Mumbai Municipal Election: महापालिका निवडणुकीच्या तोंडावर मोठी उलथापालथ! माजी आमदाराच्या मुलाची उद्धव ठाकरेंच्या शिवसेनेत एंट्री; समीकरण बदलणार?

Mumbai News : राज्यातील महापालिका निवडणुकीसाठी सात दिवसाचा कालावधी शिल्लक आहे. सर्वच पक्षाकडून प्रचारावर भर दिला जात आहे. सत्ताधारी व विरोधकांकडून केल्या जात असलेल्या आरोप-प्रत्यारोपामुळे वातावरण चांगलेच तापले आहे. टीका टिपणीमुळे प्रचाराचा जोर शिगेला पोहचला आहे. त्यातच आता मुंबईत काँग्रेसला मोठा धक्का बसला आहे. अंधेरी भागातील काँग्रेसचे माजी आमदार अशोक जाधव यांचा मुलगा कुणाल जाधव यांनी उमेदवारी न मिळाल्याने उद्धव ठाकरे यांच्या शिवसेनेत प्रवेश केला आहे.

महापलिका निवडणुकीसाठी 15 जानेवारीला मतदान होणार आहे. त्याचवेळी अंधेरी पश्चिममध्ये काँग्रेसला मोठा धक्का बसला आहे. काँग्रेसचे माजी आमदार अशोक जाधव यांचा मुलगा कुणाल जाधव यांनी ठाकरे गटाच्या शिवसेनेत प्रवेश केला आहे. कुणाल जाधव प्रभाग क्रमांक ६७ मधून निवडणूक लढण्याची तयारी करीत होते. मात्र, त्याठिकाणी उमेदवारी न मिळाल्याने काँग्रेस नेतृत्वावर नाराज असलेले कुणाल जाधव यांनी अखेर उद्धव ठाकरे यांच्या शिवसेनेत प्रवेश करण्याचा निर्णय घेतला.

शिवसेना ठाकरे गटाचे नेते व माजी मंत्री अनिल परब यांच्या मध्यस्थीने मातोश्रीवर पक्षप्रमुख उद्धव ठाकरे यांच्या हस्ते कुणाल जाधव यांनी शिवबंधन बांधत ठाकरेसेनेत अधिकृत प्रवेश केला. या प्रवेशामुळे अंधेरी पश्चिममधील काँग्रेसच्या गोटात अस्वस्थता पसरली असून महापालिका निवडणुकीच्या पार्श्वभूमीवर हा काँग्रेससाठी मोठा धक्का मानला जात आहे.

मुंबईतील महापालिका निवडणुकीसाठी महायुती व ठाकरे बंधूंच्या युतीमध्ये मोठी रस्सीखेच पाहवयास मिळत आहे. त्यातच काँग्रेस (Congress) व वंचित आघाडीची युती सोबतच अजित पवार यांची राष्ट्रवादी काँग्रेस मैदानात उतरली आहे. त्यामुळे या निवडणुकीत चुरस पाहवयास मिळत आहे. ऐन निवडणुकीच्या तोंडावर पक्षप्रवेश होत असल्याने उत्सुकता शिगेला पोहचली आहे.

दरम्यान, राज्यभरात भाजपकडून 'ऑपरेशन लोटस' राबविले जात आहे. हे ऑपरेशन लोटस आता अंबरनाथ नगरपालिकेत सत्तेत येण्यासाठी राबवले जात आहे. काँग्रेसने भाजपसोबत हातमिळवणी केल्याने बुधवारी दुपारी तडकाफडकी 12 नगरसेवक निलंबित केले होते. आता निलंबित करण्यात आलेल्या या 12 नगरसेवकानी गुरुवारी भाजपमध्ये प्रवेश केला आहे.