Parbhnai News : निवडणुकीचा बिगुल वाजला तरी महायुती-आघाडीचे ठरेना! परभणीत मंत्री मेघना बोर्डीकरांसह दिग्गजांचा कस लागणार

Marathwada Political News : नगरपरिषदांच्या निवडणूकांचा बिगुल वाजताच जिल्ह्यातील सात नगरपरिषदांची रणधुमाळी सुरु झाली आहे. अनेक ठिकाणी महायुतीतील घटकपक्षांत संघर्षाची चिन्हे असून येत्या काही दिवसात पक्षांतराचे सोहळे रंगणार तर राज्य पातळीवर कट्टर विरोधक असलेले पक्ष या निवडणूकीत एकत्र येण्याची चिन्हे आहेत.पालकमंत्री मेघना बोर्डीकर, खासदार संजय जाधव, फौजिया खान, आमदार राजेश विटेकर, रत्नाकर गुट्टेंसह माजीमंत्री सुरेश वरपुडकर, माजी आमदार बाबाजनी दुर्राणी, विजय गव्हाणे यांच्यासह शिवसेना,वंचित बहुजन आघाडीच्या नेत्यांची प्रतिष्ठा या निमित्ताने पणाला लागली आहे.

राज्य निवडणूक आयोगाने मंगळवारी (ता.चार) निवडणूकांचे वेळापत्रक जाहिर केले आहे. निवडणूकीच्या या पहिल्या टप्प्यात जिल्ह्यातील सातही नगरपरिषदांत निवडणूक ही अटीतटीची व संघर्षाची होणार आहे. भाजपच्या पालकमंत्री मेघना बोर्डीकरांसह विविध पक्षाच्या नेत्यांनी निवडणूक स्वतंत्र लढविण्याचा निर्धार केल्याचे चित्र आहे. त्यामुळे घटक पक्षांत संघर्षाची चिन्हे आहेत. जिंतुर विधानसभा मतदारसंघात जिंतूर व सेलू नगरपरिषद, गंगाखेड व पूर्णा तर पाथरी, सोनपेठ व मानवत या नगरपरिषदांच्या निवडणूका होणार आहेत.

त्यातही जिंतूर व सेलू नगरपरिषदेत पालकमंत्री मेघना बोर्डीकर विरुध्द राष्ट्रवादी काँग्रेसचे माजी आमदार विजय भांबळे यांच्यातून विस्तव जात नाही. त्यामुळे या दोन्ही ठिकाणी भाजप विरुध्द माजी आमदार विजय भांबळे व सर्व पक्ष लढतीचे चित्र आहे. या नगरपरिषदांत शिवसेना (यूबीटी), काँग्रेस व राष्ट्रवादी काँग्रेस शरदचंद्र पवार पक्ष यांचे अस्तित्व पणाला लागले तरी त्यांचा निवडणूकीतील सहभागच अनेकांचे मनसुबे उधळून लावणारा ठरु शकतो. या दोन्ही ठिकाणी भाजप विरुद्ध राष्ट्रवादी, शिवसेना, शिवसेना (यूबीटी), काँग्रेस, राष्ट्रवादी शरदचंद्र पवार पक्ष, काँग्रेसच्या एकत्रित लढण्याचे संकेत मिळत आहेत.

महायुती- आघाडी होणार का?

पाथरी विधानसभा मतदारसंघात सोनपेठ, पाथरी व मानवत नगरपरिषदा येतात. पाथरीत काँग्रेस विरुध्द महायुती तर मानवत व सोनपेठमध्ये राष्ट्रवादी काँग्रेस विरुध्द भाजप व इतर अशा लढती होण्याची शक्यता वर्तवली जात आहे. गंगाखेड मतदारसंघात गंगाखेड व पूर्णा येथील चित्र काहीसे संमिश्र आहे. कोणत्याच पक्षाला एकहाती सत्ता मिळण्याची शक्यता नाही. इथे ऐनवेळी काय समीकरणे जुळतील हे अद्याप स्पष्ट नाही.

आघाडीसाठी लिटमस टेस्ट

जिल्ह्यात काँग्रेसमधील मातब्बर मंडळींनी अन्य पक्षात प्रवेश घेतला आहे. तर राष्ट्रवादी काँग्रेस फुटल्यानंतर अनेक मातब्बरांनी अजित पवारांसोबत जाण्याचा निर्णय घेतला. शिवसेना (युबीटी)त खासदार, आमदार वगळता अनेक बड्या जुन्या नेत्यांनी शिवसेनेत (शिंदे) जाणे पसंत केले. त्यामुळे महाविकास आघाडीतील सर्व घटक पक्षांसाठी पालिका निवडणूक लिटमस टेस्ट ठरणार आहे.

FAQs

1. परभणीत कोणत्या पक्षांचं युतीचं गणित ठरत नाहीये?
महाराष्ट्रातील महायुती म्हणजे भाजप, शिवसेना (शिंदे गट) आणि एनसीपी (अजित पवार गट) यांचं स्थानिक स्तरावर अद्याप एकमत झालेले नाही.

2. मेघना बोर्डीकर कोण आहेत?
त्या परभणी जिल्ह्यातील भाजपच्या मंत्री असून राज्यात प्रभावशाली महिला नेत्यांपैकी एक आहेत.

3. निवडणूक कधी होणार आहे?
परभणीतील स्थानिक स्वराज्य संस्था निवडणुका 2025 च्या डिसेंबर दोन रोजी होत आहेत.

4. महायुतीत मतभेद का आहेत?
उमेदवारी वाटप, स्थानिक नेत्यांची प्रतिष्ठा आणि पक्षांमधील मतदारसंघीय संघर्षामुळे मतभेद वाढले आहेत.

5. परभणीतील निवडणुकीचा निकाल कशावर अवलंबून असेल?
स्थानिक पातळीवरील नेत्यांची कार्यशैली, मतदारांतील विश्वास आणि आघाडीचं एकत्रित रणनिती यावर निकाल अवलंबून राहील.