

Congress BJP politics : काँग्रेस नेत्या सोनिया गांधी यांच्या 'Belonging: A Journey of Love' या आत्मचरित्रावरून सध्या देशभरात राजकीय वादंग निर्माण झाले आहे. भाजपकडून निषेध म्हणून या पुस्तकाच्या प्रती जागोजागी फाडल्या जात आहेत. काँग्रेसने त्यांच्या सत्ताकाळात केलेल्या चुकांवर पांघरूण घालण्याचा प्रयत्न या पुस्तकातून करण्यात आल्याचा आरोप भाजपने केला आहे.
एकीकडे भाजपची ही पुस्तकविरोधी भूमिका समोर येत असताना, त्यांच्याच पक्षाचे राज्यसभेतील खासदार अशोक चव्हाण यांनी सोनिया गांधी यांचे आत्मचरित्र असलेले 'Belonging: A Journey of Love' हे पुस्तक आपण आवर्जून वाचणार असल्याचे म्हटले आहे. मी अनेक वर्षे काँग्रेस पक्षात होतो, त्यामुळे तेव्हा काय काय झाले, हे मला कळले पाहिजे.
सोनिया गांधी यांनी त्यांच्या राजकीय आणि खासगी आयुष्यात अनेक चढ-उतार पाहिले आहेत. त्याचे कथन या पुस्तकामध्ये करण्यात आले आहे. यापेक्षा वेगळे त्यात काही नाही, अशी स्पष्ट भूमिका अशोक चव्हाण यांनी माध्यमांशी बोलताना मांडली. सोनिया गांधी यांच्या या पुस्तकाला भाजपकडून विरोध होत असल्याचे चव्हाण यांच्या निदर्शनास आणून दिले, तेव्हा प्रत्येकाचा आपापला दृष्टिकोन असतो. त्यानुसार ते भूमिका घेतात, असे म्हणत त्यांनी यावर अधिक भाष्य करणे टाळले.
मुंबईत राज्याच्या सत्तेत घटक पक्ष असलेल्या शिवसेनेने या पुस्तकाचा निषेध करत त्याच्या प्रती फाडल्या. हे करत असताना त्यांच्या पक्षाच्या नेत्या शायना एन.सी. यांनी अनावधानाने शिवसेनाप्रमुख बाळासाहेब ठाकरे यांचा तत्कालीन काँग्रेस नेते मणिशंकर अय्यर यांच्यासोबतचा फोटो फाडल्याने नवा वाद निर्माण झाला आहे. यावरून मुंबईत शिवसेना उद्धव बाळासाहेब ठाकरे पक्ष आक्रमक होऊन रस्त्यावर उतरला आहे.
अशावेळी आपल्या राजकीय कारकिर्दीतील 40 वर्षांहून अधिकचा काळ काँग्रेसमध्ये घालवलेल्या आणि महाराष्ट्राचे मुख्यमंत्रीपद भूषवलेल्या अशोक चव्हाण यांनी भाजपचे खासदार असूनही सोनिया गांधी यांचे आत्मचरित्र वाचणार असल्याचे सांगितल्याने अनेकांच्या भुवया उंचावल्या आहेत.
सोनिया गांधी यांच्या नव्याने प्रकाशित झालेल्या पुस्तकाचे नाव ‘Belonging: A Journey of Love’ (बिलाँगिंग : अ जर्नी ऑफ लव्ह) असे आहे. हे त्यांचे आत्मचरित्र असून 10 नोव्हेंबर 2026 रोजी प्रकाशित झाले आहे. या पुस्तकामुळे भाजप आणि काँग्रेसमध्ये राजकीय वादाला तोंड फुटले आहे. 1984 च्या शीखविरोधी दंगलींचा उल्लेख करताना सोनिया गांधी यांनी ही अत्यंत दुःखद आणि लज्जास्पद घटना असल्याचे म्हटले आहे. मात्र, राजीव गांधी यांच्यावरील आरोपांबाबत त्यांनी बचावात्मक भूमिका घेतल्याचा भाजपचा आक्षेप आहे.
इंदिरा गांधी यांनी लागू केलेल्या आणीबाणीच्या काळातील परिस्थितीचे वर्णन करताना सोनिया गांधी यांनी इंदिरा गांधी यांची बाजू मांडल्याचा भाजपचा आरोप आहे. तर बाबरी मशीद प्रकरण, शाहबानो प्रकरण आणि 26/11 मुंबई दहशतवादी हल्ल्यांसह विविध घटनांबाबत पुस्तकातील मांडणीवर भाजपने प्रश्न उपस्थित केले आहेत. विशेषतः काँग्रेस आणि गांधी कुटुंबाच्या ऐतिहासिक चुकांवर पडदा टाकण्याचा प्रयत्न असल्याची टीका भाजपने केली आहे.
भाजपचे प्रवक्ते सी. आर. केसवन यांनी या पुस्तकाला 'Belonging' ऐवजी 'Whitewashing' (चुकांवर पांघरूण घालणे) असे नाव द्यायला हवे होते, अशी टीका केली. काँग्रेसने मात्र हे सोनिया गांधी यांचे वैयक्तिक आत्मचरित्र आहे. त्यातील मजकूर न वाचता केवळ राजकीय हेतूने टीका केली जात असल्याचे सांगत भाजपवर पलटवार केला आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.