Kolhapur News : इचलकरंजी महानगरपालिकेची यंदा पहिल्यांदाच निवडणूक होत आहे. राज्यात महायुती सरकार असल्याने आगामी स्थानिक स्वराज्य संस्थेच्या निवडणुका देखील एकत्र लढण्याचे संकेत दिले जात असताना इचलकरंजी महानगरपालिकेत भाजप आणि शिवसेनेने स्वतंत्र चाचपणी केली होती. त्यामुळे या महापालिकेच्या निवडणुकीत महायुती मध्ये अंतर्गत वर्चस्व वाद सुरू झाला होता. मात्र त्याविषयाचा आता राज्याचे उच्च आणि तंत्र शिक्षण मंत्री चंद्रकांत पाटील यांनीच इचलकरंजीत जाऊन कंडका पाडला आहे.
दीपावलीच्या निमित्ताने चंद्रकांतदादांनी इचलकंरजीतील नेत्यांच्या घरी जाऊन भेट घेतली. पण या भेटीच्या दरम्यान आगामी महापालिकेच्या निवडणुकीसंदर्भात महायुती करण्यासंदर्भात चर्चा झाली. शिवाय माजी आमदार सुरेश हाळवणकर यांची विधान परिषदेवरील नियुक्ती पहाटेच्या शपथविधीसारखी अचानक होईल, असेही त्यांनी यावेळी सांगितले.
इचलकरंजी महापालिका निवडणूकीसाठी महायुती केली जाणार असून भाजपच्या कोणत्याही कार्यकर्त्यावर अन्याय होणार नाही, असे उच्च व तंत्रशिक्षण मंत्री चंद्रकांत पाटील यांनी येथे आज स्पष्ट केले. मंत्री पाटील यांनी आज आमदार राहूल आवाडे व भाजपचे प्रदेश उपाध्यक्ष हाळवणकर यांच्या निवासस्थानी सदिच्छा भेट दिली. त्यावेळी ते बोलत होते.
स्थानिक स्वराज्य संस्थांच्या निवडणूका या महायुती म्हणून लढविणार आहोत. पण संपू्र्ण महाराष्ट्रात एक युती होणार नाही. कांही ठिकाणी शहर पातळीवर महायुतीचा निर्णय होईल. तर कांही ठिकाणी अगदी प्रभाग पातळीपर्यंत तडजोडी केल्या जातील. यातून सत्ता कशी येईल, हे पाहिले जाणार आहे. पण महापौर व प्रभाग आरक्षण पडल्याशिवाय याबाबतचे नेमके चित्र स्पष्ट होणार नाही.
विधान परिषदेवर त्यांना पक्षाकडून लवकरच संधी दिली जाणार आहे. मुख्यमंत्री देवेंद्र फडणवीस यांच्याशी चर्चा झाली आहे. राज्यपाल नियुक्तीच्या कोट्यात भाजपच्या तीन जागा शिल्लक आहेत. या शिवाय विधान परिषदेच्या आणखी कांही जागा रिकाम्या आहेत. यातील पहिल्या यादीत हाळवणकर यांचे नाव असणार आहे. त्यामुळे त्यांची विधान परिषदेवरील नियुक्ती ही पहाटेच्या शपथविधीसारखी अचानक होईल. तसेच आवाडे - हाळवणकर एकत्र आल्यामुळे कोणत्याही कार्यकर्त्यांवर अन्याय होणार नाही, असे चंद्रकांत पाटील यांनी स्पष्ट केले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.