Ajit Pawar, Fadnavis : सकाळी अजितदादा संतापले अन् दुपारी सीएम फडणवीसांची थेट घोषणाच

Pune News : गेल्या वर्षीच्या पालखी सोहळ्या दरम्यान तत्कालीन मुख्यमंत्री एकनाथ शिंदे यांनी पालख्यांना 20 हजाराचा अनुदान देऊ केले होते. यंदा मात्र त्याबाबत अद्याप राज्य सरकारने कोणतीही घोषणा केली नसल्यामुळे सरकारला वारकऱ्यांचा विसर पडला आहे का? असा प्रश्न विचारला असता शनिवारी सकाळी उपमुख्यमंत्री अजित पवार चांगलेच संतापल्याचे पाहायला मिळाले. त्यानंतर दुपारी मुख्यमंत्री देवेंद्र फडणवीस यांनी याबाबत एक महत्त्वाचा निर्णय घेतला आहे.

शनिवारी सकाळी पुणे दौऱ्यावर असताना अजित पवार (Ajit Pawar) यांना पत्रकारांनी वारकऱ्यांच्या अनुदानाबाबत विचारले असता अजित पवार चांगलेच संतापले. आम्हाला कुणाचा विसर पडला नाही, तुम्हाला काही माहित नसते काही नाही, असे म्हणत मुख्यमंत्री फडणवीस याबाबत निर्णय घेणार असल्याचे त्यांनी स्पष्ट केले होते.

त्यानंतर दुपारी मुख्यमंत्री देवेंद्र फडणवीस (Devendra fadnavis) यांनी मुंबई येथे बैठक घेऊन पालखी सोहळ्यासाठी वारकऱ्यांना उत्तम सुविधा देण्याचे निर्देश दिले. प्रशासनातर्फे व्यापक स्तरावर नियोजन करण्यात येत असल्याची माहिती देखील देवेंद्र फडणवीस यांनी दिली. आषाढी एकादशी यात्रा 2025 साठी मानाच्या 10 पालख्यांसोबतच्या 1 हजार 109 दिंड्यांना प्रती दिंडी 20 हजार रुपये अनुदान वितरीत करण्यास मान्यता देण्यात येत असल्याचा शासन निर्णय फडणवीस यांनी जाहीर केला.

गेल्या वर्षी आषाढी एकादशी यात्रा सन 2024 साठी मानाच्या 10 पालख्यांसोबत येणाऱ्या प्रत्येक दिंडीला 20 हजार रुपये इतके अनुदान सामाजिक न्याय व विशेष सहाय्य विभागामार्फत देण्याबाबत प्रशासकीय मान्यता देण्यात आली होती. त्यानुसार 2023-24 मध्ये विभागीय आयुक्त, पुणे यांच्याकडून एकूण 1 हजार 109 दिंड्यांची यादी प्राप्त झाली होती.

गेल्यावर्षी प्रमाणेच यावर्षीदेखील दिंड्यांना प्रतिदिंडी 20 हजार रुपये याप्रमाणे एकूण 2 कोटी 21 लाख 80 हजार रुपये अनुदान वितरीत करण्यात येणार आहे. त्याबाबतचा शासन निर्णय जाहीर केला आहे. अनुदान वितरीत करण्यास मान्यता देण्यात आली असल्याची माहिती फडणवीस यांनी दिली.