Ashok Chavan : नांदेड महापालिकेत विरोधी पक्ष नेते पदासाठी काँग्रेसचे अशोक चव्हाणांना साकडे? माजी महापौरांच्या मुलाने घेतली भेट, चर्चांना उधाण

Nanded News : नांदेड वाघाळा महापालिकेत अशोक चव्हाण यांच्या नेतृत्वाखाली भाजपने 45 नगरसेवक निवडून आणत बहुमतासह सत्ता मिळवली. महापौर आणि उपमहापौर या दोन्ही पदांसह स्थायी समिती व विविध समित्यांवर भाजपचाच वरचष्मा राहणार आहे. तर दुसरीकडे विरोधीपक्ष नेते पदासाठी काँग्रेस-वंचित आघाडी आणि एमआयएम या दोन पक्षांमध्ये रस्सीखेच सुरू आहे.

या पार्श्वभूमीवर काँग्रेसचे माजी महापौर अब्दुल सत्तार यांचे पुत्र अब्दुल गफार यांनी नुकतीच खासदार अशोक चव्हाण यांची मुंबईमध्ये भेट घेतल्याची चर्चा आहे. काँग्रेस- वंचित बहुजन आघाडीची एकत्रित संख्या ही एमआयएम पेक्षा जास्त आहे. तर एमआयएमकडे 14 नगरसेवकांचे संख्याबळ आहे. सिंगल लार्जेस्ट पार्टी म्हणून विरोधी पक्ष नेते आपल्या पक्षाला मिळावे यासाठी एमआयएम प्रयत्नशील आहे.

अब्दुल गफार यांनी काँग्रेस आणि वंचित बहुजन आघाडीचे संख्याबळ लक्षात घेता विरोधी पक्षनेतेपदावर दावा केला आहे. अशोक चव्हाण हे काँग्रेसमध्ये असताना त्यांच्याच कृपेने अब्दुल सत्तार हे नांदेड वाघाळा महापालिकेचे महापौर झाले होते. दरम्यान लोकसभा निवडणुकीच्या काही दिवस आधी अशोक चव्हाण यांनी भाजपमध्ये प्रवेश केला. पक्षाने त्यांना राज्यसभेवर पाठवले आणि जिल्ह्यातील सर्वच सुत्रे त्यांच्या हाती सोपवली.

नगरपालिका, नगरपरिषद, महापालिका या सगळ्या निवडणुका अशोक चव्हाण यांनी आपल्या एकहाती नेतृत्वाखाली लढवत पक्षाला मोठे यश मिळवून दिले. महापालिकेत पहिल्यांदाच कमळ फुलले असून भाजपची एकहाती सत्ता आली आहे. अशोक चव्हाण काँग्रेसमधून भाजपमध्ये आल्यानंतर काही मोजक्याच स्थानिक नेत्यांनी त्यांच्यासोबत पक्षांतर केले होते.

काँग्रेसमधील महत्त्वाचे नेते मात्र पक्षा सोबतच राहिले. कालांतराने जिल्ह्यातील राजकीय समीकरणे जसजशी बदलत गेली तसे काठावर असलेले काँग्रेसचे अशोक चव्हाण समर्थक भाजपवासी झाले. महापालिका निवडणुकीत एमआयएमचे आवाहन लक्षात घेता मुस्लिम मतदार काँग्रेसकडे वळू नये यासाठी अशोक चव्हाण यांनी खेळी खेळली. काही आपल्या काँग्रेसमधील समर्थक नगरसेवकांना महापालिका निवडणुकीच्या आधी एमआयएममध्ये प्रवेश करायला लावला. या प्रवेशाने मतांच्या विभाजनाचा फटका भाजपला न बसता तो काँग्रेसला बसावा अशी व्यवस्था केली होती.

आता महापालिकेतील विरोधी पक्ष नेते पदासाठी काँग्रेस-वंचित आघाडी आणि एमआयएममध्ये रस्सी खेच पाहायला मिळत आहे. तिन्ही पक्षात सुरू असलेल्या स्पर्धेत आपल्याला संधी मिळावी यासाठी अब्दुल गफार यांनी अशोक चव्हाण यांना साकडे घातले आहे. आता काँग्रेसमधील आपले जुने मित्र माजी महापौर अब्दुल सत्तार यांच्या पुत्रासाठी अशोक चव्हाण मदत करणार का? हे पाहणे महत्त्वाचे ठरणार आहे.

एमआयएम आणि काँग्रेस पक्षाने विरोधी पक्ष नेते पदावर दावा सांगितला असला तरी यात कायदेशीर बाबी तपासाव्या लागणार आहेत. नांदेड महापालिकेत भाजप 45, शिवसेना 04, काँग्रेस 10, वंचित 5, एमआयएम 14, राष्ट्रवादी काँग्रेस 2, तर 1 अपक्ष असे चित्र आहे. काँग्रेस-वंचित आघाडीची निवडणूक पूर्व आघाडी असल्यामुळे या पक्षाचे संख्याबळ हे एकत्रित गृहीत धरले जाणार हे स्पष्ट आहे. दुसरीकडे एमआयएमने 14 जागांसह आम्ही दुसऱ्या क्रमांकाचा पक्ष आहोत, असा दावा केला आहे. यामुळे आता विरोधी पक्ष नेता काँग्रेस-वंचित आघाडीचा होणार की एमआयएमचा? हे पाहणे महत्त्वाचे ठरणार आहे.

FAQs :

1. नांदेड वाघाळा महापालिकेत कोणत्या पक्षाला बहुमत मिळाले?
भाजपने ४५ नगरसेवकांसह स्पष्ट बहुमत मिळवत सत्ता स्थापन केली आहे.

2. या विजयात कोणत्या नेत्याची भूमिका महत्त्वाची मानली जाते?
खासदार अशोक चव्हाण यांच्या नेतृत्वाखाली भाजपला हा विजय मिळाल्याचे मानले जाते.

3. विरोधी पक्षनेतेपदासाठी कोणत्या पक्षांमध्ये स्पर्धा आहे?
काँग्रेस-वंचित बहुजन आघाडी आणि एमआयएम यांच्यात स्पर्धा आहे.

4. अब्दुल गफार यांनी कोणाची भेट घेतली?
अब्दुल गफार यांनी मुंबईमध्ये खासदार अशोक चव्हाण यांची भेट घेतल्याची चर्चा आहे.

5. अशोक चव्हाण यांनी भाजपमध्ये प्रवेश कधी केला?
लोकसभा निवडणुकीच्या काही दिवस आधी त्यांनी भाजपमध्ये प्रवेश केला.