Manoj Jarange Patil : मनोज जरांगेंचा टोकाचा निर्णय! ना मंडप, ना पाणी; आता थेट रखरखत्या उन्हात उपोषण

Manoj Jarange Patil Hunger Strike : मराठा आरक्षण आंदोलक मनोज जरांगे पाटील यांनी आज पत्रकार परिषद घेत आपल्या आंदोलनाची घोषणा केली. जरांगे पाटील यांनी ३० मेपासून आपण कठोर आमरण उपोषण करणार असल्याची घोषणा केली.

यावेळी हे आंदोलन आपण मंडपात बसून किंवा सावलीत करणार नाही. शिवाय उपोषणाच्या ठिकाणी फॅन लावणार नाही, मंडप टाकणार नाही, तर केवळ रखरखत्या उन्हात उघड्यावर बसून आपण कठोर उपोषण करणार असल्याचं जरांगेंनी जाहीर केलं.

जरांगे म्हणाले, "मला अंतिम टोकाचं आणि कठोर उपोषण करायचं आहे. रखरखत्या उन्हात बाज टाकून मी हे उपोषण करणार आहे. या उपोषणात मी पाणी पिणार नाही, जेवण करणार नाही, शिवाय पायात चप्पल घालणार नाही. माझ्या शरीरात अनेक वेदना आहेत. उष्णघाताचा बळी गेला तरी तो मुख्यमंत्री देवेंद्र फडणवीस आणि सरकारमुळे गेला.

कितीही जीवाची लाहीलाही झाली तरीही हरकत नाही. कारण तर माझ्या समाजाच्या लेकरांच्या आयुष्याचा उन्हाळा झाला आहे," असं जरांगेंनी यावेळी म्हणाले. दरम्यान, हे आंदोलन कुठेही होईल, एखाद्या रानात किंवा जंगलात होईल पण हे कठोर आंदोलन होईल आणि यावर मी ठाम आहे, असं जरांगे पाटील यांनी स्पष्ट केलं. शिवाय यावेळी सरकारचा किंवा माझा तुकडा पडेल या फायनल भुमिकेवर मी आलो आहे.

किती दिवस सरकारला वेळ द्यायचा आणि किती दिवस आंदोलन करायचं? असा सवाल करत आता आपण कठोर आंदोलन असल्याचं त्यांनी जाहीर केलं. शिवाय सरकारने एक महिन्याचा वेळ मागितला होता. आता वेळ देऊन दहा महिने झाले त्यामुळे आता कुठेतरी हे थांबलं पाहिजे. एकदाचं होऊन जाऊदे यासाठी आपण हा कठोर निर्णय घेतल्याचंही जरांगे म्हणाले.

तसंच यावेळी त्यांनी अंतरवाली सराटीमध्ये कुणीही येऊ नये, असं आवाहन मराठा समाजाला केलं आहे. शिवाय जगात कुठेही आमरण उपोषण झालं नसेल असं टोकाचं उपोषण उपोषण होणार, असं जरांगेंनी यावेळी सांगितलं.