Nanded Guardian Minister: नांदेडच्या पालकमंत्री पदावरून अतुल सावेंना हटवा, शिवसेनेच्या पदाधिकाऱ्यांची मंत्री संजय राठोडांकडे मागणी

Nanded News : प्रत्येक जिल्ह्यात स्थानिक पालकमंत्री द्या, अशी मागणी सातत्याने राजकीय पक्षांकडून केली जाते. स्थानिक नेता पालकमंत्री असेल तर कामे तातडीने मार्गी लागतात, बाहेरचा पालकमंत्री असेल तर तो फक्त ध्वजवंदनासाठी येतो, असा काहीसा नाराजीचा सूर आळवला जातो.

नांदेडचे पालकमंत्री तथा राज्याचे ओबीसी कल्याण मंत्री अतुल सावे यांच्याविरोधात महायुतीतील मित्र पक्ष असलेल्या शिवसेनेच्या स्थानिक पदाधिकाऱ्यांनीच नाराजी व्यक्त केली आहे. अतुल सावे हे शिवसेनेच्या पदाधिकाऱ्यांना योग्य सन्मान देत नाहीत, विकास निधी देताना दुजाभाव करतात असे आरोप करत मंत्री संजय राठोड यांच्याकडे लेखी निवेदन देण्यात आले आहे.

पालकमंत्री हटवा, अशी थेट मागणीच त्यांनी केल्यामुळे नांदेडमध्ये महायुतीत मीठाचा खडा पडला आहे. भाजपाचे खासदार तथा नांदेड जिल्ह्यातील नेते अशोक चव्हाण यांच्याकडून शिवसेनेला फारसे महत्व दिले जात नाही. स्थानिक स्वराज्य संस्थांच्या नगरपालिका, महापालिका निवडणूकीतून हे दिसून आले होते.

राज्यात महायुती असताना या निवडणुका भाजपाने स्वबळावर लढल्या होत्या. तेव्हापासून शिवसेना-भाजप या मित्र पक्षांमध्ये ताणाताणी सुरू आहे. यात आता पालकमंत्री अतुल सावे यांच्यावरील आरोपांची भर पडली आहे. अतुल सावे यांच्या कार्यपद्धतीवर शिवसेनेच्या स्थानिक पदाधिकाऱ्यांनी उघडपणे नाराजी व्यक्त करत पालकमंत्री बदलण्याची मागणी केली आहे.

शिवसेनेच्या पदाधिकाऱ्यांनी मृद व जलसंधारण मंत्री संजय राठोड यांची भेट घेऊन त्यांच्यापुढे पालकमंत्र्यांविरोधातील तक्रारींचा पाढा वाचला. नांदेड दौऱ्यावर संजय राठोड आले असताना शिवसेनेच्या शहरप्रमुखांसह स्थानिक पदाधिकाऱ्यांनी त्यांची नुकतीच भेट घेतली. यावेळी त्यांनी पालकमंत्र्यांच्या कार्यपद्धतीवर नाराजी व्यक्त केली.

शिवसेनेच्या पदाधिकाऱ्यांच्या आरोपानूसा, पालकमंत्री सावे यांच्याकडून शिवसेनेचे पदाधिकारी आणि कार्यकर्त्यांना अपेक्षित सन्मान दिला जात नाही. समन्वयाता अभाव असल्याने शिवसैनिकांमध्ये प्रचंड नाराजी आहे. स्थानिक पातळीवरील नागरी तसेच ग्रामीण विकासकामांबाबत शिवसेनेने केलेल्या मागण्यांना अपेक्षित प्रतिसाद सावे यांच्याकडून मिळत नाही.

शिवसेना हा महायुतीचा घटक पक्ष असूनही शिवसेनेच्या कार्यकर्त्यांना दुय्यम वागणूक मिळत असल्याचे राठोड यांच्या निदर्शनास आणून देण्यात आले. विकास निधीच्या वाटपाबाबतही शिवसेनेच्या पदाधिकाऱ्यांनी अनेक प्रश्न उपस्थित केले आहेत. मतदारसंघातील विविध विकासकामांसाठी निधी देताना भाजपला झुकते माप दिले जाते.

तसेच विविध शासकीय समित्या, प्राधिकरणे आणि इतर महत्त्वाच्या जबाबदाऱ्यांमध्ये शिवसेनेच्या पदाधिकारी व कार्यकर्त्यांना अपेक्षित प्रतिनिधित्व दिले जात नाही, असे लेखी निवेदनच मंत्री संजय राठोड यांना देण्यात आले आहे. यावर राठोड यांनी पालकमंत्र्यांच्या नियुक्तीचा अंतिम निर्णय मुख्यमंत्र्यांचा आहे.

नांदेडमधील पदाधिकाऱ्यांनी मांडलेल्या भावना आणि तक्रारी पक्षाच्या वरिष्ठ नेत्यांसमोर मांडण्यात येतील. तसेच उपमुख्यमंत्री एकनाथ शिंदे यांच्याशी याबाबत चर्चा केली जाईल, असा शब्द राठोड यांनी शिवसैनिकांना दिला आहे. मित्रपक्ष शिवसेनेच्या आरोपांवर मंत्री अतुल सावे यांच्याशी मोबाईलवरून संपर्क साधण्याचा प्रयत्न केला. परंतु त्यांच्याकडून प्रतिसाद न मिळाल्याने त्यांची भूमिका समजू शकली नाही.