Sanjay Shirsat controversy : सरकारचा पैसा आहे, आपल्या बापाचे काय जातेय? संजय शिरसाटांचे पुन्हा वादग्रस्त विधान

Chhatrapti Sambhajinagar News : महायुती सरकारमधील मंत्र्यांना वादग्रस्त विधाने टाळण्याचा सज्जड दम मुख्यमंत्री देवेंद्र फडणवीस यांनी बुधवारी पार पडलेल्या कॅबिनेट बैठकीप्रसंगी महायुतीमधील तीन पक्षांच्या मंत्र्यांना दिल्या होत्या. अशास्वरुपाच्या वक्तव्याने सरकारची प्रतिमा मालिन होत असल्याचे सांगून यापुढे वादग्रस्त वक्तव्य करणाऱ्याची गय करणार नसल्याचा इशारा देऊन दोनच दिवस झाले आहेत.

दुसरीकडे सभागृहात रमी खेळून वादग्रस्त वक्तव्य करणाऱ्या कृषिमंत्री माणिकराव कोकाटे यांचे एक दिवसापूर्वीच खाते बदल केला असतानाच आता सामाजिक न्याय मंत्री संजय शिरसाट यांनी पुन्हा एकदा मुक्ताफळे उधळली आहेत. त्यामुळे आता सीएम फडणवीस काय कारवाई करणार याकडे लक्ष लागले आहे.

छत्रपती संभाजीनगर येथील कार्यक्र्मप्रसंगी बोलताना राज्याचे सामाजिक न्याय मंत्री संजय शिरसाट (Sanjay Shirsat) यांनी वादग्रस्त विधान केले आहे. वसतिगृहासाठी लागेल तेवढा निधी देतो. तुम्ही पाच, दहा, पंधरा कोटी रुपयांचा निधी मागितला तर निधी लगेच मंजूर करतो. सरकारचा पैसा आहे, आपल्या बापाचे काही जात नाही, असे विधान मंत्री संजय शिरसाट यांने केले आहे. त्यामुळे शिरसाट पुन्हा एकदा वादाच्या भोवऱ्यात अडकले आहेत.

गेल्या काही दिवसापासून मंत्री संजय शिरसाट यांचा वाद पाठ सोडण्याचे नाव घेत नाही. विधिमंडळाचे पावसाळी अधिवेशन सुरु झाल्यापासून ते कोणत्या ना कोणत्या कारणाने चर्चेत आहेत. विशेष म्हणजे दोन दिवसापूर्वीच उपमुख्यमंत्री एकनाथ शिंदे यांनी दिल्ली दौरा केला होता. यावेळी त्यांच्या शिवसेनेतील (Shivsena) मंत्र्यांनी केलेल्या वादग्रस्त विधाने व वर्तनानंतर त्यांच्यावर कारवाई करू नये, अशी विनंती त्यांनी भाजपच्या हायकमांडची भेट घेऊन केली होती. त्यामुळे मंत्री शिरसाट, योगेश कदम या दोघांना क्लीन चिट मिळाली असल्याची चर्चा होती.

त्यातच आता पुन्हा एकदा वादग्रस्त वक्तव्य करून शिरसाट यांनी वाद अंगावर ओढवून घेतला आहे. यापूर्वीही अधिवेशनावेळी शिरसाट यांना टार्गेट करण्यात आले होते. तर त्यांना इडीकडून नोटिसही आली होती. त्याशिवाय मुंबईतील बंगल्यात पैसे असल्याची बॅग घेऊन बसल्याचा व्हिडिओ व्हायरल झाला होता.

या व्हायरल झालेल्या व्हिडिओची चर्चा मोठ्या प्रमाणात झाली होती. त्यामुळे विरोधकांनी राजीनाम्याची मागणी केली होती. त्यासोबतच छत्रपती संभाजीनगर येथील एका हॉटेलच्या लिलावात त्यांच्या मुलाने घेतलेल्या सहभागामुळे विरोधकांनी टीका केली होती. त्यामुळे त्यांच्या अडचणीत भरच पडली आहे.