Maharashtra Politics Update : देश-विदेशात दिवसभरात कुठे काय राजकीय घडामोडी घडल्या? जाणून घ्या एका क्लिकवर

Political Breaking Today Live Headlines Updates : महाराष्ट्रातील दुष्काळ निवारणासाठी राज्य सरकारचा 15 हजार कोटींचा प्रस्ताव सुरू असल्याची माहिती कृषिमंत्री दत्तात्रय भरणे यांनी दिली. महाराष्ट्र आणि देशातील विविध ताज्या घडामोडी जाणून घेऊया.
Maharashtra Live Politics Update
Maharashtra Live Politics UpdateSarkarnama
Published on: 
Updated on: 

शेतकऱ्यांच्या प्रश्नावर मोर्चा काढून सरकारला जाब विचारणार; मराठवाडा दौऱ्यात आदित्य ठाकरेंचा इशारा!

Marathwada Drought : राज्यातील शेतकरी आर्थिक संकटात सापडला असताना सरकारने त्याला वाऱ्यावर सोडले आहे. अतिवृष्टी, पीक विमा, नुकसानभरपाई आणि कर्जमाफी यापैकी कोणत्याही बाबतीत शेतकऱ्यांना दिलासा मिळालेला नाही. सरकारने जाहीर केलेली पाच हजार रुपयांची मदतही अनेक शेतकऱ्यांपर्यंत पोहोचलेली नाही. पाच हजार रुपयांत शेतकऱ्यांची दिवाळी होणार आहे का? असा सवाल शिवसेनेचे आमदार आदित्य ठाकरे यांनी सरकारला केला. शेतकऱ्यांच्या प्रश्नांवर सरकारला जाब विचारण्यासाठी मोठा मोर्चा काढणार असल्याचा इशाराही त्यांनी दिला.

आळंदीतल्या  बिकानेर मिठाईवर एफडीएची धाड; ३०३ किलो बर्फीचा साठा जप्त करुन जागीच केला नष्ट

पुणे : दिवाळी सणाच्या काळात नागरिकांच्या आरोग्याशी खेळ करणाऱ्या मिठाई उत्पादक आणि विक्रेत्यांविरोधात अन्न व औषध प्रशासनाने (एफडीए) कारवाईचा बडगा उगारला आहे. एफडीएने शहर व जिल्ह्यात दोन ठिकाणी कारवाई करत कोंढवा बुद्रुक येथील गायत्री लाडू भांडारमधून १ हजार १८८ किलो मोतीचूर लाडू आणि बुंदी, तर आळंदी येथील आर. बिकानेर मिठाई केंद्रातून ३०३ किलो बर्फीचा साठा जप्त करून जागेवरच नष्ट करण्यात आला. दोन्ही कारवायांमध्ये एकूण १ हजार ४९१ किलो मिठाई नष्ट करण्यात आली असून, त्याची अंदाजे किंमत २ लाख ९४ हजार ९०० रुपये आहे.

पुण्यात जे काम झाले आहे, त्यात अजितदादांचा सिंहाचा वाटा : एकनाथ शिंदे

पुण्यात मेट्रोचं काम मोठ्या प्रमाणात झाले आहे आणि होत आहे. आज पुण्यात जे काम झाले आहे, त्यामध्ये अजितदादांचा सिंहाचा वाटा आहे, अशी कबुली उपमुख्यमंत्री एकनाथ शिंदे यांनी दिली.

सातारा जिल्हा बॅंकेत महायुतीचा धर्म पाळला गेला नाही : जयकुमार गोरे

सातारा जिल्हा मध्यवर्ती सहकारी बॅंकेच्या निवडणुकीतील आकडेवारी पाहिली तर महायुतीचा धर्म पाळला गेला नाही. मुख्यमंत्री आणि नेतृत्वाने दिलेल्या सूचना पाळल्या गेल्या नाहीत. मला कोणावर टीका करायची नाही. पण, भाजपच्या विजयाबद्दल मला अभिमान आहे, अशी प्रतिक्रिया ग्रामविकास मंत्री जयकुमार गोरे यांनी दिली.

परताव्याच्या आमिषाने पुण्यात ज्येष्ठ नागरिकाला २ कोटींचा गंडा

गुंतवणुकीवर चौपट परतावा मिळवून देण्याचे आमिष दाखवत सायबर भामट्यांनी पुण्यातील एका ७० वर्षीय ज्येष्ठ नागरिकाला तब्बल २ कोटी १० लाख रुपयांचा गंडा घातला आहे. सोशल मीडियावर गुंतवणूक योजनेची जाहिरात देताना मंत्री आणि प्रसिद्ध खेळाडूंचे फोटो वापरण्यात आले होते. या जाहिरातीवर विश्वास ठेवून ज्येष्ठ नागरिकाने टप्प्याटप्प्याने मोठी रक्कम गुंतवली. मात्र, परताव्याऐवजी त्यांची फसवणूक झाल्याचे समोर आले.

दिया मिर्झाच्या व्हिडिओवरून हायकोर्टाने भाजप नेत्यांना सुनावले

अभिनेत्री दिया मिर्झा हिच्या फटाकेमुक्त दिवाळीच्या जनजागृती व्हिडिओवरून मुंबईसह राज्यभरात राजकीय वाद निर्माण झाला आहे. मुंबई महापालिकेने दिवाळीत फटाके न फोडण्याचे आवाहन करणारा व्हिडिओ सोशल मीडियावर प्रसिद्ध केला होता. मात्र, भाजपच्या काही नेत्यांनी या व्हिडिओवर आक्षेप घेतल्यानंतर महापालिकेने तो सोशल मीडिया प्लॅटफॉर्मवरून हटवला. या प्रकरणाची दखल घेत मुंबई उच्च न्यायालयाने भाजप नेत्यांच्या भूमिकेवर नाराजी व्यक्त केली.

'नरेंद्र मोदी विरोधी पक्षाच्या भूमिकेतून बाहेर आले नाही' राज ठाकरेंची टीका

मनसे अध्यक्ष राज ठाकरे यांनी पंतप्रधान नरेंद्र मोदी आणि भाजपवर निशाणा साधला आहे. विधानपरिषद निवडणुकीच्या निकालानंतर पंतप्रधान मोदी यांनी केलेल्या ट्विटवर राज ठाकरे यांनी आक्षेप घेतला. या ट्विटमध्ये मोदी यांनी भाजपच्या यशाचा उल्लेख करत काँग्रेसच्या अपयशावर भाष्य केले होते. यावर बोलताना राज ठाकरे यांनी यापूर्वीच्या कोणत्याही पंतप्रधानांनी राज्यातील विधानपरिषदेच्या जागांच्या निकालावर अशा प्रकारे प्रतिक्रिया दिल्याचे आपल्या ऐकिवात नसल्याचे म्हटले.

सोलापूर जिल्हा बँक निवडणुकीत पाच माजी आमदारांचे अर्ज बाद

सोलापूर जिल्हा मध्यवर्ती सहकारी बँकेच्या निवडणुकीत उमेदवारी अर्जांच्या छाननी प्रक्रियेत तब्बल १० जणांचे उमेदवारी अर्ज बाद करण्यात आले असून, यामध्ये पाच माजी आमदारांचा समावेश आहे. माजी आमदार रणजितसिंह मोहिते-पाटील, जयवंतराव जगताप, संजयमामा शिंदे, दिलीप माने आणि राजन पाटील यांना या निर्णयाचा फटका बसला आहे.

महिलेला धाक दाखवून चैन हिसकावण्याचा प्रयत्न

बंगळुरूमध्ये महिलेला चाकूचा धाक दाखवून सोनसाखळी लुटण्याचा प्रयत्न करण्यात आला. इंदिरानगरमधील दुकानात घुसलेल्या आरोपीने २३ वर्षीय महिलेला धमकावत गळ्यातील सोन्याची चेन हिसकावली. महिलेला ओलीस धरून बाहेर नेण्याचा प्रयत्न करताच नागरिकांनी धाव घेत आरोपीला पकडून पोलिसांच्या ताब्यात दिलं.

ऊसदरासाठी स्वाभीमानीचं कोल्हापुरात आंदोलन

ऊसदरासाठी स्वाभीमानी शेतकरी संघनटनेकडून कोल्हापुरात महामार्गावर रास्ता रोको आंदोलन केले जात आहे. ऊसाला रास्त दर मिळावा, अशी मागणी केली जात आहे.

Sanjay Patil news : पराभवानंतर काही लोकांनी दात दाखवले होते...

आपल्या पराभवानंतर काही लोकांनी दात दाखवले,पण त्यांचे दात पाडल्याशिवाय आता आपण स्वस्थ बसणार नाही,असा इशारा माजी खासदार संजयकाका पाटील यांनी राष्ट्रवादी काँग्रेस शरदचंद्र पवार पक्षाचे आमदार रोहित पाटील यांना दिला आहे. सांगली जिल्हा मध्यवर्ती बँकेच्या निवडणुकीत संजयकाका पाटील यांचा विजय झाला आहे. या विजयानंतर त्यांनी ही प्रतिक्रिया दिली आहे.

MPSC Exam news : गट-क सेवा मुख्य परीक्षा 60 दिवसांत घ्या

MPSC आयोगाने 2027 या वर्षाचे परीक्षा वेळापत्रक निश्चित करताना गट-क सेवा मुख्य परीक्षा 2026 ही 3 जानेवारी 2027 नंतर जास्तीत जास्त 60 दिवसांच्या आत म्हणजेच फेब्रुवारी 2027 अखेरपर्यंत आयोजित करावी. तसेच परीक्षेची निश्चित तारीख जाहीर करून त्यानुसार संपूर्ण भरती प्रक्रिया कालमर्यादेत पूर्ण करावी, अशी मागणी आमदार प्रतापसिंह पाटील यांनी केली आहे.

Devendra Fadnavis : माझ्या लेव्हलचा विषय नाही...

दिया मिर्झा या चांगल्या आणि प्रतिष्ठित अभिनेत्री असतील; पण त्या काही भारताच्या खूप मोठ्या नेत्या नाहीत. त्यामुळे मला असे वाटते की, हा आमच्या लेव्हलचा विषय नाही. तुम्ही आमच्या लेव्हलचे विषय विचारा, छोट्या लेव्हलचे विषय विचारू नका, असे मुख्यमंत्री देवेंद्र फडणवीस सध्या सुरू असलेल्या वादावर बोलताना म्हणाले.

इराणवर अमेरिकेचे पुन्हा हल्ले

अमेरिकेने सोमवारी इराणच्या केशम बेटावर हल्ला केलाय. वॉल स्ट्रीट जर्नलनं हे वृत्त दिलंय. एकीकडे राष्ट्राध्यक्ष ट्रम्प राजनैतिक चर्चा आणि तणाव कमी करण्याचे संकेत देतंय, आणि दुसरीकडे हा गुप्त आणि मर्यादित हल्ले करतंय. या दुहेरी भूमिकेमुळे मध्यपूर्वेतली सुरक्षा व्यवस्था अधिकच नाजूक बनलीय.आंतरराष्ट्रीय स्तरावर चिंता व्यक्त होत आहे.

 राजू शेट्टींना यांना कोल्हापूर पोलिसांची नोटीस

स्वाभिमानी संघटनेच्या आंदोलनाआधीच पोलिसांनी राजू शेट्टींना नोटीस बजावलीय. रात्री उशिरा पोलीस उपअधीक्षकांनी आणि शिरोळ पोलीस ठाण्याचे निरीक्षकांनी राजू शेट्टींना नोटीस बजावलीय. कलम 168 नुसार पोलिसांनी ही नोटीस बजावली असून प्रामुख्यानं प्रतिबंधात्मक कारवाईसाठी आहे..

शिवसेना आमदार मुलाचा अर्ज बाद

शिवसेना आमदार किशोर पाटील यांना मोठा राजकीय धक्का बसला आहे. जळगाव जिल्हा मध्यवर्ती सहकारी बॅंकेच्या निवडणुकीसाठी त्यांचे पुत्र सुमित पाटील यांनी पाचोरा तालुका प्राथमिक कृषी पतपुरवठा विकास सेवा संस्था मतदारसंघातून दाखल केलेला उमेदवारी अर्ज बाद झाला आहे. निवडणूक निर्णय अधिकाऱ्यांनी त्यांचा अर्ज नामंजूर केला आहे.

साधुंसाठी परराज्यातून गांजा नको, आम्ही पिकवतो" शेतकऱ्याची अजब मागणी चर्चेत

दुष्काळाच्या पार्श्वभूमीवर एक गंभीर बातमी नाशिकमधून.... सायाळे गावातले शेतकरी विजय शिंदेंनी गांजा आणि खसखस लागवडीची परवानगी मागितलीय. थेट राष्ट्रपतींकडे पत्र लिहून ही मागणी केलीय. आधीच दुष्काळ त्यात पिकाला कवडीमोल भाव मिळतोय. आता सिंहस्थ कुंभमेळ्यात येणाऱ्या साधूंसाठी परराज्यातून गांजा मागवण्याऐवजी स्थानिक शेतकऱ्यांनाच ही परवानगी द्यावी, अशी त्यांनी मागणी केलीय.

हिंजवडी मेट्रो उद्घाटनाच्या दिवशीच आदित्य ठाकरेंचे मुख्यमंत्र्यांना पत्र 

पुण्यात हिंजवडी मेट्रो मार्गिकेचे उद्घाटन होत असतानाच आदित्य ठाकरे यांनी मुख्यमंत्री देवेंद्र फडणवीस यांना पत्र लिहून परिसरातील नागरी समस्यांकडे लक्ष वेधले आहे. त्यांनी हिंजवडी-माण-मांजरी भागातील रस्त्यांची दुरवस्था, भीषण वाहतूक कोंडी, कचरा व्यवस्थापनाचा फज्जा आणि मुळा नदीचे वाढते प्रदूषण यावर तातडीने कठोर कारवाई करण्याची मागणी केली आहे.

हिंजवडी-शिवाजी नगर मेट्रो उद्धघाटन सोहळ्याला सुरवात

नागपुरात एमडी पावडरसह २.६८ लाखांचा मुद्देमाल जप्त; दोघे अटकेत

नागपुरातील भांडे प्लॉट चौकात गुन्हे शाखेच्या अमली पदार्थविरोधी पथकाने पहाटे धडक कारवाई केली. यात १.५८ लाखांची ५२.७०० ग्रॅम एमडीसदृश्य पावडर, तीन मोबाईल व दुचाकी असा २ लाख ६८ हजार १०० रुपयांचा मुद्देमाल जप्त केला. पोलिसांनी सूरज कठाणे व हर्षल अबगडला ताब्यात घेतले, तर हाशिम शेख, इशांत निकोलसे व प्रवीण टेंपे फरार आहेत. एनडीपीएसनुसार गुन्हा दाखल झाला आहे.

जळगाव-पाळधी रस्त्यावर खळबळ: खासगी पोलीस प्रशिक्षण केंद्राच्या इमारतीत जुगार अन् गोळीबार!

जळगाव-पाळधी रस्त्यावरील एका तीन मजली इमारतीत रात्रीच्या सुमारास अचानक गोळीबार झाला. या इमारतीच्या पहिल्या मजल्यावर 'गुरू अकॅडमी' ही खासगी पोलीस भरतीपूर्व प्रशिक्षण संस्था व विद्यार्थ्यांचे वसतिगृह आहे, तर वरच्या मजल्यावर पत्त्यांचा क्लब चालवला जात होता. गोळीबाराचा प्रचंड आवाज होताच वसतिगृहातील विद्यार्थी आणि क्लबमधील जुगार्‍यांमध्ये घबराट पसरली असून सर्वांनी तिथून पळ काढला.

कोरेगाव सोसायटी मतदारसंघात टाय; आता चिठ्ठीद्वारे ठरणार विजेता

कोरेगाव सोसायटी मतदारसंघात अत्यंत चुरशीची लढत पाहायला मिळाली. येथे उमेदवार सुनील माने यांना सर्वाधिक मते मिळाली असली, तरी एक मतपत्रिका फाटल्यामुळे ती बाद ठरवण्यात आली. परिणामी, सुनील माने आणि सुनील खत्री या दोन्ही उमेदवारांना समसमान मते मिळाली आहेत. यामुळे निवडणुकीचा निकाल आता चिठ्ठी काढून ठरवला जाणार असल्याने सर्वांचे लक्ष लागले आहे.

राष्ट्रवादी काँग्रेसच्या आमदाराचा नगरसेवकांना घरचा आहेर कार्यक्रमाला येता येत नसेल तर राजीनामा द्या

मावळ शहराच्या ऐतिहासिक सोहळ्याला काही नगरसेवकांनी दांडी मारल्याने आमदार सुनील शेळके यांचा पारा चढला. जनतेने विश्वासाने निवडून दिले असताना नगरपालिकेपेक्षा स्वतःची कामं महत्त्वाची वाटत असतील, तर थेट राजीनामा देऊन घरी बसा, अशा शब्दांत शेळकेंनी गैरहजर नगरसेवकांना सुनावलं.

संजयकाका पाटलांचा विजय; सुमनताई पाटलांचा १ मताने पराभव

सांगली जिल्ह्यातील बँकेच्या निवडणुकीत माजी खासदार संजयकाका पाटील आणि माजी मंत्री अजितराव घोरपडे यांनी दणदणीत विजय मिळवत आपले वर्चस्व कायम ठेवले. मात्र, तासगावमध्ये राष्ट्रवादी काँग्रेस (शरदचंद्र पवार) पक्षाच्या माजी आमदार सुमनताई पाटील यांना पराभवाचा सामना करावा लागला. मिरजेतील शेतकरी भवन येथे मतमोजणी पार पडली. निकालापूर्वीच पडळकर समर्थकांनी गुलाल उधळत जल्लोष केला.

Sangli Bank Result: गोपीचंद पडळकर  20 मतांनी विजयी

सांगली जिल्हा मध्यवर्ती सहकारी बँकेच्या निवडणुकीत आमदार गोपीचंद पडळकर यांनी बाजी मारली आहे. जत सोसायटी गटातून पडळकर यांनी विनोद पवार यांचा २० मतांनी पराभव करत संचालकपदावर विजय मिळवला. पडळकर यांना ५४ मते मिळाली, तर विनोद पवार यांना ३४ मते मिळाली.

Supreme Court of India : याचिका सुनावणीतून न्यायाधीश बाजूला

सर्वोच्च न्यायालय आणि उच्च न्यायालयांतील न्यायाधीशांच्या नियुक्त्यांसाठी सुधारित सामंजस्य प्रक्रियेचा मसुदा (एमओपी) अंतिम करण्यास होत असलेल्या विलंबाविरोधातील जनहित याचिकेच्या सुनावणीतून सर्वोच्च न्यायालयाचे न्यायाधीश पी. एस. नरसिंहा यांनी स्वत:ला दूर ठेवले. राष्ट्रीय न्यायिक नियुक्ती आयोगाच्या (एनजेएसी) प्रकरणात त्यांनी यापूर्वी अतिरिक्त सॉलिसिटर जनरल म्हणून बाजू मांडली होती. त्यामुळे त्यांनी हा निर्णय घेतला. सुधारित एमओपी गेल्या सुमारे 11 वर्षांपासून अंतिम झालेला नसल्याचे याचिकेत म्हटले आहे.

Delhi News : एलआयसी हाउसिंग फायनान्स लिमिटेडला 1322 कोटी रुपयांचा कथित तोटा; सुभाष चंद्रांविरोधात ‘ईडी’चा गुन्हा

एलआयसी हाउसिंग फायनान्स लिमिटेडला 1322 कोटी रुपयांचा कथित तोटा होण्याच्या कर्जगैरव्यवहारप्रकरणी सक्तवसुली संचालनालयाने (ईडी) मीडिया उद्योजक सुभाष चंद्रा यांच्याविरोधात मनी लॉन्डरिंगचा गुन्हा दाखल केला आहे. मालमत्तेचे मूल्य वाढवून दाखवत त्यांनी कर्ज मिळवल्याचा आणि नंतर परतफेड थकवल्याचा आरोप आहे. दोन कर्जांद्वारे एकूण 980 कोटी रुपये मिळवल्याचा आरोप तक्रारीत आहे.

Jalgaon News Update : सुवर्ण बाजारात मागील दोन दिवसांपासून सोने व चांदीचे भाव स्थिर

जळगाव येथील सुवर्ण बाजारात मागील दोन दिवसांपासून सोने व चांदीचे भाव स्थिर आहेत. सोन्याच्‍या भावात प्रति दहा ग्रॅम 200 रुपयांची वाढ होऊन एक लाख 38 हजार 200 रुपयांवर (विनाजीएसटी) आहेत. चांदीचे भाव सोमवारी एक लाख 83 हजार (प्रतिकिलो विनाजीएसटी) रुपयांवर कायम आहेत.

Dharashiv News : स्वाभिमानी मजदूर संघटनेच्यावतीने सोलापूर जिल्हाधिकारी कार्यालयावर काम मागणीसाठी मोर्चा

रोजगार हमी योजनेअंतर्गत मजुरांना तत्काळ काम मिळावे, दुष्काळग्रस्त कुटुंबांना आर्थिक मदत द्यावी आणि विविध प्रलंबित प्रश्नांची सोडवणूक करण्याच्या प्रमुख मागण्यांसाठी सोमवारी धाराशिव येथे स्वाभिमानी मजदूर संघटनेच्या वतीने जिल्हाधिकारी कार्यालयावर काम मागणी मोर्चा काढण्यात आला. या मोर्चामध्ये हजारो कष्टकरी मोठ्या संख्येने सहभागी झाले.

Mumbai News : मुंबई-मडगाव वंदे भारत एक्स्प्रेसची क्षमता वाढविण्याचा निर्णय ; ‘वंदे भारत’ 16डब्यांची!

दिवाळीच्या सुट्ट्यांमध्ये कोकण आणि गोव्याकडे जाणाऱ्या प्रवाशांची वाढती संख्या लक्षात घेऊन मध्य रेल्वेने मुंबई-मडगाव वंदे भारत एक्स्प्रेसची क्षमता वाढविण्याचा निर्णय घेतला आहे. दिवाळी पाडव्यापासून आठ डब्यांची ही गाडी 16 डब्यांसह धावणार आहे. त्यामुळे सध्याच्या 530 आसनांऐवजी प्रवाशांसाठी 1128 आसने उपलब्ध होणार आहेत.

Parbhani News : परभणीच्या महापालिका सफाई कामगार, कर्मचारी संघटनेचे काम बंद आंदोलन महापौर सय्यद इक्बाल यांच्या मध्यस्थीनंतर मागे

परभणीच्या महापालिका अधिकारी-कर्मचारी संघटना व महापालिका सफाई कामगार, कर्मचारी संघटनेने सोमवारपासून पुकारलेले काम बंद आंदोलन महापौर सय्यद इक्बाल यांच्या मध्यस्थीनंतर मागे घेण्यात आले. ऐन सणासुदीत हे आंदोलन मागे घेतल्याने परभणीकरांना मोठा दिलासा मिळाला, तर पदाधिकारी, प्रशासनाने सुटकेचा निःश्वास सोडला.

Gadchiroli Crime News : गडचिरोली पोलिसांच्या स्थानिक गुन्हे शाखेच्या पथकाने अमली पदार्थ विरोधी कारवाई

गडचिरोली पोलिसांच्या स्थानिक गुन्हे शाखेच्या पथकाने अमली पदार्थ विरोधी कारवाई केली. यामध्ये 1 कोटी 20 लाख रुपये किमतीच्या 240.5 किलो अमली पदार्थासह एकूण 1 कोटी 46 लाख 10 हजार रुपयांचा मुद्देमाल हस्तगत करून आठ आरोपींना ताब्यात घेतले आहे.

Farmer News Update : शेतकऱ्यांसाठी महत्त्वाची बातमी; पीक विम्यासाठी 15 डिसेंबरपर्यंत मुदत

रब्बी हंगामासाठी सुधारित प्रधानमंत्री पीक विमा योजना लागू करण्यात आली आहे. या योजनेत सहभागी होण्यासाठी शेतकऱ्यांना 15 डिसेंबरपर्यंत ऑनलाइन अर्ज करता येणार आहे. योजनेत सहभागी होण्यासाठी फार्मर आयडी अनिवार्य करण्यात आले आहे. गहू आणि हरभरा पिकाचा यात समावेश करण्यात आला आहे. गहू पिकासाठी प्रतिहेक्टर 45 हजार रुपये विमा संरक्षित रक्कम निश्चित करण्यात आली आहे.

सरकारनामाचे सदस्य व्हा

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.