Vikas Aghadi News : लोकसभा आणि विधानसभा निवडणुकीत एकमेकांच्या विरोधात भूमिका घेऊन उतरलेल्या राष्ट्रवादी काँग्रेस आणि राष्ट्रवादी काँग्रेस शरदचंद्र पवार पक्ष आता कोल्हापूर जिल्ह्यातील चंदगडमध्ये एकत्र आले आहेत.
चंदगड नगरपंचायतीसाठी दोन्ही राष्ट्रवादी एकत्र येत राजर्षी शाहू विकास आघाडीची घोषणा केली आहे. नगरपंचायतीसह जिल्हा परिषदेतील चंदगड गटातील निवडणुक ते एकत्र लढणार आहेत.
वैद्यकीय शिक्षण मंत्री हसन मुश्रीफ यांच्या नेतृत्वाखाली राष्ट्रवादी काँग्रेसचे नेते माजी आमदार राजेश पाटील आणि राष्ट्रवादी काँग्रेस शरदचंद्र पवार पक्षाच्या नेत्या डॉ. नंदाताई बाभुळकर यांनी एकत्र येत आज गडहिंग्लज येथे पत्रकार परिषद घेत घोषणा केली.
चंदगडचे भाजपचे नेते आणि आमदार शिवाजीराव पाटील यांच्या विरोधात मोट बांधली असून आगामी काळात काँग्रेसचे काही पदाधिकारी आपल्या सोबत येणार असल्याचा दावा या आघाडीच्या नेत्यांनी केला आहे.
मंत्री हसन मुश्रीफ यांच्या नेतृत्वाखाली आज गडहिंग्लज कार्यालय येथे कार्यकर्त्यांचा मेळावा पार पडला असून चंदगड नगरपंचायतीची निवडणूक ही एकत्रपणे लढत असल्याची घोषणा केली. चंदगड नगरपंचायत निवडणुकीमध्ये दोन्ही राष्ट्रवादी एकत्र काम करणार असून पुरोगामी विचारमुळे एकत्र आल्याचे डॉ.बाभुळकर आणि राजेश पाटील यांनी या आघाडी केल्या संदर्भात स्पष्टीकरण दिले आहे.
दोघांच्या एकजुटीमुळे राष्ट्रवादीचा विजय होईल, असा मंत्री हसन मुश्रीफ यांनी दावा केला असून चंदगडमध्ये राजर्षी शाहू विकास आघाडी म्हणून निवडणुक लढणार असल्याचे सांगितले. विधानसभा निवडणुकीत डॉ. बाभुळकर या राष्ट्रवादी काँग्रेस शरदचंद्र पवार पक्षाच्या उमेदवार होत्या तर त्यांच्या विरोधात अजित पवारांच्या राष्ट्रवादी काँग्रेसकडून राजेश पाटील लढले होते. त्या ठिकाणी अपक्ष आमदार शिवाजीराव पाटील यांचा विजय झाला होता. नंतर त्यांनी भाजपला पाठींबा दिला.
काँग्रेसचे नेते आणि जिल्हा बँकेचे उपाध्यक्ष आप्पी पाटील यांनी नुकताच भाजपमध्ये पक्षप्रवेश केला आहे. बाभुळकर यांची भाजपच्या शिवाजीराव पाटील यांच्यासोबत देखील चर्चा झाली होती. मात्र आप्पी पाटील यांना भाजपमध्ये घेतल्यानंतर बाभुळकर यांनी थेट माजी आमदार राजेश पाटील यांच्याशी युती केली.
मंत्री मुश्रीफ म्हणाले,,कागल नगरपालिकेमध्ये भाजपचे नेते माजी आमदार संजय बाबा घाटगे यांच्याशी चर्चा होईल. गडहिंग्लजमध्ये भाजप सोबत चर्चा सुरु आहे . मुरगूडमध्ये प्रवीण सिंह पाटील यांनी भाजपमध्ये प्रवेश केल्याने त्या ठिकाणी भाजपसोबत आघाडी होणं अवघड आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.