Loksabha Election 2024 : बुलढाण्यात महायुतीत बंडखोरी; भाजपच्या विजयराज शिंदेकडून अपक्ष अर्ज

Buldhana Loksabha News : बुलढाणा लोकसभा मतदारसंघात महायुतीत बंडखोरी झाली आहे. हा मतदारसंघ मुख्यमंत्री एकनाथ शिंदे यांच्या शिवसेनेच्या वाट्याला आलेला असताना भाजपचे प्रदेश कार्यकारिणी सदस्य माजी आमदार विजयराज शिंदे यांनी आपला उमेदवारी अर्ज दाखल केला आहे. हा अर्ज भरताना त्यांनी एकनाथ शिंदेंचे उमेदवार भाजपच्या नेत्यांचा योग्य सन्मान देत नाहीत, असा आरोपही केला आहे.

बुलढाणा लोकसभा मतदारसंघातील महायुतीतील बंडखोरी अद्याप शमत नसल्याचे दिसत आहे. या आधीदेखील मुख्यमंत्री एकनाथ शिंदे यांच्या गटाचे आमदार संजय गायकवाड यांनी आपला उमेदवारी अर्ज दाखल केला होता. मुख्यमंत्री एकनाथ शिंदे यांनी समजूत काढल्यानंतरदेखील अद्याप संजय गायकवाड यांनी आपला उमेदवारी अर्ज मागे घेतलेला नाही.

महायुतीची ही एक डोकेदुखी संपलेली नसतानाच भारतीय जनता पक्षातून विजयराज शिंदे यांनी बंडखोरी करत आपला उमेदवारी अर्ज दाखल केला आहे. त्यामुळे आता बुलढाणा लोकसभा मतदारसंघात महायुतीला या बंडखोरीला सामोरे जावे लागण्याची शक्यता आहे. अर्ज दाखल केल्यानंतर विजयराज शिंदे म्हणाले, मी केवळ सर्वसामान्य भाजपच्या कार्यकर्त्यांचे प्रतिनिधित्व करत असून हीच येथील मतदारांची भावना आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

प्रतापराव जाधव चौथ्यांदा मैदानात

बुलढाणा लोकसभा मतदारसंघ मुख्यमंत्री एकनाथ शिंदे यांच्या शिवसेनेला मिळाला आहे. या मतदारसंघात सलग तीन वेळा विजय मिळवणारे प्रतापराव जाधव हे चौथ्यांदा मैदानात उतरले आहेत. एकनाथ शिंदेंनी त्यांची उमेदवारी घोषित केली आहे. यापूर्वी २००९, २०१४, आणि २०१९ मध्ये झालेल्या निवडणुकीतदेखील प्रतापराव जाधव यांनी एक हाती विजय मिळवला होता. त्यांनी माजी मंत्री आणि सहकार नेते राजेंद्र शिंगणे Rajendra Shingane यांचा पराभव केला होता. या वेळी प्रतापराव जाधव यांना महायुतीतीलच बंडखोर नेत्यांचा सामना करावा लागण्याची शक्यता आहे.

Edited By : Umesh Bambare

R