Vaibhavi Deshmukh : जिद्दीला सलाम! बारावीत 85 टक्के मिळवलेल्या सरपंच संतोष देशमुखांच्या मुलीने NEET च्या परीक्षेतही मिळवलं घवघवीत यश

Beed News, 15 June : मस्साजोगचे सरपंच संतोषं देशमुख यांची मुलगी वैभवी देशमुखने NEET सारख्या कठीण परीक्षेत घवघवीत यश मिळवलं आहे. या कामगिरीबद्दल तिच्यावर सर्व स्तरातून कौतुकाचा वर्षाव केला जात आहे.

वैभवीचा नीट परीक्षेचा निकाल जाहीर झाला आहे. या परिक्षेत तिने 147 गुण मिळवले आहेत. संतोष देशमुख यांच्या हत्येमुळे संपूर्ण महाराष्ट्र हादरला होता. त्यांची अतिशय निर्घृणपणे हत्या करण्यात आली होती.

या हत्येचा घटनाक्रम ऐकून सर्वजण हळहळले होते. तर संतोष देशमुख यांच्या कुटुंबियांना झालेला त्रास शब्दात व्यक्त न करता येण्यासारखा आहे. मात्र, या सर्व कठीण काळात देखील सरपंच संतोष देशमुख यांची मुलगी वैभवीने बारावीची आणि नीटची परीक्षा दिली होती.

बारावीच्या परीक्षेमध्ये तिने 85.33 टक्के गुण मिळवले आहेत. त्यानंतर आता तिने NEET परीक्षा उत्तीर्ण केली आहे. कुटुंबावर दुखाचा डोंगर कोसळला असताना आणि वडिलांचं छत्र हरपलं असताना देखील तिने मिळवलेले यश अतुलनीय असल्याच्य प्रतिक्रिया राजकीय नेत्यांकडून येत आहेत.

अशातच शरद पवारंच्या राष्ट्रवादीच्या खासदार सुप्रिया सुळे यांनी वैभवीला शुभेच्छा दिल्या आहेत. एक्सवर केलेल्या पोस्टमध्ये सुळेंनी लिहिलं की, मस्साजोगचे सरपंच स्व. संतोष देशमुख यांची कन्या वैभवी हीने NEET परीक्षा उत्तीर्ण केली. तिचे हे यश सर्वांसाठी प्रेरणादायी आहे. अतिशय प्रतिकूल परिस्थितीत तिने ही परिक्षा देऊन उत्तम यश संपादन केले. या यशाबद्दल तिचे हार्दिक अभिनंदन आणि पुढील वाटचालीसाठी खुप खुप शुभेच्छा.

तर शिंदेंच्या शिवसेनेचे नेते आणि राज्याचे उद्योग मंत्री उदय सामंत यांनी देखील वैभवीचं अभिनंदन केलं प्रतिकूल परिस्थितीवर मात करत, जिद्द, चिकाटी आणि परिश्रमाच्या जोरावर वैभवीने हे यश संपादन केले आहे. तिच्या या मेहनतीचे व धैर्याचे खरोखरच कौतुक वाटते. वैभवी, तुला मनःपूर्वक अभिनंदन आणि तुझ्या पुढील वाटचालीसाठी खूप खूप शुभेच्छा, अशा शब्दात सावंत यांनी वैभवीला शुभेच्छा दिल्या आहेत.