Tanaji Sawant News : "शिवसेनेचा एक-एक मतदारसंघ कमी होत राहिला, तर...", सावंतांचं अजितदादांसमोरच रौद्ररूप

धाराशिव लोकसभा मतदारसंघावरून ( Dharashiv lok Sabha Constituency ) शिवसेना-भाजपमध्ये रस्सीखेच सुरू होती. येथून मंत्री तानाजी सावंत ( Tanaji Sawant ) यांचे पुतणे शिवसेनेकडून ( शिंदे गट ) तर, भाजपकडून आमदार राणाजगजितसिंह पाटील इच्छुक होते. पण, उपमुख्यमंत्री अजित पवार ( Ajit Pawar ) यांच्या राष्ट्रवादी काँग्रेसनं बाजी मारत राणाजगजितसिंह पाटील यांच्या पत्नी अर्चना पाटील यांना उमेदवारी दिली आहे. पण, धाराशिव, परभणी, रत्नागिरीसारखे शिवसेनेचे पारंपरिक मतदारसंघ महायुतीतील मित्रपक्षांना गेल्यानं तानाजी सावंत अजित पवारांसमोरच आक्रमक झाल्याचे पाहायला मिळालं.

राष्ट्रवादीच्या ( अजित पवार गट ) उमेदवार अर्चना पाटील यांनी धाराशिव मतदारसंघातून उमेदवारी अर्ज आज ( शुक्रवार, 19 एप्रिल ) दाखल केला. या वेळी उपमुख्यमंत्री अजित पवार ( Ajit Pawar ), आमदार संजय बनसोडे, आमदार राणाजगजितसिंह पाटील, मंत्री तानाजी सावंत ( Tanaji Sawant ) उपस्थित होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

तानाजी सावंत म्हणाले, "महायुतीचा उमेदवार कोणीही असेना, पण धनंजय सावंत यांनी 26 जानेवारीपासून प्रचाराला सुरुवात केली होती. धाराशिव हा मतदारसंघ पारंपरिक पद्धतीनं कडवट शिवसैनिकांचा आहे. तो कडवट बाणा शिवसैनिक कधीही सोडणार नाही. तरीसुद्धा मुख्यमंत्री एकनाथ शिंदे, उपमुख्यमंत्री अजित पवार, उपमुख्यमंत्री देवेंद्र फडणवीस या तीन नेत्यांनी हा मतदारसंघ महायुतीत राष्ट्रवादीला सोडण्याचा निर्णय घेतला."

"पुढील सभेत विरोधकांचा फडशा पाडल्याशिवाय स्वस्थ बसणार नाही. पण, अशाच पद्धतीनं शिवसैनिकांचा एक-एक मतदारसंघ कमी होत राहिला, तर हा शिवसैनिक आणि मी स्वत: हा कधीही सहन करणार नाही. कारण, पारंपरिक शिवसेनेचा मतदारसंघ आहे. या ठिकाणाहून आठ वेळा शिवसेनेचा खासदार निवडून गेला आहे. हा तमाम शिवसैनिकांवर अन्याय आहे. पण, नरेंद्र मोदी यांना पंतप्रधान करण्यासाठी आपलं दु:ख विसरून राष्ट्रवादी कार्यकर्त्यांच्या पुढं जात अर्चना पाटलांना लीड द्यायचं आहे," असं आवाहन तानाजी सावंतांनी केलं.

R