Shivsena-BJP News : युतीचा विसर पडला? राष्ट्रवादीला हाताशी धरत शिवसेनेनं उलटवला डाव; माजी आमदार ज्ञानराज चौंगुलेंचा भाजपला दणका

Umarga Politics News : उमरगा, लोहारा पंचायत समितीवर सभापती, उपसभापती बसवण्यासाठी शिवसेनेचे माजी आमदार ज्ञानराज चौगुले यांनी केलेल्या राजकीय खेळीने मित्रपक्ष भाजपाच घायाळ झाला आहे. उमरगा पंचायत समितीत महायुतीचे सरळ बहुमत असताना सभापतीपदासाठी शिवसेना व भाजपमध्ये संघर्षाची ठिणगी पेटली. शिवसेनेनेही आपला राजकीय रंग दाखवत भाजपची खेळी उलटवून टाकली.

पक्षांतरामुळे सत्तेची धुळवड, निष्ठेचा बेरंग झाल्याची स्थिती उमरगा तालुक्याच्या राजकारणात पहायला मिळाल्याची चर्चा यानंतर रंगू लागली आहे. काँग्रेसचे प्राबल्य असलेल्या तालुक्यात नेत्यांच्या पक्षांतरामुळे राजकीय दिशा बदलली आहे. स्थानिक स्वराज्य संस्थेच्या निवडणुकीत भाजपला संधी असताना पक्षांतर्गत विरोध अन् पाडापाडीचे राजकारण झाले.

जिल्हा परिषद, पंचायत समितीची निवडणूक महायुती म्हणून झाली खरी, पण एकमेकांचे पाय ओढण्यात शक्ती खर्ची घातल्याने त्याचा फटका तुरोरी, कुन्हाळी आणि आलूर जिल्हा परिषद गटांमध्ये भाजपला बसला. उमरगा तालुक्यातील पंचायत समिती निवडणुकीत महायुतीला बहुमत असतानाही सभापतीपदावरून शिवसेना व भाजपमध्ये स्पर्धा निर्माण झाली.

तडजोडीला उशीर झाल्याने भाजपाच्या हातून संधी गेली. शिवसेनेने उमरगा पालिकेतील काँग्रेसच्या फॉर्म्युल्यावर नाराज राष्ट्रवादी व भाजपच्या मुळज गटाला सोबत घेत पंचायत समितीवर वर्चस्व मिळविले. सभापतीपद बिनविरोध झाले, तर भाजप समर्थक अपक्ष रेखा इंगळे यांना उपसभापतीपद मिळाले. लोहारा पंचायत समितीतही शिवसेनेने भाजपला दूर ठेवले. या राजकीय खेळीमुळे भाजपमधील अंतर्गत वाद आता तीव्र होण्याची शक्यता आहे.

चौगुलेंचा मास्टर स्ट्रोक, मुलगी झाली सभपाती

माजी आमदार, शिवसेनेचे उपनेते ज्ञानराज चौगुले यांना मुलगी आकांक्षा हिला सभापती पदावर बसवत मास्टर स्ट्रोक लगावला. विजयी मिरवणुकीत ते मुलीसोबत नाचले. 2024 मध्ये झालेल्या विधानसभा निवडणुकीत चौगुले यांना अपयश आले असले तरी मतदारसंघातील आपले राजकिय वजन अजूनही आहे, हे त्यांनी या निवडणुकीतून दाखवून दिले. उमरगा नगरपालिका, उमरगा व लोहारा पंचायत समितीवरील सत्तेमुळे त्यांच्या कार्यकर्त्यांमध्ये उत्साहाचे वातावरण आहे.