Vilas Ghule Murder Case : विलास घुले हत्या प्रकरणात भावाचे बेमुदत उपोषण 19 दिवसांनी स्थगित; अ‍ॅड. गुणरत्न सदावर्तेंच्या हस्ते ज्यूस घेतला!

Beed Protest News : विलास घुले हत्या प्रकरणात खासदार बजरंग सोनवणे यांचे चिरंजवी सौरभ सोनवणे याला अटक करा, या व इतर मागण्यांसाठी घुले कुटुंबीय गेल्या 19 दिवसापासून बीड जिल्हाधिकारी कार्यालयासमोर बेमुदत उपोषणाला बसले होते.

दरम्यान, विलास घुले यांच्या पत्नीने विष प्राशन केल्याने एकच खळबळ उडाली होती.

सौरभ सोनवणे याच्या अटकेच्या मागणीसाठी बीडमध्ये मोर्चाही काढण्यात आला. अ‍ॅड. गुणरत्न सदावर्ते (Gunratan Sadavarte), जयश्री पाटील हे या मोर्चात सहभागी झाले. दरम्यान, विलास घुले यांचे बंधू रमेश यांनी सुरू केलेले बेमुदत उपोषण आज स्थगित करण्यात आले. सदावर्ते यांच्या हस्ते ज्यूस घेत हे उपोषण तूर्तास मागे घेण्यात आले आहे.

विलास नवनाथ घुले हत्या प्रकरणात आरोपींना मोक्का लावण्यासह विविध मागण्यांसाठी मागील 19 दिवसांपासून बीड (BEED) जिल्हाधिकारी कार्यालयासमोर सुरू असलेले घुले कुटुंबीयांचे बेमुदत उपोषण अखेर शुक्रवारी (ता. 21) स्थगित करण्यात आले.

​या प्रकरणात निष्पक्ष चौकशी व्हावी आणि दोषींना कठोर शिक्षा व्हावी, यासाठी घुले कुटुंबीय आक्रमक पवित्रा घेऊन उपोषणाला बसले होते. शुक्रवारी या प्रकरणावरून ओबीसी समाजाचा प्रचंड विराट मोर्चा जिल्हाधिकारी कार्यालयावर धडकला होता. त्यानंतर अ‍ॅड. गुणरत्न सदावर्ते यांनी बीडमध्ये उपोषणस्थळी भेट दिली.

यावेळी उपोषणकर्त्यांशी आणि प्रशासकीय अधिकाऱ्यांशी सविस्तर चर्चा केल्यानंतर, मागण्यांसंदर्भात सकारात्मक पाठपुरावा करण्याचे आश्वासन देण्यात आले. यानंतर अ‍ॅड. सदावर्ते यांच्या हस्ते ज्यूस घेऊन रमेश घुले यांनी उपोषण स्थगित केले.

या प्रकरणात पीडित कुटुंबाला पूर्ण न्याय मिळेपर्यंत आणि दोषींवर कायदेशीर बडगा उगारला जाईपर्यंत आमचा न्यायालयीन व कायदेशीर लढा असाच सुरू राहील, असा इशारा सदावर्ते यांनी दिला. दरम्यान, सौरभ सोनवणे यांच्या अटकेची मागणी करत मोर्चेकरी आक्रमक झाले होते. एफआयआरमध्ये नोंद आणि सीडीआरमध्ये आढळलेल्या गोष्टीनंतरही सौरभ सोनवणेला अटक का केली जात नाही? असा सवाल आंदोलकांनी केला.