Nanded Mahayuti : तुमच्या किती जागा निवडून येणार? असं विचारत पदाधिकाऱ्यांचा अपमान; सन्मानाची वागणूक मिळत नसल्याने शिंदेंच्या आमदाराचा भाजपला इशारा

Nanded News, 20 Dec : राज्यात अनेक वर्षांपासून रखडलेल्या महापालिका निवडणुकीचा कार्यक्रम जाहीर झाला आहे. निवडणुका जाहीर होताच राजकीय पक्षांकडून रणनीती आखायला सुरूवात केली आहे.

आपल्या पक्षाचे जास्तीत जास्त उमेदवार यावे यासाठी सर्वच राजकीय पक्षांनी कंबर कसली आहे. मात्र, आगामी महापालिका निवडणुकीत आपल्या पक्षाचे उमेदवार जास्त निवडून आणण्याच्या शर्यतीमध्ये अनेक ठिकाणी महायुतीला तडा जाण्याची शक्यता निर्माण झाली आहे.

अशातच आता भाजपकडून सन्मानाची वागणूक मिळत नसल्याचा आरोप करत शिंदेंच्या शिवसेनेचे आमदार हेमंत पाटील यांनी स्वबळावर निवडणूक लढवण्याचा इशारा भाजपला दिला आहे. शिवाय भाजपने चांगला प्रतिसाद न दिल्यास राष्ट्रवादी काँग्रेसकडून युतीचा प्रस्ताव आला असून भाजपने सन्मानपूर्वक जागा न दिल्यास राष्ट्रवादीसोबत युतीची तयारी असल्याचंही हेमंत पाटलांनी स्पष्ट केलं.

नांदेड महापालिकेत शिंदेंच्या शिवसेनेने 50 टक्के जागांची मागणी असताना भाजपकडून केवळ 6 जागा देण्यात येत असल्याचंही पाटील यांनी सांगितलं. तर नांदेडमध्ये भाजपकडून शिवसेनेच्या निवडणूक समितीच्या सदस्यांना सन्मानाची वागणूक दिली जात नसल्याचा आरोप आमदार हेमंत पाटील यांनी केला आहे.

शिवाय तुमच्या किती जागा निवडून येणार? असे प्रश्न विचारून सेनेच्या पदाधिकाऱ्यांचा अपमान केला जात असल्याचा आरोपही त्यांनी केला आहे. अशातच काल हेमंत पाटील यांनी अजित पवारांच्या राष्ट्रवादीकडून युतीचा प्रस्तावही आल्याची माहितीही आमदार पाटील यांनी दिली.

त्यामुळे आता भाजपने सन्मानपूर्वक जागा दिल्या तरच युती करू अन्यथा, शिवसेना स्वबळावर किंवा राष्ट्रवादी काँग्रेससोबत युती करून निवडणूक लढवणार असल्याचंही पाटील यांनी स्पष्ट केलं आहे. त्यांच्या या इशाऱ्यानंतर आता भाजप नांदेड महापालिकेच्या निवडणुकीत नेमकी काय भूमिका घेणार हे पाहणं महत्त्वाचं ठरणार आहे.