Imtiyaz Jaleel News : मोठी बातमी! खासदार इम्तियाज जलील अडचणीत; छत्रपती संभाजीनगरमध्ये गुन्हा दाखल

Chhatrapati Sambhajinagar News : औरंगाबादचे छत्रपती संभाजीनगर नामांतर केल्यानंतर एमआयएमचे खासदार इम्तियाज जलील आक्रमक झाले आहेत. नामांतराच्या विरोधात त्यांच्याकडून आंदोलन केलं जात आहे. दरम्यान, आता सिटी चौक पोलीस ठाण्यात गुन्हा दाखल करण्यात आला आहे. त्यामुळे जलील यांच्या अडचणीत वाढ होण्याची शक्यता आहे.

औरंगाबाद नामांतर विरोधी संघर्ष समितीतर्फे खासदार इम्तियाज जलील( Imtiyaz Jaleel) यांचं नेतृत्वाखाली जिल्हाधिकारी कार्यालयासमोर साखळी उपोषण सुरु आहे. याचदरम्यान, खासदार जलील यांनी गुरुवारी (दि.९) औरंगाबाद शहराच्या छत्रपती संभाजीनगर नामांतर करण्याच्या निर्णयाविरोधात पोलिसांनी परवानगी नाकारलेली असतानाही शहरात कँडल मार्च काढला होता. आता याप्रकरणी जलील यांच्यासह १५०० अज्ञातांवर जमावबंदी आदेशाचं उल्लंघन केल्याप्रकरणी शहरातील सिटी चौक पोलिसात गुन्हा दाखल करण्यात आला आहे.

काय आहे प्रकरण ?

औरंगाबाद नामांतर विरोधी संघर्ष समितीचे संयोजक मोहम्मद अय्युब जहागीरदार यांनी जिल्हाधिकारी कार्यालय ते डॉ.बाबासाहेब आंबेडकर पुतळा भडकल गेटपर्यंत कँडल मार्च करीता पोलिसांकडे परवानगी मागितली होती. मात्र या कँडल मार्चची परवानगी सिटीचौक पोलिसांनी नाकारली होती. तसेच असा मार्च काढू नयेत अशी नोटीस देखील पोलिसांकडून देण्यात आली होती. मात्र तरीही जलील यांच्यासह हजारो लोकांनी रस्त्यावर उतरुन कँडल मार्च काढला होता.

खासदार इम्तियाज जलील यांच्यासह औरंगाबाद नामांतर विरोधी संघर्ष समितीचे संयोजक अय्युब जहागीरदार, महमुझ उर्रहमान फारुकी, आरेफ हुसैनी, फेरोज खान, नासेर सिद्दीकी, मोहम्मद समीर बिल्डर, शकुर सालार, शारेक नक्षबंदी, कुनाल खरात, प्रांतोष वाघमारे, गंगाधर ढगे, गाजी सादोद्दीन उर्फ पप्पु कलानी, सलीम सहारा व औरंगाबाद नामांतर विरोधी संघर्ष समिती पदाधिकारी तसेच इतर 1000 ते 1500 बेकायदेशीर जमाव यांच्याविरुध्द गुन्हा दाखल करण्यात आला आहे.

औरंगजेबाचं उदात्तीकरण करणाऱ्यांवर कारवाई होणार!

विधान परिषदेचे विरोधी पक्षनेते अंबादास दानवे यांनी विधान परिषदेच्या सभागृहात औरंगजेबाचे उदात्तीकरण करणाऱ्यांवर कारवाई करण्यात यावी अशी मागणी केली होती. तसेच त्यांनी एमआयएम तसेच आंदोलनकर्त्यांकडून कोणतीही वेळ न पाळता रात्री १२ वाजेपर्यंत घोषणाबाजी करून वेळेच्या नियमांचं उल्लंघन केलं जातंय याकडे सभागृहाचे लक्ष वेधलं. यावर गृहमंत्री यांच्याशी चर्चा करून त्यावर कारवाई केली जाईल असे आश्वासन सरकारकडून देण्यात आले.