Beed Election : सत्तापक्षासाठी अजित पवार, मुंडेंकडून ताकद लावलेल्या बीडमध्ये आमदार क्षीरसागरांकडूनही जोर

Beed News : बीड नगर पालिका निवडणुकीचा प्रचार रंगात आणि टोकला येऊन ठेपला आहे. विभागातील सर्वात मोठ्या बीड नगर पालिकेसाठी पालकमंत्री असल्याने उपमुख्यमंत्री आणि पक्षाचे राष्ट्रीय अध्यक्ष अजित पवार यांनीही ताकद लावली आहे. तर, राज्याच्या पर्यावरण मंत्री पंकजा मुंडे यांनीही बीडवर विशेष लक्ष घातले आहे.

या दोन बड्या नेत्यांसमोर राष्ट्रवादी कॉंग्रेस शरदचंद्र पवार पक्षाचे आमदार संदीप क्षीरसागर यांनीही आपल्या फौजेसह लढा उभारला आहे. मागच्या निवडणुकीत कुठला पक्ष आणि स्वत: आमदार नसतानाही आघाडीच्या माध्यमातून संदीप क्षीरसागर यांनी दोन्ही काकांच्या नाकी नऊ आणले होते. यावेळी बीडकर कोणाच्या बाजूने मतांचा कौल देतात हे पाहणे औत्सुक्याचे आहे.

जिल्ह्यात बीडसह गेवराई, धारुर, माजलगाव, अंबाजोगाई आणि परळी नगर पालिकांची निवडणुक सुरु आहे. परळीत भाजप आणि राष्ट्रवादी कॉंग्रेस एकत्र लढत आहे. तर, उर्वरित ठिकाणी महायुतीतील भाजप आणि राष्ट्रवादी कॉंग्रेस आमने - सामने आहेत. अंबाजोगाईत राष्ट्रवादी कॉंग्रेसचे राजकिशोर मोदी आणि भाजपचे नंदकिशोर मुंदडा एकमेकांविरुद्ध शड्डू ठोकून उभा आहेत. मात्र, या दोन्ही नेत्यांनी पक्षचिन्ह बाजूला सारत आघाड्यांचा मार्ग पत्करला आहे. दरम्यान, बीड नगर पालिका ही जिल्‍ह्यातील आणि या विभागातील देखील सर्वात मोठी नगर पालिका आहे. नगराध्यक्ष आणि ५२ नगरसेवकांच्या नगर पालिकेची निवडणुक लागली आणि उमेदवारी दाखल करण्याच्या टप्प्यातच सत्ताधारी राष्ट्रवादी कॉंग्रेसमध्ये बेबनाव झाला. याचा फायदा भाजपलाही झाला.

राष्ट्रवादी कॉंग्रेसची ऐनवेळी झालेली पडझड रोखण्यासाठी पक्षाध्यक्ष अजित पवारांनी आमदार विजयसिंह पंडितांवर जबाबदारी सोपविली. खुद्द पवार बीडचे पालकमंत्री असल्याने त्यांचे तुलनेने बीडमध्ये अधिकचे लक्ष आहे. तर, डॉ. योगेश क्षीरसागर भेटल्याने हुरुप आलेला भाजपही (BJP) पालिकेच्या इतिहासात प्रथमच सर्व जागा आणि नगराध्यक्षपदाची निवडणुक लढवत आहे. पर्यावरण मंत्री पंकजा मुंडे यांचेही बीडवर खास लक्ष आहे. एकूणच दोन्ही सत्ता पक्षांचे बडे नेते आपापल्या पक्षासाठी ताकद लावून असताना आमदार संदीप क्षीरसागर देखील राष्ट्रवादी कॉंग्रेस शरदचंद्र पवार पक्षासाठी बीडमध्ये तेवढ्याच ताकदीने लढत आहेत.

त्यांच्याकडून नगराध्यक्षपदासाठी असलेल्या उमेदवाराकडे नगर पालिकेचा दांडगा अनुभव आणि शहरात चांगली ओळख आहे. त्यांच्या जोडीला क्षीरसागरांनी नगरसेवक पदाचे उमेदवारांचे समिकरणही चांगले जुळविले आहे. त्यामुळे बीडमध्ये नगराध्यक्षपदासाठी १९ उमेदवार रिंगणात असले तरी लढत मात्र राष्ट्रवादी कॉंग्रेस (NCP) शरदचंद्र पवार पक्ष, राष्ट्रवादी काँग्रेस आणि भाजपात असून एमआयएमकडूनही जोर लावला जात आहे.

दरम्यान, मागच्या २०१६ च्या निवडणुकीत संदीप क्षीरसागर यांचे मोठे काका जयदत्त क्षीरसागर आमदार आणि दुसरे काका डॉ. भारतभूषण क्षीरसागर नगराध्यक्ष होते. तरीही कुठल्या बड्या पदावर नसताना आणि स्वत:ला कुठला पक्ष नसताना या दोघांच्या विरोधात शड्डु ठोकत संदीप क्षीरसागर यांनी काकू - नाना विकास आघाडीच्या माध्यमातून निवडणुक लढवीत नगर पालिकेची अर्धी सत्ता आपल्या काकांच्या तावडीतून काढून स्वत: काबीज केली होती. आताची निवडणुकीत देखील सत्तापक्षाच्या अजित पवार, पंकजा मुंडे यांनी ताकद लावलेली असताना संदीप क्षीरसागर देखील त्यांच्याशी टक्कर देत आहेत. बीडकर आता कोणाच्या पारड्यात मतांची आघाडी देतात हे येत्या चार दिवसांत कळणार आहे.