Sanjay Shirsat News : इडापिडा टळो, संकट दूर होवो ; संजय शिरसाट कुटुंबासह शनिदेवाच्या दर्शनाला!

Shivsena News : राज्याचे सामाजिक न्याय मंत्री तथा छत्रपती संभाजीनगर जिल्ह्याचे पालकमंत्री संजय शिरसाट सध्या अनेक अडचणीतून वाटचाल करत आहेत. कौटुंबिक आणि राजकीय अशा दोन्ही पातळीवर संकटांचा सामना करणाऱ्या संजय शिरसाट यांनी नुकतेच शनिशिंगणापूर येथे शनिदेवाचे दर्शन घेतले. सहकुटुंब अभिषेक आणि तैलाभिषेक करून दर्शन घेत इडापिडा टळू दे, अशी प्रार्थना त्यांनी केली.

शिवसेनेचे नेते तथा राज्याचे उपमुख्यमंत्री एकनाथ शिंदे यांचे विश्वासू सहकारी म्हणून ओळख असलेल्या संजय शिरसाट (Sanjay Shirsat) यांच्या मागे सध्या साडेसाती लागल्याचे चित्र आहे. कुटुंबाच्या नावावर बेकायदा मालमत्ता खरेदी केल्याचा आरोप त्यांच्यावर विरोधकांकडून झाला. छत्रपती संभाजीनगर शहरातील हॉटेल व्हिट्स खरेदी प्रकरणात विरोधक तुटून पडल्यावर शिरसाट यांनी या खरेदी- विक्री प्रक्रियेतून माघार घेतली होती.

राजकीय दबाव आणून हॉटेल खरेदीसाठी रिंग करण्यात आल्याचा आरोप विरोधकांनी त्यांच्यावर केला. (Shivsena) नुकत्याच झालेल्या विधिमंडळाच्या पावसाळी अधिवेशनात विरोधकांनी हा मुद्दा उचलून धरला आणि अखेर मुख्यमंत्री देवेंद्र फडणवीस यांनी या हॉटेल खरेदी- विक्री प्रक्रियेची उच्चस्तरीय चौकशी जाहीर केली. हे प्रकरण शांत होत नाही तोच संजय शिरसाट यांचा बेडरूम मधील अर्धनग्न अवस्थेतील व्हिडिओ व्हायरल झाला.

यामध्ये संजय शिरसाट धूम्रपान करताना दिसत आहेत, तर त्यांच्या शेजारी नोटांनी भरलेली बॅग. यावरून विरोधकांनी विधिमंडळाच्या दोन्ही सभागृहात शिरसाट यांना घेरण्याचा प्रयत्न केला. तत्पूर्वी छत्रपती संभाजीनगर एमआयडीसीतील औद्योगिक भूखंड आरक्षण बदलून मुलगा सिद्धांत शिरसाट याच्या नावे मद्य निर्मिती कारखान्यासाठी खरेदी केल्याचा आरोप त्यांच्यावर झाला. आपण केलेला व्यवहार कसा नियमाला धरून आहे, हे शिरसाट यांनी वारंवार सांगण्याचा प्रयत्न केला. मात्र हे प्रकरण त्यांचा पिच्छा काही सोडत नाहीये.

त्याआधी सिद्धांत शिरसाट यांच्यावर विवाहित महिलेने मानसिक आणि शारीरिक छळ केल्याचा आरोप करत न्यायालयाकडून त्यांना नोटीस पाठवली होती. मात्र हे प्रकरण संजय शिरसाट यांनी हाताळले आणि संबंधित महिलेने आपली कुठलीही तक्रार नसल्याचे सांगत आमचा हा कौटुंबिक वाद आम्ही सोडवू, असे म्हणत पाठवलेली नोटीसही रद्द केली. अशा एकापाठोपाठ एक आलेल्या संकटांवर मात करत मंत्री संजय शिरसाट आणि त्यांचे कुटुंब वाटचाल करत आहे.

शिरसाट यांचे मंत्रीपद जाती की काय? अशी चर्चाही राजकीय वर्तुळात सुरू झाली. या सर्व पार्श्वभूमीवर संजय शिरसाट यांनी नुकतेच सहकुटुंब शनिशिंगणापूर येथे जाऊन शनिदेवाचे दर्शन घेतले. यावेळी त्यांच्यासोबत पत्नी विजया, मुलगा सिद्धांत, मुलगी हर्षदा हे होते. उदासी महाराज मठात अभिषेक केल्यानंतर शिरसाट कुटुंबीयांनी चौथाऱ्यावर जाऊन शनिदेवाला तैलाभिषेक केला.

संकटांची मालिका सुरू असल्याने ते टळावे यासाठी देवाचा धावा केला आहे. देवदर्शनातून समाधान मिळते म्हणून सहकुटुंब शनि दर्शनाला आल्याचे संजय शिरसाट म्हणाले. राज्यभरात सध्या जे काही सुरू आहे ते अत्यंत चुकीचे आहे, मी काहीही चुकीचे वागलो नाही तरीही मला टारगेट करण्यात आले, असा दावा संजय शिरसाट यांनी यावेळी माध्यमांशी बोलताना केला.