Santosh Deshmukh Case : धक्कादायक! 'तुमचाही संतोष देशमुख करू...'; शिंदेंच्या आमदाराच्या पुतण्यांना धमकी, मराठवाड्यात चाललंय तरी काय?

Dharashiv News 24 Dec : बीड जिल्ह्यातील केजमधील मस्साजोग गावचे सरपंच संतोष देशमुख यांच्या निघृण हत्येमुळे संपूर्ण महाराष्ट्राला हादरून गेला आहे. सध्या या प्रकरणाची राज्यभरात चर्चा सुरू असून देशमुख यांच्या मारेकऱ्यांना कठोर शिक्षा करण्याची मागणी केली जात आहे.

शिवाय या हत्या प्रकरणामुळे कायदा आणि सुव्यवस्थेवर देखील प्रश्न उपस्थित केले जात आहेत. अशातच आणखी एक धक्कादायक घटना समोर आली आहे. ती म्हणजे माजी मंत्री आणि एकनाथ शिंदेंच्या शिवसेनेचे आमदार तानाजी सावंत (Tanaji Sawant) यांच्या दोन पुतण्यांना संतोष देशमुख यांच्याप्रमाणे मारण्याची धमकी देण्यात आली आहे. या धमकीमुळे सध्या धाराशिवमध्ये एकच खळबळ उडाली आहे.

नेमकं प्रकरण काय?

जिल्हा परिषदेचे माजी उपाध्यक्ष धनंजय सावंत आणि तेरणा कारखान्याचे कार्यकारी संचालक केशव सावंत या दोघांना एक धमकीची चिठ्ठी पाठवण्यात आली आहे. ही चिठ्ठी साखर कारखान्यासाठी ऊस वाहतुक करणाऱ्या एका ट्रॅक्टर ड्रायव्हरमार्फत बंद पाकीटातून 100 रुपयांच्या नोटेसोबत देण्यात आली आहे.

कारखान्याला ऊस वाहतूक करणारा एक ट्रॅक्टर तेर-ढोकी रस्त्यावर मुळेवाडी पाटीजवळ दुचाकी वरुन आलेल्या दोघांनी अडवला. यावेळी त्यांनी ट्रॅक्टर ड्रायव्हरकडे एक बंद पाकीट देत ते कारखान्यावर सुरक्षा रक्षकाकडे द्यायला सांगितलं. दरम्यान, हे बंद पाकीट उघडलं असता त्यामध्ये, 'तुमचाही संतोष देशमुख मस्साजोग केला जाईल', असा मजकूर लिहिला होता.

दरम्यान, या धमकी प्रकरणी तेरणा कारखान्याचे शेतकी अधिकाऱ्यांनी ढोकी पोलिसात स्टेशनमध्ये तक्रार दिल्यानंतर पोलिसांनी अदखलपात्र गुन्हा दाखल करत पुढील तपासाला सुरूवात केली आहे. मात्र, या धमकीमुळे आता धाराशिवमध्ये एकच खळबळ उडाली असून धमकी देणाऱ्यांवर पोलिस काय कारवाई करणार हे पाहणं महत्वाचं ठरणार आहे.