Marathwada youth suicide: मराठवाडा हादरला: 'ओबीसींचे आरक्षणच संपले', म्हणत युवकाने जीवन संपवले; सुसाईड नोटमध्ये धक्कादायक माहिती

Latur News : मराठा समाजाला हैदराबाद गॅझेट लागू करून सरकारने ओबीसींचे आरक्षण संपविले आहे. आता ओबीसींच्या आरक्षणाचे कसे, अशी चिंता व्यक्त करत व घोषणा देत बुधवारी ( ता. 10 ) सायंकाळी वांगदरी (ता. रेणापूर) येथील भरत महादेव कराड (वय 35) या तरुणाने आता ओबीसींच्या आरक्षणाचे कसे, अशा घोषणा देत मांजरा नदीपात्रात उडी मारून आत्महत्या केली. त्याने ओबीसींच्या आरक्षणाबाबत चिंता व्यक्त करणारी चिट्टी देखील लिहून ठेवली आहे.

भरत महादेव कराड (रा. वांगदरी ता. रेणापूर) हा युवक ऑटो चालवून किंवा इतर वाहनांवर चालक म्हणून काम करणारा तरूण असला तरी तो गेली काही वर्षांपासून ओबीसींच्या आरक्षणासंदर्भात प्रत्येक आंदोलनात हिरीरीने भाग घेवून सहभागी होत होता. सरकारने मराठा समाजाला हैदराबाद गॅझेट लागू करून ओबीसींचे आरक्षण कायमस्वरूपी संपविले आहे. मी वेळोवेळी ओबीसी आरक्षण बचाव आंदोलनात सहभाग घेतला होता तरीही सरकारने ओबीसी समाजाचा घात करून ओबीसी विरोधी जीआर काढल्यामुळे मी माझे जीवन कायमस्वरूपी संपवत आहे. माझ्या पाठीमागे तरी माझ्या कुटुंबाला व ओबीसी समाजाला न्याय मिळावा असा मजकूर त्यांनी लिहून ठेवलेल्या चिठ्ठीत आहे.

मांजरा नदीपात्रात घोषणा देत ओबीसींना आरक्षण (OBC) पाहिजे, सरकार ओबीसी विरोधी आहे. माझ्या कुटुंबियांना व ओबीसी समाजाला न्याय मिळावा, अशी मागणी करीत भरत कराड याने नदीपात्रात उडी मारून आत्महत्या केली. यावेळी अविनाश गंभीरे व अंतराम मुंडे यांनी त्यास वाचवण्याचा प्रयत्न केला. परंतु त्यांना यश आले नाही. मृतदेहाचे शवविच्छेदन करण्यात आले. त्यानंतर गुरुवारी दुपारी दोन वाजता वांगदरी येथे भरत कराड यांच्यावर अंत्यसंस्कार करण्यात आले. यावेळी तहसीलदार प्रशांत थोरात, उपविभागीय पोलीस अधिकारी रवींद्र चौधर, पोलीस निरीक्षक दत्तात्रय निकम उपस्थित होते.

अंत्यसंस्कारावेळी घोषणाबाजी

भरत कराड यांच्या अंत्यविधीच्या वेळी गाव व परिसरातील शोकाकूल नागरिकांनी ओबीसींना आरक्षण मिळालेच पाहिजे, भरत कराड यांचे बलिदान वाया जाऊ देणार नाही, अशाही घोषणा दिल्या. भरत कराड याच्या पश्चात आई, पत्नी, तीन मुली, एक मुलगा असा परिवार आहे. त्याच्याकडे अवघी 2 गुंठे जमीन असल्याचे ग्रामस्थांनी सांगितले.

तहसीलदारांना दिले निवेदन

वांगदरी येथे आलेले तहसीलदार थोरात यांना लोकमाता अहिल्या प्रतिष्ठानच्या वतीने निवेदन देण्यात आले. यात मृताच्या तीन मुली व एका मुलाचा शिक्षणाची जबाबदारी शासनाने घेऊन तात्काळ 25 लाखाची मदत कुटुंबांना द्यावी व मयताच्या पत्नीस शासकीय नोकरीत घेण्यात यावे, असे या निवेदनात नमूद करण्यात आले आहे.