Manikrao Kokate Viral Video : रम्मी खेळण्याचा व्हिडिओ, माणिकराव कोकाटेंनी स्पष्टच सांगितले, 'मी युट्यूबवर...'

Manikrao Kokate Vs Rohit Pawar : राष्ट्रवादी काँग्रस शरदचंद्र पवार पक्षाचे आमदार रोहित पवार यांनी कृषिमंत्री माणिकराव कोकाटे विधीमंडळाच्या सभागृहात मोबाईलवर रम्मी खेळत असल्याचा व्हिडिओ ट्विट केला होता. या व्हिडिओने एकच खळबळ उडाली होती. विरोधी पक्षांकडून माणिकराव कोकाटेंवर टीका करण्यात येत होती. आता या व्हिडिओवर माणिकराव कोकाटेंनी स्पष्टीकरण दिले आहे.

कोकाटे म्हणाले, 'हा विधान परिषदेमधला व्हिडिओ असावा. सभागृहात सीसीटीव्ही आहेत. सभागृहाचे नियम मला माहीत आहे. त्यामुळे मी असं काही करू शकत नाही. सभागृह स्थगित झाले होते. तेव्हा वरिष्ठ सभागृहात काय चालले आहे हे युट्यूबवर पाहण्यासाठी मी फोन सुरू केला होता. तेव्हा जंगली रम्मीची जाहीरात समोर आली. मी लगेच ती स्कीप करत होतो. त्यावेळचा तो व्हिडिओ आहे. 10 ते 12 सेकंदांचा तो व्हिडिओ आहे. जाहीरात स्कीप होत नव्हती तेव्हा मी दोन तीनवेळा प्रयत्न केला. आणि जाहीरात स्कीप केली.'

'तो व्हिडिओ उपलब्ध करा आणि पाहा की मी जाहीरात स्कीप करत होतो. रोहित पवारांनी स्वतःची करमणूक करण्यासाठी हा व्हिडिओ आणला.मी रमी खेळत नव्हतो. रोहित पवारांनी शेतकऱ्यांच्या हितासंदर्भातील कोणते प्रश्न सभागृहात उपस्थित केले. आम्ही शेतकऱ्यांसाठी गावोगावी फिरतो, विभागात फिरतो. नवेआदेश देतो. त्यांना आमचे काम दिसत नाही. त्यांच्या या नवीन उद्योगाने काही होत नाही जनता याला बळी पडणारी नाही', असा टोला देखील कोकाटे यांनी रोहित पवारांना लगावला.

ं

'भांडवल कशाचे करावे कशाचे करू नये हे त्यांना कळलं पाहिजे. रमी खेळत होता हा खोटा आरोप आहे. सभागृहात सीसीटीव्ही असतात मला नियम माहीत आहे. आम्ही शेतकऱ्यांच्या हिताचे निर्णय घेतले आहेत. जर रोहित पवारांनी युट्यूब उघडले तर त्यावर सुद्धा जंगली रमीची जाहिरात येईल. गाण्याची जाहिरात येईल.', असे देखील कोकाटेंनी सांगितले.