Shivsena UBT News : ठाकरे सैनिक म्हणतायेत, भेटी लागी जीवा लागलीसे आस

Dharashiv News : शिवसेनेमध्ये फूट पडल्यानंतर शिवसेना ठाकरे गटाचे पक्षप्रमुख उद्धव ठाकरे हे पहिल्यांदाच धाराशिव दौऱ्यावर येणार होते. महाविका आघाडीची सत्ता गेली, ठाकरेंचे मुख्यमंत्रीपद गेले अन् पक्षही फुटला. अशा संकटातही धाराशिव जिल्ह्यातील खासदार, आमदार आणि शिवसैनिक एकनिष्ठ राहिले. सत्ताधारी शक्तीशी लढा देत ठामपणे उभे ठाकलेल्या निष्ठावंत शिवसैनिकांना पक्षप्रमुख उद्धव ठाकरे भेटणार, त्यांच्या पाठीवर कौतुकाची थाप देणार, यामुळे जिल्ह्यातील सैनिक सुखावले होते. मात्र हा दौरा अचानक रद्द झाल्याने निष्ठावंत शिवसैनिकांचा हिरमोड झाला आहे.

दुसरीकडे या दौऱ्याकडे महायुतीचे ही लक्ष लागले होते. पण हा नियोजित दौरा रद्द झाला आणि आता उद्धव ठाकरे पुन्हा निष्ठावंतांना कधी भेटणार? असा प्रश्न उपस्थित केला जात आहे. उद्धव ठाकरे यांचा दोन दिवसाचा धाराशिव जिल्हा दौरा ठरला होता. या दौऱ्याची पूर्वतयारी, नियोजन ही झाले होते. महाराष्ट्राची कुलस्वामिनी आई तुळजाभवानीचे दर्शन आणि धाराशिव जिल्हा मुख्यालयी मुक्काम, जिल्ह्यातील चारही विधानसभा मतदारसंघात मेळावे, असे नियिजन करण्यात आले होते. 

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मात्र आता हे सगळे नियोजन फसले असून उद्धव ठाकरेंचा दौरा अनिश्चित काळासाठी रद्द झाला आहे. हा दौरा रद्द होण्यामागे मराठा आरक्षणाच्या मागणीसाठी तापलेले वातावरण, सुरु असलेले आंदोलन हे कारण असल्याची चर्चा आहे. परंतु लवकरच उद्धव ठाकरे जिल्हा दौऱ्यावर येतील, अशा ठाकरे गटाचे स्थानिक नेते सांगत आहेत. राज्यामध्ये झालेल्या राजकीय पडझडीच्या काळात शिवसेना पक्षप्रमुख उद्धव ठाकरे निष्ठावंत शिवसैनिकांना नेमका काय संदेश देतात? याची उत्सुकता होती.

निष्ठावंत शिवसैनिकांसाठी ठाकरेंचीच शिवसेना खरी असं बोललं जातं. आगामी लोकसभा निवडणूक आणि त्या पार्श्वभूमीवर उद्धव ठाकरेंचा होणारा धाराशिव दौरा शिवसैनिकांचा उत्साह वाढवणारा ठरणार होता. पण तो होण्याआधीच या उत्साहावर पाणी फिरले, अशी चर्चा दौरा रद्द झाल्यानंतर होऊ लागली आहे. यापूर्वीही धाराशिव जिल्ह्यामध्ये शिवसेना पक्षप्रमुख उद्धव ठाकरे यांचे दौरे आणि सभा झाल्या आहेत. या सभांमधून शिवसैनिकांना ऊर्जाही मिळत होती.

ठाकरे यांच्या भाषणाने प्रभावित होऊन जिल्हाभर शिवसेनेचे संघटन बळकट करणारे कार्यकर्त्यांचे मोठे वर्तुळ जिल्ह्यात तयार झाले. 2022 मध्ये शिवसेना पक्षामध्ये फूट पडली त्याचे पडसाद धाराशिव जिल्ह्यातील उमटले. अनेक शिवसैनिक शिंदे गटात सामील झाले, तर काही पदाधिकारी व कार्यकर्ते ठाकरे यांच्याशी एकनिष्ठ राहीले. निष्ठावंत शिवसैनिक त्यांना उद्धव ठाकरे यांचा दौरा या राजकीय पडझडीच्या काळात मोठे बळ देणारा ठरणार होता.

शिवसेना पक्षामध्ये फूट पडल्यानंतर उद्धव ठाकरे धाराशिव जिल्हा दौऱ्यावर आले नव्हते. यामुळे पक्ष फुटी नंतर संघटन बळकट करण्यासाठी शिवसैनिकांना कानमंत्र आणि विरोधकांना आपल्या ठाकरे शैलीत ते काय आव्हान देणार? याची उत्सुकता शिवसैनिकांमध्ये होती. ठाकरे यांच्या दौऱ्यामध्ये इतर पक्षातील काही पदाधिकारी व कार्यकर्ते प्रवेश करणार होते, तेही आता लांबणीवर पडले आहेत. ठाकरे यांचा हा रद्द झालेला दौरा आता पुन्हा केव्हा होणार याकडे निष्ठावंतांचे लक्ष लागले आहे.