NCP Politics : चाकणकरांच्या राजीनाम्याने पाच महिला नेत्यांची नावांची चर्चा, सुनेत्रा पवार देणार प्रदेशाध्यक्षपदी संधी?

NCP News : अशोक खरात प्रकरणानंतर रुपाली चाकणकर यांनी महिला आयोगाच्या अध्यक्षपदापाठोपाठ राष्ट्रवादी काँग्रेस महिला प्रदेशध्यक्षपदाजा राजीनामा दिला आहे. रुपाली चाकणकर यांनी गुरुवारी रात्री आपल्या राजीनाम्याची माहिती सोशल मीडियाद्वारे दिली. चाकणकरांच्या राजीनाम्याने राष्ट्रवादी काँग्रेस महिला प्रदेशध्यक्षपदी कोणची निवड होणार याची चर्चा सुरू झाली आहे.

'साम टिव्ही'ने सुत्रांच्या हवाल्याने दिलेल्या वृत्तानुसार पाच महिला नेत्यांची नावे चर्चेत आहेत. त्यामध्ये सना मलिक, सरोज अहिरे, वैशाली नागवाडे, राजलक्ष्मी भोसले आणि प्रतिभा शिंदे यांची नावे आघाडीवर आहेत.

या पाच नेत्यांपैकी एका महिला नेत्याची निवड ही राष्ट्रवादी काँग्रेस महिला प्रदेशाध्यक्ष होण्याची शक्यता आहे. महिला नेत्याचे नाव निश्चित झाल्यानंतर त्यावर अंतिन निर्णय उपमुख्यमंत्री सुनेत्रा पवार या घेतील.

चाकणकर काय म्हणाल्या?

चाकणकर यांनी राजीनामा देताना सोशल मीडियावर पोस्ट करताना म्हटले होते की, खरात प्रकरणाबाबत पहिल्या दिवशीच मी माझी भूमिका स्पष्ट केली आहे.त्याच्या आर्थिक व्यवहारात,त्याच्या गैरकृत्यात दुरान्वये संबंध नाही,आजही तीच स्पष्ट व ठाम भूमिका आहे.तपासादरम्यान या सर्व बाबी निष्पन्न होतीलच. खोटे,असत्य व कुठलाही पुरावा नसताना जे आरोप माध्यमांमधून होत आहेत,ते वेदनादायक आहे.सत्य प्रखरतेने सिद्ध होईलच. हा तपास पारदर्शकपणे व निष्पक्षपणे व्हावा,ही माझी मागणी मी यापूर्वीच मा.मुख्यमंत्री, मा.उपमुख्यमंत्री,मा.पोलिस महासंचालक यांच्याकडे केली आहे.

राजीनामा नव्हे हकालपट्टी

रुपाली चाकणकर यांनी गुरुवारी रात्री आपला प्रदेशाध्यक्षपदाचा राजीनामा दिला. त्यांच्या राजीनाम्यानंतर ठाकरेंच्या शिवसेनेच्या उपनेत्या सुषमा अंधारे यांनी सोशल मीडियावर प्रतिक्रिया देताना म्हटले की, हा रुपाली चाकणकर यांचा राजीनामा नाही गच्छंती आहे. दरम्यान, यापूर्वी चाकणकर यांना अशोक खरात प्रकरणात सहआरोपी करत अटक करण्याची मागणी देखील त्यांनी केली होती.