Murlidhar Mohol : 'त्या' आंदोलकांना वेटर्स, सफाई कर्मचाऱ्यांनीच झोडपले! मोहोळ म्हणतात, जसे त्यांचे नेते राहुल गांधी तसे कार्यकर्ते...

Congress Protest AI Summit Delhi : देशाच्या राजधानीतील प्रगती मैदान येथील भारत मंडपम मध्ये सुरू असलेल्या जागतिक एआय इम्पॅक्ट समिटमध्ये भारतीय युवक काँग्रेसच्या कार्यकर्त्यांनी अचानक आंदोलन केले. यामुळे मोठा गोंधळ निर्माण झाला. यानंतर राष्ट्रीय युवक काँग्रेसचे अध्यक्ष उदय भानू चीब यांनाही अटक करण्यात आली आहे.

या सगळ्या घटनेनंतर पुण्यासह अनेक ठिकाणी युवक काँग्रेसच्या कार्यकर्त्यांनी आंदोलन करत भाजप सरकारचा निषेध केल्याचे पाहायला मिळाले. यामुळे भाजप विरुद्ध काँग्रेस असा संघर्ष पेटला असतानाच या घटनेबाबत भाजपचे केंद्रीय मंत्री मुरलीधर मोहोळ यांनी भाष्य केले आहे. या घटनेवर बोलताना त्यांनी काँग्रेस नेते राहुल गांधी यांच्यावर सडकून टीका केली आहे.

माध्यमांशी बोलताना केंद्रीय मंत्री मुरलीधर मोहोळ म्हणाले, एखाद्या राजकीय पक्षाची संस्कृती काय असते ही त्या पक्षाच्या नेत्याच्या वर्तनातून दिसत असते. राहुल गांधी जेव्हा जेव्हा विदेशात जातात तेव्हा तेव्हा ते आपल्या देशाचा आणि संविधानाचा अपमान करत असतात. जिथे त्यांना जाण्याची संधी मिळते तिथे ते आपल्या देशाबाबत वाईटच बोलून येतात.

त्यामुळे त्यांच्या पक्षाच्या कार्यकर्त्यांकडून आपण वेगळी अशी अपेक्षा करू शकत नाही. आज भारतामध्ये एआय समिटच्या निमित्ताने विविध देशातील प्रतिनिधी उपस्थित राहिले आहेत. एवढ्या मोठं आयोजन भारतात करण्यात आलं आहे ही देशासाठी अभिमानाची गोष्ट आहे.

आणि अशा वेळेला या समिटच्या ठिकाणी विचित्र पद्धतीने येणं निदर्शन करणे चुकीचं होतं. त्यामुळे त्या ठिकाणी त्यांना सामान्य लोकांनीच चोप दिला आहे. इथे विरोध करणारी कोणतीही सरकारी यंत्रणा नव्हती तर त्या ठिकाणी काम करणारे वेटर्स आणि सफाई कर्मचाऱ्यांनीच त्या आंदोलनकर्त्यांना मारलं आहे.

यातून हे स्पष्ट दिसतं की या घटनेचा सर्व स्तरातून देशभरात निषेध करण्यात येत असून सामान्य लोकांमध्ये याबाबत चीड आहे. त्यामुळे ही सर्व काँग्रेस कार्यकर्त्यांची कृती पाहिल्यानंतर जसा नेता तसेच कार्यकर्ते असंच म्हणणं योग्य ठरेल असं मुरलीधर मोहोळ यावेळी म्हणाले.