Jalna Assembly Constituency : अर्जून खोतकर यांनी घेतली रावसाहेब दानवे यांची भेट

Maharashtra Assembly Election 2024 : विधानसभा निवडणुकीचा प्रचार सुरू झाल्यानंतर जालना विधानसभा मतदारसंघात महायुतीचे उमेदवार अर्जुन खोतकर यांच्या प्रचारात भाजप सक्रिय नसल्याने खोतकर यांनी सोमवारी (ता.11) सकाळी भोकरदन येथे भाजप नेते रावसाहेब दानवे यांची त्यांच्या निवासस्थानी भेट घेतली. सुमारे एक तास या दोन्ही नेत्यांमध्ये चर्चा झाली. त्यानंतर आमचे मनोमिलन झाल्याचे खोतकर यांनी प्रसार माध्यमांना सांगितले.

लोकसभा निवडणुकीत भाजप नेते माजी केंद्रीय राज्यमंत्री रावसाहेब दानवे (Raosaheb Danve) यांचा पराभव भाजपच्या जिव्हारी लागला आहे. लोकसभा निवडणुकीत रावसाहेब दानवे व अर्जुन खोतकर यांचे मनोमिलन न झाल्याचे सर्वांसमोर आले होते. त्या काळातील दानवे यांनी खोतकर यांची तीन वेळा भेट घेऊन मनधरणी करण्याचा प्रयत्न केला होता.

त्यानंतर विधानसभा निवडणूकीत भाजपकडून जालना विधानसभेची जागा मिळावी, यासाठी प्रयत्न केले गेले. मात्र, महायुतीतील ही जागा शिवसेनेला सुटल्याने माजी राज्यमंत्री अर्जुन खोतकर यांना उमेदवारी मिळाली. (Jalna) मात्र, लोकसभेला खोतकर प्रचारापासून काही काळ दूर राहिले. त्याचप्रमाणे भाजप नेते माजी केंद्रीय राज्यमंत्री रावसाहेब दानवे आणि भाजपचे पदाधिकारी विधानसभा निवडणुकीत जालना मतदारसंघात प्रचारापासून दुरू राहीले आहेत.

त्यामुळे आज शिवसेनेचे उमेदवार माजी राज्यमंत्री अर्जून खोतकर यांनी भोकदरन येथे रावसाहेब दानवे यांच्या निवास्थानी त्यांची भेट घेऊन तासभर चर्चा केली. त्यानंतर आमचे मनोमिलन झाल्याचे खोतकर यांनी माध्यमांना सांगितले. दरम्यान विधानसभा निवडणुकीत राज्यभरात प्रचार दौरे सुरू आहेत. या व्यापामुळे मी अजून जालना विधानसभा मतदारसंघात गेलो नाही.

खोतकर यांनी प्रचारात सहभागी होण्याची विनंती केली आहे. त्यांनी विनंती केली नसती तरीही मी प्रचारात सहभागी होणार होतो. माझ्या डोक्यात लोकसभा किंवा अन्य काही नाही असे दानवे यांनी स्पष्ट केले. मुख्यमंत्री एकनाथ शिंदे यांची जालन्यात सभा आहे.

या सभेला रावसाहेब दानवे उपस्थित राहिले नसते तर चुकीचा संदेश गेला असता. दानवे यांना सभेचे निमंत्रण आणि जुनं झालं गेलं ते विसरून निवडणुकीत सक्रीय व्हा, अशी विनंती खोतकर यांनी या भेटीत केल्याचे बोलले जाते.