Jalna News : जालना महापालिकेसाठी शिवसेना-भाजपमधील युतीचा तिढा काही केल्या सुटत नाहीये. त्यातच अर्जुन खोतकर यांनी भाजपला अल्टिमेटम देत आम्हाला सर्व पर्याय खुले असल्याचे म्हटले आहे. यावर आता माजी आमदार आणि भाजपचे निवडणुक प्रभारी कैलास गोरंट्याल यांनी युती नक्की करू, पण गद्दारी करणार नाही याची खात्री द्या, धमकीची भाषा करू नका, अशा शब्दात अर्जुन खोतकर (Arjun Khotkar) यांना सुनावले.
एकीकडे युतीची भाषा करायची आणि दुसरीकडे आपले चेले-चपाटे काँग्रेसमध्ये पाठवायचे हे जुनेच उद्योग सुरू असल्याचा आरोपही गोरंट्याल यांनी खोतकर यांच्यावर केला. मी काँग्रेसमध्ये असताना भाजपला सत्तेपासून दूर ठेवण्यासाठी अर्जुन खोतकर यांनी आमच्यासोबत युती केली होती. असा प्रकार महापालिका निवडणुकीत युती झाल्यांतर पुन्हा केला तर काय? याची शाश्वती शिवसेनेच्या नेत्यांना आम्हाला द्यावी, असे गोरंट्याल म्हणाले.
जालना महापालिकेतील युतीवरून शिवसेना-भाजपमध्ये तानातानी सुरू आहे. अर्जुन खोतकर यांच्या प्रस्तावावर भाजपकडून कुठलाच प्रतिसाद मिळत नसल्याने आता थांबणे शक्य नसल्याचे खोतकर यांनी स्पष्ट केले होते.
तसेच आपल्यासाठी सगळे पर्याय खुले आहेत, युती तुटल्याचे खापर आमच्यावर नको, कार्यकर्त्यांना आता थांबवणे शक्य नसल्याचे खोतकर म्हणाले होते. खोतकरांच्या या अल्टिमेटमला आम्ही धमकी समजतो. युतीची भाषा करायची आणि दुसरीकडे धमकी असे चालणार नाही,असंही कैलास गोरंट्याल (Kailas Gorantyal) यांनी सांगितलं.
शिवसेनेने महापौर पदाचे आरक्षण जाहीर होण्याआधीच विष्णु पाचफुले यांची उमेदवारी जाहीर करून टाकली. याबद्दल आम्ही विचारले, त्यावर तो आमच्या पक्षाचा अंतर्गत प्रश्न असल्याचे ते सांगतात. युती करायची असेल तर हा प्रश्न पक्षाचा अंतर्गत राहत नाही, तो युतीचा होतो, असे म्हणत यावर भूमिका स्पष्ट करण्याची मागणी कैलास गोरंट्याल यांनी केली. अर्जुन खोतकर यांनी काँग्रेस खासदारांना फोन करून वेगळे प्रयोग सुरू केले आहेत. त्यांचे राजकारण मी फार वर्षांपासून ओळखतो.
काही समर्थकांना काँग्रेसमध्ये पाठवायचे, काहींना अपक्ष लढवायचे आणि निवडणुका झाल्यानंतर त्यांना सोबत घेऊन वेगळा प्रयोग करायचा हे मे ओळखून आहे. महापालिकेत आमच्यासोबत युती केल्यानंतर जर काँग्रेस, महाविकास आघाडी, शिवसेना उद्धव बाळासाहेब ठाकरे पक्षाचे उमेदवार जास्त निवडून आले, तर त्यांना सोबत घेऊन आम्हाला दूर ठेवण्याचा प्रयत्न झाला तर? याची भीती आम्हाला सतावत असल्याचे गोरंट्याल म्हणाले. मला असं वाटतं या सगळ्या गोष्टी स्पष्ट झाल्या पाहिजे. युती करायची असेल तर साफ मनाने करा, गद्दारी करणार नाही, याची खात्री द्या, याचा पुनरुच्चारही गोरंट्याल यांनी केला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.