OBC Politics : 'तीन वर्षांत मराठा समाजाला 25 हजार कोटी अन् ओबीसींना अडीच हजार...', ओबीसी नेता संतापला

Prakash Shedge News : हैदराबाद गॅजेटीअर लागू करण्याच्या निर्णयानंतर ओबीसी नेते आक्रमक झाले आहेत. सरकारच्या या जीआर विरोधात न्यायालयात जाण्याचा निर्णय त्यांनी घेतला आहे. याविषयी सांगताना ओबीसी नेते प्रकाश शेंडगे यांनी अजित पवारांवर निशाणा साधला. ते म्हणाले, मागील तीन वर्षात मराठा समाजाला 25 हजार कोटी देण्यात आले तर ओबीसींना मागील 25 वर्षात अडीच हजार कोटी देखील देण्यात आले नाही.

मराठा समाजाचे अर्थमंत्री आहेत. महाराष्ट्राचा खजिना मराठा समाजाला देण्यासाठीच आहे का? या खजिन्यावर महाराष्ट्रातील जनतेचा अधिकार आहे. सर्व समाजाला न्याय देण्याच्या भूमिकेत सरकार असलं पाहिजे. हे काय चाललंय? महाराष्ट्र सरकारच असे करत असेल तर कुणाकडे न्याय मागायचा? असा सवाल देखील त्यांनी उपस्थित केला.

सरकारच्या जीआरला कोर्टात आवाहन देण्याची तयारी आमची पूर्ण झाली आहे. आज एक याचिका दाखल होणार आहे आणि एक उद्या होणार आहेत. आमच्या सगळ्यांच्या वतीने समीर भुजबळ हे याचिका दाखल करत आहेत. मोठे वकील श्रीधर आणेसाहेब यांच्या नेतृत्वाखाली मोठी वकिलांची फौज नेमण्याचा निर्णय ओबीसीं नेत्यांच्या बैठकीत झाल्या आहे, असे देखील प्रकाश शेंडगे यांनी सांगितले आहे.

मराठा समाजाने जे शक्तिप्रदर्शन केले त्याच्या दबावाला बळी पडून हा जीआर काढण्यात आला. अपात्र मराठ्यांना देखील दाखले देण्याचा हा जीआर आहे. जोपर्यंत हा जीआर मागे घेतला जात नाही, यात सुधारणा होत नाही तोपर्यंत आंदोलन करणार, कुणबी समाज, कोळी समाज, भंडारी समाज, धनगर समाजाचे नेते यांची बैठक झाली. मराठा समाजाचे जे शक्तिप्रदर्शला उत्तर देण्यासाठी मोर्चा काढण्याची प्राथमिक चर्चा झाली, असे देखील शेंडगे यांनी सांगितले.