश्यक आहे आणि शिंदेंनी केसरकरांची हकालपट्टी करावी.
रुपाली चाकणकर यांच्या कथनी आणि करणीत फरक होता, असा घणाघात सुषमा अंधारे यांनी केला. 'एकीकडे जाहीर कार्यक्रमात 'मुलींच्या हातात पोथ्या-पुराणं नको, संविधान द्या' म्हणायचं आणि वास्तवात कोणाचेतरी पाय धुवायचे. रिल्ससाठी नवऱ्याने तुमची पूजा करायची आणि वास्तवात तुम्ही मात्र लिंगपासाटाची पूजा करायची. सुनील तटकरेंचा हात डोक्यावर आहे, तोपर्यंत आपल्या केसाला धक्का लागू शकत नाही. पण काल मुख्यमंत्री देवेंद्र फडणवीस यांनी त्यांच्यावर कारवाईचा बडगा उगारला. यानंतरी रुपाली चाकणकर यांचे 'गिरे तो भी टांग उपर',' अशाप्रकारचे वर्तन सुरु आहे, असे सुषमा अंधारे यांनी म्हटले.
रुपाली चाकणकर यांच्यावर पुन्हा एकदा शिवसेना उद्धव बाळासाहेब ठाकरे सेना पक्षाच्या उपनेत्या सुषमा अंधारे यांनी जोरदार हल्ला चढवला. 'आतातरी झोपेतून जागे व्हावे, शुद्धीव व्हावे. भविष्यात अजून अजून जमिनीवर येणार आहात. अशोक खरात प्रकरणात रुपाली चाकणकर यांचा फक्त राजीनामा घेऊन चालणार नाही. त्यांना महिलांच्या लैंगिक शोषण प्रकरणात सहआरोपी करुन अटक केली पाहिजे. रुपाली चाकणकर या अशोक खरातकडून चालवल्या जाणाऱ्या संघटित गुन्हेगारीचा भाग होत्या. त्यांच्यावर मकोका लागला पाहिजे,' अशी मागणी सुषमा अंधारे यांनी केली.
रेमंड समूहाचे अध्यक्ष आणि प्रसिद्ध उद्योगपती गौतम सिंघानिया मालदीवमध्ये एका भीषण स्पीडबोट अपघातात जखमी झाले आहेत. हा अपघात शुक्रवारी पहाटे 1:15च्या सुमारास मालदीवमधील 'व्ही फेलिधू' बेटाजवळ घडला. सिंघानिया यांना तातडीने रेस्क्यू करून उपचारांसाठी मुंबईत एअरलिफ्ट करण्यात आले आहे.
उत्तर प्रदेशातील गाझियाबाद जिल्ह्यातील पोलिसांनी सात राज्यांमध्ये दहशतवादी हल्ले करण्याचा कट उधळून लावला आहे. दहशतवादी टोळीच्या नऊ सदस्यांना अटक करण्यात आली असून, त्यात पाच अल्पवयीन मुलांचा समावेश आहे. आतापर्यंत या टोळीच्या 15 सदस्यांना अटक करण्यात आली आहे. अटक केलेल्या सहा हेरांनी दिलेल्या माहितीच्या आधारे उर्वरित नऊ जणांना अटक करण्यात आली. ही टोळी भारतात पाकिस्तानची गुप्तचर संस्था आयएसआयसाठी काम करत असल्याचं चौकशीदरम्यान उघड झालं.
एकनाथ शिंदे शिवसेनेचे माजी मंत्री दीपक केसरकर यांनी भोंदूबाबा अशोक खरातवर प्रतिक्रिया दिली आहे. ते म्हणाले, "माझा या घटनेशी काही संबंध नाही. खरात वैयक्तिक आयुष्यात काय करतो, याच्याही माझा काहीच संबंध नाही. ज्योतिषाकडे सर्वजण जातात. पण त्याने काय केलं आहे हे मला माहीत नाही. पण त्याने काही केलं असेल तर त्याच्या वैयक्तिक आयुष्याशी माझा काही संबंध नाही."
होर्मुज सामुद्रधुनी व तेलनिर्यातीचे महत्त्वाचे खार्ग बेट ताब्यात घेण्यास अमेरिकेची ‘यूएसएस त्रिपोली’ ही तिसरी युद्धनौका रवाना होत आहे. या नौकेवर 2200 प्रशिक्षित सैनिक आहेत. ‘यूएसएस बॉक्सर’ ही नौकाही तैनात होत आहे. या रणनीतीनुसार जगाच्या 20 टक्के तेलपुरवठा साखळीवर अमेरिकेला नियंत्रण ठेवणे शक्य होणार आहे.
रुपाली चाकणकर यांचा राजीनामा स्वीकारताना, जे दिसलं त्यावर अंजली दमानिया यांनी तिखट प्रतिक्रिया दिली. सुनेत्रा पवारांचा चेहरा गंभीर होता. पण रुपाली चाकणकर या, तर जसं मॉडेलिंगसाठी उभं राहतात, तशी पोझ देतानाचा फोटो होता. आणि त्यानंतरचं त्यांचं बोलणं ऐकलं तर, त्यात कुठेही खेद, विनम्रता नव्हती , एक अहंकार होता. हे सगळं पाहून वाटतं की चाकणकरांना खरंच इंट्रोस्पेक्शन करण्याची गरज आहे, अशा शब्दांच दमानिया यांनी रुपाली चाकणकरांवर टीकास्त्र सोडलं.
मुंबईत कार्यरत असलेले एक उपजिल्हाधिकारी भोंदूबाबा अशोक खरातला आर्थिक रसद पुरवत असल्याचा सामाजिक कार्यकर्त्या अंजली दमानिया यांनी म्हटले असून, यामुळे या प्रकरणाचे धागेदोरे थेट प्रशासकीय यंत्रणेपर्यंत पोहोचले आहेत. इतरांच्या भविष्याची कुंडली मांडणाऱ्या या भोंदूची स्वतःची काळी कुंडली आता नाशिक पोलिसांच्या हाती लागली आहे. या प्रकरणाच्या सखोल तपासासाठी राज्य सरकारने तातडीने 'एसआयटी'ची स्थापना केली आहे.
दिवंगत उपमुख्यमंत्री अजित पवार यांच्या विमान अपघाताशी भोंदूबाबा कॅप्टन अशोक खरातचा संबंध असण्याची शक्यता असल्याचा अत्यंत खळबळजनक आरोप राष्ट्रवादीचे अजित पवार पक्षाचे आमदार अमोल मिटकरी यांनी केला आहे. व्हीएसआर कंपनीच्या विमानासोबत या भोंदूबाबाचे संबंध दिसत असल्याचे सांगत संबंधित विमान कंपनीच्या अधिकाऱ्यांन सोबतचा खरात याचा फोटोही व्हायरल झाला आहे.
दुष्काळाने होरपळणाऱ्या मराठवाड्यासाठी राखीव असलेले पाणी नाशिक जिल्ह्यातील दारणा प्रकल्पातून भोंदूबाबा कॅप्टन अशोक खरातला देण्यात आल्याची धक्कादायक प्रकार उघडीस आला आहे. गोदावरी मराठवाडा पाटबंधारे विकास महामंडळाच्या शिफारशीवरून खरातच्या मिरगाव (ता. सिन्नर) इथल्या शिवनिका संस्थानाला दररोज 39 लाख लिटर पाणी देण्याचा निर्णय घेण्यात आला होता. या निर्णयावर 31 जुलै 2020 रोजी मंत्रिमंडळ उपसमितीने शिक्कामोर्तब करून सरकारी आदेशही जारी केला होता.
उपराष्ट्रपती सी. पी. राधाकृष्णन आज मुंबई दौऱ्यावर आहेत.अजित पवार महायुती सरकारमध्ये असताना सी. पी. राधाकृष्णन हे महाराष्ट्राचे राज्यपाल होते ते आज संध्याकाळी देवगिरीवर उपमुख्यमंत्री सुनेत्रा पवार यांची दिवंगत नेते अजित पवार यांच्या निधनानंतर सांत्वन भेट घेणार आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.