Maharashtra Politics : 'नितेश राणेंची वैचारिक उंची उभे राहिले तर लवंगा एवढी अन् बसले तर...', राज ठाकरेंच्या शिलेदाराचा टोला

Prakash Mahajan News : शिवसेना उद्धव बाळासाहेब ठाकरे पक्ष आणि मनसेच्या युतीच्या चर्चा सुरू आहेत. त्यामुळे राज-उद्धव ठाकरेंचे मनोमिलन होणार असल्याचे सांगितले जात आहे. मात्र, मंत्री नितेश राणे यांनी या युतीची थट्टा उडवत एकाकडे शु्न्य आमदार आहेत तर एकाकडे फक्त 20 आमदार आहेत. त्यामुळे त्यांच्या एकत्रित येण्याने फरक पडणार नसल्याचे म्हटले. नितेश राणेंच्या या वक्तव्याचा समाचार मनसे नेते प्रकाश महाजन यांनी घेतला आहे.

महाजन म्हणाले, 'नितेश राणे यांची वैचारिक उंची ते उभे राहिले तर लवंग येवढी आहे अन् बसले तर विलायची येवढी होते. त्यामुळे आम्ही त्यांना गांभीर्याने घेत नाही. ते त्यांच्या वैचारिक उंची आणि रुंदी प्रमाणे सल्ले देत असतात.'

राणे कुटुंबीयांना आपण भाजपचे फार निष्ठावान आहोत हे सातत्याने दाखवावे लागते. राज ठाकरे यांनी कोकणात जाऊन राणे यांच्यासाठी सभा घेतल्या होत्या. त्यासभेत मी देखील भाषण केले होते. सर्व राणेंना गांभीर्याने घ्यायला नको, असे देखील महाजन म्हणाले.

निलेश राणेंचे ट्विट डिलिट

नितेश राणे यांनी आपले मित्र पक्षांना उद्देशून टीका केली होती. भाजपचा मुख्यमंत्री सगळ्यांचा बाप असल्याचे नितेश म्हटले होते. त्यावरून नितेश यांनी जपून बोलावे, असा सल्ला देणारे ट्विट निलेश राणे यांनी केले होते. त्याला नितेश यांनी उत्तर देत तुम्ही टॅक्सी फ्री आहात, असा टोला लगावला होता. त्याला निलेश राणे काय उत्तर देणार याची उत्सुकता असतानाच निलेश राणे यांनी आपले ट्विटच डिलिज केले आहे.