Sudarshan Ghule : तारीख पे तारीख! सुदर्शन घुलेला पुन्हा न्यायालयीन कोठडी, व्हॉईस सॅम्पलमुळे घुलेच्या अडचणी वाढवणार?

Beed News : संतोष देशमुख हत्याकांडासह दोन कोटी खंडणी प्रकरणांतील प्रमुख प्रमुख संशयित आरोपी सुदर्शन घुले याची आज पोलीस कोठडी संपली. यामुळे त्याला केज न्यायालयात हजर करण्यात आले. यावेळी तपास अधिकाऱ्यांनी पोलीस कोठडीची मागणी केली होती. यामुळे न्यायालय त्याला न्यायालयीन कोठडी सूनवणार? की पोलीस कोठडीत धाडणार याकडे बीडसह राज्याचे लक्ष लागले होते. आज (ता.15) झालेल्या सुनावणी दरम्यान न्यायालयाने सुदर्शन घुले याला 14 दिवसांची न्यायालयीन कोठडी सुनावली आहे.

बीड जिल्ह्यातील मस्साजोगचे (ता. केज) सरपंच संतोष देशमुख यांची अपहरण करून निर्घृण हत्या करण्यात आली होती. तर ही हत्या दोन कोटींच्या खंडणी प्रकरणामुळे करण्यात आल्याचे नंतर उघड झाले होते. याप्रकरणी सुदर्शन घुले याला अटक झाली आहे. सध्या तो न्यायालयीन कोठडीत असून आज त्याची न्यायालयीन कोठडी संपणार होती.

यादरम्यान सीआयडीचे उपअधीक्षक अनिल गुजर यांनी केज न्यायालयाच्या प्रथम वर्ग न्यायाधीश एस व्ही पावसकर यांच्या न्यायालयात हजर राहत पोलीस कोठडीची मागणी केली होती. त्याप्रमाणे 12 फेब्रुवारी केज न्यायालयाने सुदर्शन घुले याला दि. 14 फेब्रुवारीपर्यंत पोलीस कोठडी सुनावली होती. ती आज संपली.

त्याला आज न्यायालयात हजर करण्यात आले होते. सुदर्शन घुले हा संतोष देशमुख हत्या प्रकरणातील प्रमुख संशयित आरोपी आहे. पोलीस कोठडीत पोलिसांनी त्याच्या आवाजाचे व्हॉईस सँपल्स घेतले आहेत. ते तपासणीसाठी फॉरेन्सिक लॅबला पाठविण्यात येणार आहेत.

14 दिवसांची न्यायालयीन कोठडी

दरम्यान सुदर्शन घुले याला दोन कोटी खंडणी प्रकरणांमध्ये 14 दिवस न्यायालयीन कोठडी न्यायालयाने सुनावली आहे. सुदर्शन घुलेला बीडच्या जिल्हा कारागृहामध्ये हलवण्यात आले असून तो 14 दिवस असणार आहे. जिल्हा व सत्र न्यायालयामध्ये आरोपीचे वकील अनंत तिडके तर सरकारी वकील जे बी शिंदे यांनी युक्ती वाद केला. यानंतरच घुलेला न्यायालयाकडून 14 दिवसांची न्यायालयीन कोठडी सुनावण्यात आली आहे.