Beed News, 17 May : सरपंच संतोष देशमुख यांच्या हत्या प्रकरणापासून बीड जिल्हा गुन्हेगारीच्या घटनांसाठी कुप्रसिद्ध झाला आहे. या जिल्ह्यातील गुन्हेगारांना पोलिसांचा धाक नसल्याचं अनेक घटनामुळे उघडकीस आलं आहे.
प्रशासन आणि पोलिसांनी बीडमधील गुन्हेगारी मोडीत काढण्यासाठी प्रयत्न केल्याचा दावा केला असला तरीही या जिल्ह्यातील गुन्हेगारीच्या घटना काही केल्या कमी होताना दिसत नाहीत. अशातच आता बीडमध्ये (Beed Crime) पुन्हा एकदा एका तरूणाचे अपहरण करुन त्याला अमानुष मारहाण केल्याचा धक्कादायक व्हिडिओ समोर आला आहे.
या व्हिडिओमध्ये 8 ते 10 जण एका तरूणाला लाठ्या-काठ्यांनी मारहाण करताना दिसत आहेत. या मारहाणीचा व्हिडीओ सोशल मीडियावर व्हायरल झाल्यानंतर मारहाण करणाऱ्या तरुणांच्या विरोधात गुन्हा दाखल करण्यात आल्याचं सांगितलं जात आहे.
मिळालेल्या माहितीनुसार, धार्मिक कार्यक्रमात दोन गटात मारहाण झाल्याचा राग मनात धरुन ही मारहाण झाल्याचं सांगितलं जात आहे. परळीतील टोकवाडी परिसरात हा प्रकार घडला असून मारहाण झालेल्या तरूणाचं नाव शिवराज हनुमान दिवटे असं आहे.
टोळक्याने परळीतील रिलायन्स पेट्रोल पंपासमोरून शुक्रवारी सायंकाळी शिवराजचं अपहरण केलं. त्यानंतर त्याला टोकवाडी गावात नेलं आणि त्याठिकाणी समाधान मुंडे आणि त्याच्या साथीदारांनी शिवराज दिवटेला बेदम मारहाण केली. या मारहाणीत शिवराज गंभीर जखमी झाला असून त्याच्यावर परळीतील रुग्णालयात उपचार सुरू आहेत.
दरम्यान, या मारहाणीचा व्हिडीओ सोशल मीडियावर व्हायरल झाल्यामुळे पुन्हा एकदा बीडमधील कायदा सुव्यवस्थेचा ऐरणीवर आला आहे. बीडमधील गुन्हेगारांना कायद्याचा धाक उरला आहे की नाही? असा प्रश्न आता नागरिकांकडून उपस्थित केला जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.