Sanjay Rathod News : आता बंजारा समाज आंदोलनाच्या तयारीत! हैदराबाद गॅझेटनूसारच 'एसटी'मधून आरक्षणाची मागणी!

Maratha Reservation : मनोज जरांगे पाटील यांच्या मुंबईतील आंदोलनाला यश मिळाले. राज्य सरकारने हैदराबाद गॅझेटीअर लागू करण्याचा निर्णय घेत तसा जीआर देखील काढला. त्यानूसार मराठा समाजाला कुणबी नोंदी असलेल्यांना प्रमाणपत्र दिले जाणार आहे. यानंतर आता बंजारा समाजाला एसटीमधून आरक्षण मिळावे, त्यासाठी हैदराबाद गॅझेटीअरचाच आधार आणि त्यातील नोंदीनूसार एनटी (ए) ऐवजी अनुसूचित जमाती (एसटी)चे आरक्षण मिळावे, अशी मागणी जोर धरू लागली आहे.

या मागणीची निवेदनं मोठ्या प्रमाणात सरकारकडे पाठवली जात आहेत. याच मागणीवर विचारमंथन करण्यासाठी मंत्री संजय राठोड (Sanjay Rathod) यांनी मुंबईत आज महत्वाची बैठक बोलावली आहे. बंजारा समाजाचे धर्मगुरू, महंत आणि महत्वाचे नेते, पदाधिकारी या बैठकीला उपस्थित राहणार आहेत. या बैठकीनंतरच बंजारा समाजाला कोणते आरक्षण लागू करावे, याचा अंतिम निर्णय घेतला जाणार आहे. दरम्यान, बंजारा समाजाने केलेल्या मागणीला पाठिंबा वाढू लागला आहे. राष्ट्रवादी काँग्रेसचे गेवराईचे आमदार विजयसिंह पंडित यांनी बंजारा समाजाच्या मागणीला आपला पाठिंबा दर्शवला आहे.

मनोज जरांगे पाटील यांच्या लढ्यामुळे केवळ मराठा (Maratha Reservation) समाजालाच नाही तर बंजारा समाजालाही फायदा होण्याची शक्यता वर्तवली जात आहे. बंजारा समाज हा सध्या एनटी (ए) प्रवर्गात आहे. मात्र, हैदराबाद गॅझेटनुसार बंजारा समाजाचा समावेश अनुसूचित जमाती (एसटी) प्रवर्गात होण्याची शक्यता आहे. मुंबईत बंजारा समाजाच्या एक उच्चस्तरीय बैठकीचं आयोजन करण्यात आले आहे. बैठकीला बंजारा समाजाचे सर्व धर्मगुरू, महंत, मंत्री संजय राठोड, इंद्रनील नाईक, सर्व आमदार, लोकप्रतिनिधी आणि बंजारा समाजातील अभ्यासक उपस्थित राहणार आहेत.

या बदलावर समाजात मतांतरे असल्याने समाजाची बाजू समजून घेण्यासाठी ही महत्वपूर्ण बैठक आयोजित करण्यात आली आहे. बंजारा समाज सध्या व्हीजेएनटी (ए) मध्ये आहे. हैदराबाद गॅझेटियरनुसार बंजारा समाज हा एसटीमध्ये जाईल. बंजारा समाजाची आधीपासून मागणी होती की, त्यांना एसटीमधून आरक्षण मिळावे. ही मागणी प्रलंबित होती. हैदराबाद गॅजेटचा फायदा जसा मराठा समाजाला होईल तसा बंजारा समाजाला सुद्धा होईल, असा दावा केला जात आहे.

बंजारा समाजावर अन्याय का?

जर 'हैद्राबाद गॅझेटीयर'च्या आधारावर मराठा समाजाला 'कुणबी प्रमाणपत्र' मिळत असेल तर त्याच गॅझेटीयरमध्ये 'आदिवासी' उल्लेख असलेल्या बंजारा समाजावर अन्याय का?, असा प्रश्न बंजारा समाजाकडून उपस्थित केला जात आहे. या मागणीसाीठी मोठे आंदोलन उभारण्याची तयारी बंजारा समाजाकडून सुरू आहे. आजच्या मुंबईच्या बैठकीत या संदर्भात निर्णय होऊ शकतो. तत्कालीन निजाम सरकारच्या 'हैद्राबाद गॅझेटीयर'मध्ये बंजारा समाजाचा आदिवासी प्रवर्ग म्हणून उल्लेख आहे. सध्या महाराष्ट्रात बंजारा समाजाला 'विमुक्त भटक्या जमाती' एनटी प्रवर्गाचे आरक्षण मिळते.

देशातील अनेक राज्यांमध्ये तेथील राज्य सरकारकडून बंजारा समाजाचा आदिवासी प्रवर्गात समावेश करण्यात आलेला आहे. आंध्रप्रदेश, तेलंगणा, कर्नाटक आणि राजस्थानमध्ये बंजारा समाजाचा आदिवासी प्रवर्गात समावेश करण्यात आला आहे. मराठा समाजाच्या आरक्षणाच्या मागणीनंतर आता बंजारा समाजही 'हैद्राबाद गॅझेटीयर'चा आधार घेत महाराष्ट्रात आरक्षणाचं आंदोलन तीव्र करण्याच्या तयारीत आहे.

हैदराबाद गॅजेट नुसार बंजारा समाजाचा एसटी प्रवर्गात समावेश करावा अशी मागणी आता बीडमधून बंजारा समाजाने केली आहे. या मागणीला गेवराई मतदार संघाचे आमदार विजयसिंह पंडित यांनी पाठिंबा दर्शवीत ही मागणी हिवाळी अधिवेशनात करणार असल्याचे जाहीर केले. सध्या बंजारा समाज व्हीजेएनटी (ए) प्रवर्गात आहे. बीडच्या गेवराई येथे बंजारा समाजाची बैठक पार पडली आणि याच बैठकीतून बंजारा समाजाला हैदराबाद गॅझेटनुसार आरक्षण देण्याची मागणी केली जाते आहे. वेळ पडली तर रस्त्यावरची लढाई लढू असा इशारा देखील बैठकीतून देण्यात आला.

दरम्यान, बंजारा समाजाला अनुसुचित जमाती प्रवर्गात समाविष्ट करा, अन्यथा हायकोर्टात जाण्याचा इशारा समाजाच्या वतीने देण्यात आला आहे. बंजारा समाजाला देखील हैद्राबाद गॅझेटनुसार अनुसूचित जमातीमध्ये सहभागी करावे, अशी मागणी समाजाच्यावतीने नांदेडमध्ये करण्यात आली आहे. नांदेडच्या देगलूरच्या तहसीलदारांना बंजारा समाजाच्या वतीने निवेदन देत ही मागणी करण्यात आली.