Harshada Shirsat: शिवसेनेच्या नगरसेवकांना राहिलं नाही भान, तलवार नाचवत केला उन्माद! एकावर गुन्हा पण शिरसाटांच्या मुलीवर कारवाई नाही

Harshada Shirsat: छत्रपती संभाजीनगर महापालिकेच्या निवडणुकीत निवडून आल्यानंतर काही नगरसेवकानी तलवार नाचवत उन्मादाचं दर्शन घडवलं होतं. यामध्ये पालकमंत्री संजय शिरसाट यांच्या मुलीचाही समावेश आहे. पण या प्रकरणाची गंभीर दखल घेत पोलिसांनी केवळ एकाच नगरसेवकावर गुन्हा दाखल केला पालमंत्र्यांच्या मुलीवर मात्र कोणतीही कारवाई करण्यात आलेली नाही. या प्रकारावर संभाजीनगरचे माजी खासदार इम्तियाज जलील यांनी आक्षेप घेतला आहे. त्यामुळं आता संजय शिरसाट पुन्हा एकदा आपल्या मुलांच्या प्रतापामुळं पुन्हा एकदा अडचणीत येण्याची शक्यता आहे.

नेमकं काय घडलं?

छत्रपती संभाजीनगर महापालिकेत विजयी झाल्यानंतर अभिजीत जिवनलाल यांनी विजयी मिरवणुकीत तलवार नाचवली. या नगरसेवकाविरोधात निवडणूक लढवलेल्या आणि पराभूत झालेल्या विरोधी पक्षाच्या उमेदवाराच्या घरासमोर त्यानं हा उन्माद केला होता. याप्रकरणाची गंभीर दखल घेत वेदांतनगर पोलीस ठाण्यात या नगरसेवकावर गुन्हा दाखल झाला आहे. पण त्याच प्रभागात पालकमंत्री संजय शिरसाट यांची कन्या हर्षदा शिरसाट आणि त्यांचा पीए राजू राजपूत यांनी देखील विजयी मिरवणूक काढत तलवारी नाचवल्या होत्या. पण हर्षदा आण राजपूत यांच्यावर मात्र पोलिसांनी कुठलीही कारवाई केलेली नाही.

जलील काय म्हणाले?

दरम्यान, या प्रकारावर आता माजी खासदार इम्तियाज जलील यांनी प्रश्न उपस्थित केला आहे. हा काय प्रकार आहे? सर्वसामान्यांना वेगळा न्याय आणि नेत्यांच्या मुलांना वेगळा न्याय या देशात आहे का? असा सवाल जलील यांनी उपस्थित केला आहे. तसंच हर्षदा शिरसाट आणि त्यांच्या पीएवर देखील गुन्हा दाखल करण्याची मागणी त्यांनी केली आहे.