Dhananjay Deshmukh News : आरोपी सुटले तर माझाही खून करतील, मी स्वतःला संपवून घेतो! धनंजय देशमुख यांचा इशारा

बीड : सरपंच संतोष देशमुख हत्या प्रकरणात आठ आरोपींना अटक झाली आहे. या सर्वांवर मोक्का अंतर्गत कारवाई केली जात आहे. (Beed Crime) मात्र यात खंडणीतील आरोपी वाल्मीक कराड याच्यावर मोक्काची कारवाई करण्यात आलेली नाही. खंडणी प्रकरणातूनच माझ्या भावाचा खून झालेला आहे.अशावेळी वाल्मीक कराड याला 302 च्या गुन्ह्यात आरोपी करावं आणि त्यालाही मोक्का लावावा, अशी मागणी सरपंच संतोष देशमुख यांचे भाऊ धनंजय देशमुख यांनी केली.

हे आरोपी सुटले तर उद्या माझाही खून करतील, मग कुटुंबासाठी न्याय मागणारा कोणीही राहणार नाही.त्यामुळे उद्या सकाळी मोबाईल टाॅवरवर चढून मी स्वतःला संपवतो,असा इशारा धनंजय देशमुख यांनी दिला आहे. मुख्यमंत्री देवेंद्र फडणवीस (Devendra Fadnavis) यांच्यावर आम्ही विश्वास ठेवला,पण आम्हाला तपासाची कुठलीही माहिती दिली जात नाही, आम्हाला तपासापासून दूर ठवले जात आहे.

सगळ्या आरोपींवर मोक्का लावला असताना वाल्मीक कराडवर का नाही? खंडणी प्रकरणातूनच माझ्या भावाचा खून झाला, खंडणी मागायलाच आरोपी गेले होते. हे आरोपी जर सुटले तर ते मलाही मारून टाकतील. जे माझ्या भावाचे झाले तेच माझेही होईल, अशी भिती धनंजय देशमुख यांनी माध्यमाशी बोलतांना व्यक्त केली. उद्या मी माझ्या कुटुंबासह मस्साजोग मोबाईल टॉवरवर चढून आंदोलन करणार आहे.

आम्हाला न्याय मिळणार नसले तर मी स्वतःला संपवून घेतो. काय तपास सुरू आहे, कोणाला मदत करण्यासाठी प्रयत्न केले जात आहेत, माझ्या कुटुंबाला तपासाची माहिती का दिली जात नाही? असा सवाल धनंजय देशमुख यांनी उपस्थित केला. टॉवरवर चढून मी स्वतःला संपवून घेणार आहे. मला या सगळ्यापासून भीती आहे. खंडणीतल्या आरोपीला वेगळी आणि खुनाच्या प्रकरणातील आरोपींवर वेगळी कारवाई केली जात आहे.

यंत्रणा आम्हाला माहिती देत नाही, मुख्यमंत्र्‍यांना भेटून मी मागणी केली होती पण तरी यंत्रणा आम्हाला तपासाची माहिती देत नाही. आरोपी सुटले तर हे आरोपी माझा खून करतील.खंडणी ते खून प्रकरण एकमेकाशी जोडले गेलेले आहे.हा गुन्हा खंडणीतूनच झालेला आहे. मला आणि कुटुंबाला जर न्याय भेटत नसेल मी माझा स्वतःचा निर्णय घेतलेला बरा, अशी उद्विग्न प्रतिक्रिया धनंजय देशमुख यांनी दिली आहे.