Sharad Pawar : राज्यसभेसाठी केलेल्या मदतीची शरद पवारांकडून परतफेड, उद्धव ठाकरेंबाबत घेतला मोठा निर्णय, म्हणाले, 'जे नाव...'

Mumbai News : आगामी काळात राज्यात विधान परिषदेच्या नऊ जागेसाठी निवडणूक होत आहे. त्यामुळे सर्वच पक्षात रस्सीखेच दिसून येत आहे. विधानसभेतील संख्याबळ पाहता नऊ जागेपैकी महायुतीच्या वाट्याला आठ जागा येणार आहेत तर एक जागा महाविकास आघाडीच्या वाट्याला येणार आहे. त्यामुळे महाविकास आघाडीतील घटक पक्षात या तीन जागेसाठी जोरदार रस्सीखेच पाहवयास मिळत असतानाच, या निवडणुकीबाबत ज्येष्ठ नेते शरद पवार यांनी मोठे विधान केले आहे.

राज्यात नुकत्याच पार पडलेल्या राज्यसभा निवडणुकीत महाविकास आघाडीच्या वाट्याला आलेल्या एकमेव जागेवर ज्येष्ठ नेते शरद पवार (Sharad Pawar) बिनविरोध निवडून आले आहेत. त्यांना महाविकास आघाडीतील घटक पक्ष असलेल्या काँग्रेस व उद्धव ठाकरे यांच्या शिवसेनेने पाठींबा दिला. त्यामुळे राज्यसभा निवडणुकीत ते बिनविरोध निवडून आले. त्यानंतर शनिवारी पत्रकारांशी संवाद साधताना त्यांनी आगामी काळात होत असलेल्या विधानपरिषद निवडणुकीबाबत भाष्य केले आहे. येत्या काळात विधान परिषदेच्या एका जागेसाठी उद्धव ठाकरे जे नाव देतील त्याला आमच्या पक्षाचा पाठिंबा असेल, असे स्पष्ट केले.

महाविकास आघाडीतील (MVA) तीन घटक पक्ष एकत्रित आहेत. त्यामुळे येत्या काळात तीन पक्ष मिळूनच निवडणुकीविषयी निर्णय घेणार असल्याचे त्यांनी सांगितले. त्यासोबतच राज्यसभा निवडणुकीत बिनविरोध निवडून आल्यानंतर रविवारी दिल्लीला रवाना होत असल्याचे त्यांनी पत्रकारांशी बोलताना सांगितले.

दरम्यान, नुकत्याच पार पडलेल्या राज्यसभा निवडणुकीत महाविकास आघाडीतील काँग्रेस व उद्धव ठाकरे यांच्या शिवसेनेने केलेल्या मदतीची शरद पवार यांच्याकडून येत्या काळात परतफेड केली जाणार, अशी चर्चा रंगली आहे. त्यातच पुढ्यच महिन्यात उद्धव ठाकरे यांच्या विधानपरिषदेच्या आमदारकीची मुदत संपत असल्याने महाविकास आघाडीकडून येत्या काळात काय निर्णय घेतला जाणार? याची उत्सुकता लागली आहे.