Siddhi Vastre : राज्यातील सर्वाधिक तरुण नगराध्यक्षांच्या विरोधात पद्‌भार घेण्याच्या दिवशीच तक्रार दाखल

Solapur, 06 January : सोलापूर जिल्ह्यातील मोहोळच्या नगराध्यक्ष म्हणून सिद्धी वस्त्रे निवडून आल्या. राज्यातील युवा नगराध्यक्षांपैकी त्या एक ठरल्याने त्यांची सर्वत्र चर्चा झाली होती. मात्र, नगराध्यक्षपदाची सूत्रे हाती घेण्याच्या दिवशीच वस्त्रे यांच्या विरोधात जात पडताळणी समितीकडे तक्रार दाखल झाली आहे, त्यामुळे मोहोळच्या राजकारणाची एक चुणूक पहिल्याच दिवशी नगराध्यक्ष वस्त्रे यांना आली असेल.

भारतीय जनता पक्षाचे (BJP) सोमेश क्षीरसागर यांनी याबाबतीच तक्रार केली आहे. क्षीरसागर यांच्या भावजय शीतल क्षीरसागर यांनी भाजपकडून, तर सिद्धी वस्त्रे यांनी शिवसेना-राष्ट्रवादी काँग्रेस पक्षाच्या युतीकडून नगराध्यक्षपदाची निवडणूक लढवली होती. जिल्ह्यातील चुरशीच्या निवडणुकीपैकी एक मोहोळ नगरपरिषदेची निवडणूक ठरली होती.

मोहोळमध्ये उपमुख्यमंत्री एकनाथ शिंदे (Eknath shinde) यांनी सभा घेतली होती, तर माजी आमदार राजन पाटील यांच्यासह सर्व भाजप हा शीतल क्षीरसागर यांच्या पाठीशी ठामपणे उभा होता. मात्र, नगराध्यक्षपदाच्या निवडणुकीत सिद्धी वस्त्रे यांनी शीतल क्षीरसागर यांचा १७० मतांनी पराभव केला होता.

शिवसेनेच्या धनुष्यबाणावर निवडून आलेल्या सिद्धी वस्त्रे ह्या राज्यातील युवा नगराध्यक्षांपैकी एक ठरल्या आहेत. नगराध्यक्ष म्हणून त्यांनी सोमवारी (ता. ०५ जानेवारी) आपल्या पदभार स्वीकारला. पण त्याच दिवशी त्यांच्या विरोधात जात पडताळणी समितीकडे तक्रार दाखल झाली आहे, त्यामुळे पहिल्याच दिवशी त्यांच्यासाठी सुखद आणि धक्कादायक अनुभव ठरला आहे.

सिद्धी वस्त्रे ह्या हिंदू जंगम आहेत. त्यांनी जातीचा दाखला मिळावा म्हणून त्यांच्या वडिलांचा शाळेचा दाखला जोडला आहे. जात प्रमाणपत्र मिळविण्यासाठी त्यांनी कोणतीही कागदपत्रे जोडलेली नाहीत. सिद्धी वस्त्रे यांचे आजोबा विश्वनाथ वस्त्रे हेही शिक्षित आहेत, त्यांच्या शाळा सोडल्याच्या दाखल्यावर जातीचा उल्लेख स्पष्टपणे हिंदू जंगम असा आहे.

विश्वनाथ वस्त्रे यांच्या मुलांच्या शाळांच्या दाखल्यांवर बेडा जंगम झालेला उल्लेख चुकीचा आहे. तोच बेकायदेशीर आहे, त्यामुळे सिद्धी वस्त्रे यांच्या जातीच्या दाखल्यावर बेडा जंगम झालेला उल्लेख चुकीचा आहे, त्या हिंदू जंगम आहे, असे क्षीरसागर यांनी आपल्या अर्जात म्हटले आहे.